Kwomaroñ ke Deloñ ilo ‘Juõn Aor Elap Me ej Tellok ñan Jerbal’?
1. Ta ‘aor eo elap me ej tellok ñan jerbal’ ej bellok ñan kij?
1 Ke ‘juõn aor elap me ej tellok ñan jerbal’ ear bellok ñan ri jilek Paul, ear mõnõnõ in kortokjen ien eo ñan kowõnmanlok jerbal in kwalok nan meñe elõñ ri jumae ro. (1 Kor. 16:9) Rainin ewõr enañin 642,000 ri kwalok ro kin Ailiñ eo ibelakin lal im emwij air deloñ ilo juõn aor elap me ej tellok ñan jerbal in regular pioneer.
2. Jen ien ñan ien etke ej men in meletlet ñan etale wãwen ko ibbed?
2 Wãwen ko Ibbed Remaroñ Oktak: Meñe wãwen ko ibbed make kiõ rej kõmman bwe en wõr joñan ad maroñ kõmmane jerbal in kwalok nan, wãwen ko remaroñ oktak. Inem, ej juõn men in meletlet ñan etale wãwen ko ibbed make jen ien ñan ien im jab kõttar kin wãwen ko remõntata. (Ekk. 11:4) Kwoj juõn jodikdik ke im mõttan jidik kwonaj kadiojlok jen high school? Kwoj juõn jemen ak jinen ke im mõttan jidik ajiri ro nejõm renaj jinoe air school? Ej ebaktok ke ien am retire ak bõjrak jen am jerbal? Oktak kein remaroñ lewõj juõn ien emõn ñan am maroñ deloñ ilo jerbal in regular pioneer. Juõn kõrã jeid im jatid eo ear wõr abañ ko relap kin ejmour ear bebe ñan an deloñ ilo jerbal in regular pioneer ke ear 89 yiõ dettan. Etke? Kinke ejañin bar deloñ ilo hospital iumin elaplok jen juõn yiõ, ear eñjake bwe ejmour eo an enaj kõtlok bwe en maroñ regular pioneer.
3. Ewi wãwen jet rar kõmman oktak bwe ren maroñ bõk jerbal in regular pioneer?
3 Ikijen Paul, ilo jinoin ear karõk in lolok ro jein im jatin ilo Korint. Bõtab, ear kõmman oktak ko kin karõk ko an kin news eo emõn. Elõñ ro rainin rar aikwij in kõmman elõñ oktak ko bwe ren maroñ bõk jerbal in regular pioneer. Jet rar kõmman bwe en lamwan wãwen mour ko air ilo air bõk jerbal in part-time ñan kabwe aikwij ko air. Rej lo mõnõnõ ilo jerbal ko air im ewõr jerammõn. (1 Tim. 6:6-8) Jet ri belele ro rar kõmman oktak ko ilo air kõmman bwe leo ri belele eo wõt en aikwij in jerbal, inem ej kabellok juõn ial bwe lio belen emaroñ erom regular pioneer.
4. Ta eo jemaroñ kõmmane elañe jej bere bwe jejjab maroñ tõbar mejenkajjik eo kin awa ko?
4 Kwon jab mõkaj in jolok lemnak eo kin regular pioneer kin am mijak bwe kwo jab maroñ tõbar mejenkajjik eo kin awa ko. Kwoj aikwij elaplok jidik jen ruo wõt awa kajjojo ran. Elañe kwoj bere bwe kwonaj jab maroñ kõmmane men in, kajeoñ in auxiliary pioneer iumin juõn ak ruo alliñ ak kin mejenkajjik eo ñan tõbar 70 awa ko. Men in enaj kõtlok bwe kwon edjoñ lañliñ ko rej tokjen jerbal in pioneer. (Sam. 34:8) Konono ibben regular pioneer ro. Remaroñ kar bõk anjo jen melejoñ ko rej einlok wõt ko am. (Ken. 15:22) Kajitõk ibben Jehovah ñan an kajerammõn jibadbad ko ñan kalaplok jerbal in kwalok nan eo am.—1 Jon 5:14.
5. Etke jerbal in regular pioneer ej juõn jerbal ewõr tokjen?
5 Juõn Jerbal Ewõr Tokjen: Jerbal in regular pioneer ej bõktok elõñ jerammõn ko. Kwonaj maroñ lo mõnõnõ eo elap me ej walok ñe elaplok am lelok. (Jerb. 20:35) Regular pioneer enaj kakõmõnmõnlok maroñ eo am bwe en jimwe wõt am katakin kin Nan eo an Anij. (2 Tim. 2:15) Enaj kalaplok am ien ñan lo wãwen an Jehovah rejetak yuk. (Jerb. 11:21; Pil. 4:11-13) Enaj bareinwõt jibañ yuk ñan ejaake kadkad ko lor jitõb kadkadim, einwõt kijenmij, im enaj kamaroñ yuk ñan ruaklok ñan Jehovah. (Jem. 4:8) Kwomaroñ ke deloñ ilo juõn aor elap me ej tellok ñan am bõk jerbal in regular pioneer?