Kwaar Ke Pioneer M̦okta?
1. Ta jerbal eo elõñ rar m̦õn̦õn̦õ in bõke, ak ta eo jet rar aikuj kõm̦m̦ane?
1 Ium̦win elõñ iiõ ko, elõñ to̦ujin rar m̦õn̦õn̦õ in bõk jerbal in pioneer bwe ren maroñ ‘katakin im kwalok kin Ennan eo Emmõn.’ (Jrb. 5:42, UBS) Bõtab, jet rar aikuj bõjrak jãn aer pioneer kõn jet un ko. El̦aññe kwaar pioneer m̦okta, kwõnañin ke bar lale el̦aññe kwõmaroñ bar bõk jerbal in pioneer?
2. Etke ro rar pioneer m̦okta rej aikuj bar lale el̦aññe remaroñ bar pioneer?
2 Ewõr Oktak Ko: Bõlen men eo ear kõm̦m̦an am̦ kar bõjrak jãn pioneer ejako kiiõ. Ñan waanjoñak, bõlen kwaar bõjrak kõnke kwaar jab maroñ tõpar 90 awa juon allõñ, joñan eo me juon pioneer ear aikuj kajejjete. Bõtab, kwõmaroñ ke bar jino pioneer kiiõ ke em̦õj kadikl̦o̦k ñan 70 awa? Bareinwõt ejako ke am̦ poub ilo jerbal ãinwõt kar m̦okta, ak edikl̦o̦k ke eddo ko am̦ ilo baam̦le eo jãn kar m̦okta? Juon sister ear bõjrak jãn an pioneer kõn an kar wõr an nañinmej, ak ke ear 89 an iiõ ear bar bõk jerbal in pioneer. Ejañin bar del̦o̦ñ ilo aujpitõl̦ ium̦win juon iiõ im ear lo bwe emaroñ bar pioneer kõnke em̦m̦anl̦o̦k ãjmour eo an.
3. Ewi wãween baam̦le eo emaroñ jipañ im rejetake juon jãn baam̦le eo bwe en pioneer?
3 Bõlen juon ilo baam̦le eo am̦ ear bõjrak an pioneer kõnke en maroñ lale jemen ak jinen kõnke relukkuun rũtto. (1 Ti. 5:4, 8) Kõn men in, kwe im ro jet ilo baam̦le eo am̦, kom̦ maroñ ke jipañ e? Kom̦ maroñ kõnono ippãn doon kake men in. (JK. 15:22) Ñe ro uwaan baam̦le eo rej jipañ im rejetake doon bwe juon iaaer en maroñ pioneer, rej lukkuun rejetake jerbal in im kaorõke.
4. Ta el̦aññe ilo tõrein kwõjjab maroñ bar bõk jerbal in regular pioneer?
4 El̦aññe ewõr un ko im rej kautameik eok jãn am̦ bar jino pioneer, kwõn jab ebbeer. Ej buñbũruon Jeova ñe ej loe am̦ kõn̦aan pioneer. (2 Ko. 8:12, UBS) Men ko kwaar katak kaki jãn am̦ kar pioneer, kwõn kajerbali ilo am̦ kwal̦o̦k naan. Jar ñan Jeova kõn kõn̦aan eo am̦ ñan pioneer, im pukõt wãween ko ñan am̦ maroñ bar bõk jerbal in regular pioneer. (1 Jon 5:14) Bõlen juon iien, Jeova enaaj ‘kapel̦l̦o̦k ñan kwe juon aor el̦ap’ me enaaj tõll̦o̦k eok ñan am̦ bar regular pioneer.—1 Ko. 16:9.