Pioneer ro Rej Jibañ Don
1 Jesus ear ba: “Elap jonikõn, a reiet dri marmir: inem komin jar im kajitõk iben Iroij an jonikõn, bwe En jilkinlok ro dri marmir ilo An jonikõn.” Kinke kar eiet ri madmõd ilo ebeben eo kein kajuõn, ear lap territory rar aikwij jerbal ie, Jesus ear maroñ kar jiroñ ir ñan jibadõk elõñ armij joñan air maroñ kin news eo emõn ilo an jilkinlok ir juõn kin juõn. Jen men in, ear “jilkinlok ir karuolok iman mejen.” (Luke 10:1, 2) Etke karuolok?
2 Ri kalor rein rar kãl im ejelok air iminene. Ilo air jerbal ibben don rar maroñ katak jen don im rejañ don. Einwõt Solomon ear ba, “ruo remõnlok jen juõn.” (Ekl. 4:9, 10) Meñe elikin an lutõkelok jitõb kwojarjar ilo Pentecost 33 C.E., Paul, Barnabas, im ro jet rar etal ibben ri tõmak ro mõttair ilo jerbal in kwalok nan. (Jerbal 15:35) Kar juõn jerammõn elap ñan bõk kaminene jen maan rein ewõr air maroñ!
3 Juõn Program in Kaminene Emõn: Einwõt congregation eo ilo ebeben eo kein kajuõn, congregation in Christian ilo ran kein ej juõn dolul in kwalok nan. Ej bareinwõt kamineneik kij. Einwõt armij ro kajjojo, kõnan eo ilo buruõd en ñan kwalok news eo emõn ilo bolemen ilo joñan eo jemaroñ. Inem, bwe en lõñlok ri kwalok ro remaroñ kakõmõnmõn air bolemen in kwalok nan, remaroñ bõk jibañ.
4 Ilo Kingdom Ministry School eo ej kab walok, Society eo ear kejelã kin juõn program bwe pioneer ro ren jibañ ro jet ilo jerbal in kwalok nan. Ewõr ke juõn aikwij kin men in? Aet, ewõr. Elõñlok jen juõn million ri kwalok ro rar baptais ilo jilu yiõ ko rej kab motlok, im elõñ iair rej aikwij bõk kaminene ñan air bolemen ilo jerbal in kwalok nan. Wõn ro remaroñ kajejjet aikwij in?
5 Pioneer ro rej full-time remaroñ jibañ. Dolul eo an Jehovah ej lelok ñan ir elõñ nan in kakabilek im kaminene ko. Pioneer ro rej bõk nan in kibel ko rej jejjet ñan aikwij ko air ilo Pioneer Service School ruo week ko aetokin. Rej bareinwõt bõk tokjen jen kwelok ko ibben circuit im district overseer ro, im bareinwõt jen nan in tel ko jen elder ro. Meñe ejjab aolep pioneer ro ewõr air iminene einwõt kar Paul im Barnabas, rar bõk kaminene ko raorõk, ko rej mõnõnõ in jaketo-jaketake.
6 Wõn Ro Renaj Bõk Tokjen? Ri kwalok ro rekãl im ro rej kab baptais ir wõt ke remaroñ bõk kunair ilo program in? Jab ñan jidik! Ewõr ro redik im ro reritto me etto air jelã kin mol eo ak rej mõnõnõ in bõk jibañ kin jet wãwen ko ilo jerbal in kwalok nan. Jet rej kõmman jerbal ko remõn ñan lelok book ko ak ebin air kõmman bar jeblak ko ak ijjino katak kin Bible ko. Ro jet ebidodo air jino katak kin Bible ko ak rej lo bwe ri katak ro rejjab kõmman wõnmanlok. Ta eo ej debdebij ir? Pioneer ro ewõr air iminene remaroñ lelok jibañ ilo wãwen kein. Jet pioneer ro rej bolemen in kaitoklimoen armij, jino katak kin Bible ko, im jitõñlok ri katak ro rekãl ñan dolul eo. Iminene eo air naj juõn men in jibañ ilo program in ekãl.
7 Kwoj lo ke bwe schedule eo am ejjab kõtlok am jurake kwelok ko kin jerbal in kwalok nan an congregation eo ilo joñan eo kwo kõnan? Juõn pioneer emaroñ jerbal ibbam ilo ien ko ñe ri kwalok ro jet rejjab maroñ.
8 Jerbal Ibben Don ilo Emõn Ej Men in Aikwij: Ruo alen ilo juõn yiõ, elder ro renaj kõmman karõk ko ñan ri kwalok ro me rekõnan bõk jibañ ilo program in Pioneer ro Rej Jibañ Ro Jet. Elañe kwoj errã ñan bõk jibañ, kebak pioneer eo rar assign i ñan an jibañ yuk, kõmman juõn schedule ekeie kin jerbal in kwalok nan, im kajejjete. Kajejjet kajjojo karõk ko. Ñe komij jerbal ibben don, bukõt wãwen ko rebolemen ñan kwalok news eo emõn. Etale kin etke jet wãwen ko ñan kwalok ennan rej bolemen. Lemnak kin nan in rejañ ko pioneer eo emaroñ lewõj ñan kakõmõnmõnlok ennan eo am. Ñe kwoj jerbale men ko kwar katak kaki, wõnmanlok eo am ilo jerbal in kwalok nan enaj alikar, ñan kwe im ro jet jimor. (Lale 1 Timothy 4:15.) En emakijkij ami jerbal ibben don, bõk kunami ilo aolep wãwen kwalok nan ko, ekoba kwalok nan ilo jabdewõt ien emõn tok ak elaptata ilo jabdewõt wãwen jerbal eo kwoj aikwiji jibañ.
9 Service overseer eo ej itoklimo kin wõnmanlok eo. Jen ien ñan ien, enaj kajitõk ibben ri tel Congregation Book Study eo ñan lale ewi wãwen kwoj bõk tokjen jen program eo. Circuit overseer eo enaj bareinwõt jibañ yuk ñe ej lolok congregation eo.
10 Jehovah ekõnan bwe armij ro an ren iminene im “emwij kõkõmõnmõn e ñõn jerbal emõn otemjej.” (2 Tim. 3:17) Watõk program in Pioneer ro Rej Jibañ Ro Jet einwõt juõn men in letok emõn ñan jibañ ro rekõnan ñan kakõmõnmõnlok maroñ eo air ñan kwalok nan. Elañe ej jerammõn eo am ñan bõk kunam ilo program in, kõmmane kin kamolol, ettã buru, im lañliñ.