“Juõn Nan Ñe Ekar Air Kwalok E”
1 Jaketo-jaketak ennan in mour ibben ro jet ej ke juõn men ebin ibbam? Kwoj lemnak ke bwe kwoj aikwij ba juõn men emũlal im meletlet ñan kabwilõñ ro rej roñjake yuk? Ke Jesus ear jilkinlok ri kalor ro an, ear jiroñ ir: “Ñe komij ilok, komin kwalok, im ba, Ailiñ in lõñ ebak.” (Mat. 10:7) Ennan eo ear lamwan im bidodo ñan jaketo-jaketak. Ejelok oktak rainin.
2 Ekkã an aikwij jejjo wõt nan ko ñan ijjino juõn bwebwenato. Ke Philip ear iion eunuch ri Ethiopia eo, ear kajitõk ibben: “Kwoj melele ke men eo kwoj konono kake?” (Jerbal 8:30) Juõn bwebwenato elap tõbrak ie, itok jen wõt “juõn nan ñe ekar air kwalok e”!—Ken. 25:11.
3 Kwomaroñ kajerbal juõn wãwen einlok wõt in ilo jerbal in kwalok nan eo am. Ewi wãwen? Ilo am lale im kãlet nan ko rekkar ñan wãwen ko. Bõkmantak juõn kajitõk, im roñjake uak eo.
4 Jet Kajitõk ko Relamwan: Ñan ijjino juõn bwebwenato, kwomaroñ kõnan kajerbal juõn ian kajitõk kein:
◼ “Kwoj kajerbal ke Jar eo an Iroij ilo kabuñ eo am?” (Mat. 6:9, 10) Elij mõttanin jar eo, inem ba: “Jet armij rej kajitõk, “Ãt ta eo etan Anij me Jesus ear ba bwe jen kokwojarjare?’ Ro jet rej kajitõk, ‘Ta Ailiñ eo me Jesus ear ba bwe jen jar kake?’ Kwonañin lo ke uak ko rekapo buruõm ñan kajitõk kein?”
◼ “Kwonañin lemnak ke: ‘Ta un eo unin mour?’ ” Kwalok bwe ej ekkejel ibben jelãlokjen eo kin Anij.—Ekkl. 12:13; Jon 17:3.
◼ “Kwoj lemnak ke bwe enaj jako mij?” Kajerbal Aiseia 25:8 im Reveles̃õn 21:4 ñan lelok juõn uak emol.
◼ “Ewõr ke juõn mejelan alikar ñan abañ ko an lal in?” Kwalok bwe Anij ej katakin ñan “yokwe dri turõm.”—Mat. 22:39.
◼ “Juõn jorrãn ilañ enaj kokkure ke lal in juõn ien?” Kwalok kin kallimur ko ilo Bible bwe lal in enaj bed ñan indio.—Sam 104:5.
5 Kwalok kin news eo emõn ilo juõn wãwen ekajju im alikar im ilo joij. Jehovah enaj kajerammõn jibadbad ko am ñan leto-letak baj “juõn nan” kin mol eo ibben ro jet.