Lamwan in Alikar Ej Men eo Emõntata
1 Etke armij ro rej mõnõnõ in roñjake ñe ri kwalok ro redik rej jaketo-jaketak ennan in Ailiñ eo ibbeir? Juõn un ej bwe nan ko air relamwan. Jet ri kwalok ro rej eñjake bwe ñan air bolemen in kwalok nan ej aikwij wejepedik air kennan. Bõtab, iminene ko rej kwalok bwe juõn ennan elamwan im alikar ej men eo emõntata.
2 Jesus ear keañ kin Ailiñ in Anij ilo juõn wãwen elamwan im kajju im ear kamineneik ri kalor ro an ñan kõmman air eindein. (Mat. 4:17; 10:5-7; Luk 10:1, 9) Ear kajerbal nan in kabellok ko, kajitõk ko, im wanjoñok ko relamwan ñan kaitoklimoen ro rej roñjake e im ñan tõbar burueir. (Jon 4:7-14) Ej emõn ad kajeoñe wanjoñok eo an im kwalok ennan ko ebidodo an armij melele.
3 “News emõn kin ailiñ eo” ej ennan eo jej keañ kake. (Mat. 24:14) Ilo am kajerbal Ailiñ eo einwõt unin tel in katak eo am men in enaj jibañ yuk ñan kõmman bwe en lamwan ennan eo am. Konono kin men ko me ro rej roñjake rej inebata kaki. Kõrã ro ekkã air itoklimo kin mour in family jen katak ko ikijen politic (kien). Juõn jemen elap an lemnak kin jikin jerbal eo an im kejbãrok in family eo an. Jodikdik ro rej itoklimo kin ilju im jeklaj eo air; ro reritto, kin ejmour im jokane eo air. Armij ekkã air itoklimo kin men ko rej walok ilo bukwon eo air jen ta eo ej walok ilo ene ko retolok. Elikin ami bwebwenato kin men ko komro jimor komij itoklimo kaki, kareilok e ñan jerammõn ko me armij ro rej bokake renaj lañliñ kaki iumin iroij eo an Ailiñ in Anij. Jet nan ko relamwan im emõn kãleti ekoba juõn eon emaroñ men eo emõntata ñan kaitoklimoen eo ej roñjake yuk.
4 Kwomaroñ ijjino juõn bwebwenato ilo am ba:
◼ “Ejelok bere kwonaj errã bwe elõñ nañinmij ko me ejelok uno ko ñan joloki rej kaeñtan armij. Ak kwar jelã ke bwe Anij ear kallimur bwe enaj jolok aolep kain nañinmij ko, im mij bareinwõt?” Kõtlok an uak, inem read Reveles̃õn 21:3, 4.
5 Ilo am kajerbal ennan ko ralikar im lamwan, kwomaroñ tõbar lemnak im buruen elõñlok armij ro ilo territory eo am, im jibañ ir ñan katak kin Jehovah im kejatdikdik eo ñan lañliñ kin mour indio.—Jon 17:3.