Ewi wãwen ad Keboj Juõn Ennan in Lelok Magazine
1 ‘Etke jej aikwij keboj jet ennan ko ñan lelok magazine,’ kwomaroñ lemnak, ‘ke wãwen ad kwalok kajjojo ian magazine kein rej walok ilo Ad Jerbal Ñan Ailiñ Eo?’ Elõñ rar lo bwe wanjoñok in ennan kein elaplok air jibañ, ak ej menin aikwij wõt ñan keboj nan ko am make. Juõn ennan me ekeie ilo juõn territory emaroñ jab ekkar ilo bar juõn. Kin men in, jejjab aikwij bõk eñjake eo bwe jej aikwij kwalok kin magazine eo nan kin nan einwõt ej walok ilo wanjoñok in ennan ko. Meñe jej kãlet ñan kajerbal juõn wanjoñok in ennan, emõn ñe jej kwalok ennan eo ilo nan ko ad make.
2 Kãlet juõn Katak: Elikin am readi magazine eo, kãlet juõn ian katak ko ej ekkar ñan territory eo am im elap am kar itoklimo kake. Tõmak im kijejeto eo am ñe kwoj kwalok katak eo emaroñ kamakit ri mweo bwe en kõnan readi. Meñe kwoj kwalok katak eo me emaroñ kaitoklimoen elõñ armij ro ilo territory eo, kwon bareinwõt jelã kin katak ko jet ilo magazine eo. Menin enaj jibañ yuk ñan ukõt ennan eo am ñe kwoj iion juõn armij me ej itoklimo kin juõn katak eoktak.
3 Kwalok juõn Kajitõk: Elikin menin, keboj nan in kabellok ko am. Nan in jino ko am raorõk. Emaroñ wõr tokjen elañe kwoj bõkmantak juõn kajitõk ibben ri mweo me enaj kamakit itoklimo eo an kin katak eo kwar kãlet ñan kajerbale. Kajitõk ko kin lemnak an armij ekkã an wõr tokjeir. Bõprae am kwalok kajitõk ko me remaroñ kainebataik ri mweo ak kõmman an aikwij jojomare lemnak eo an.
4 Konono juõn Eon: Eliktata, kãlet juõn eon ñan am readi elañe ri mweo enaj kõtlok, bõlen juõn eon kwar loe ilo katak eo kwonaj kwalok kake. Ilo am konono juõn eon enaj jibañ ri mweo ñan lo bwe ennan ko ad ej jen Nan ko an Anij. (1 Tes 2:13) Eon eo enaj bareinwõt kwalok ennan eo ñan ri mweo meñe ejjab kõnan bõk magazine ko. Jet ri kwalok ro rar maroñ kaitoklimoen ri mweo ilo air readi juõn eon mokta jen air kwalok juõn kajitõk. Kwomaroñ jino am kwalok eon eo ilo am ba, “I kõnan jelã lemnak eo am kin ta eo ej ba ilo eon in ilo Bible.” Inem jitõñlok armij eo ñan juõn point ilo magazine eo, im uak ilo tukadu ñan kaitoklimoen mokta jen am lelok magazine eo.
5 Ejelok kien ko nae ta eo jemaroñ ba kin magazine ko ñe jej lelok. Ekkã an emõn ñan kõmman bwe ennan ko ad ren lamwan im kadu. Kajerbal juõn wãwen me ebidodo ñan kwe im ekkã an walok ilo tokjen ko remõn. Kalikar aorõkin magazine ko, im kwalok am kijejeto. Elañe emõn am bojak, enaj bolemen am likit Imõniaroñroñ eo im Awake! (Ruj!) ibben ro “jabrewõt ar likit ir bwe ren mour in drio.”—Jerbal 13:48.
[Kajjitõk ko]
1. Etke emõnlok ñan keboj juõn am make ennan in lelok magazine jen ad baj kili wõt wanjoñok eo kar letok ilo Ad Jerbal Ñan Ailiñ Eo?
2. Ta eo ej kitibuj ilo bebe eo am kin katak et eo kwonaj kwalok kake?
3. Ta nan in kabellok eo kwoj kajerbale ñan bõk tokjen ko remõntata?
4. Ta tokjen ko rej walok ilo ad konono juõn eon ñan ri mweo elañe renaj kõtlok?
5. Ta nan in jiroñ ko raorõk kwoj aikwij kememej ñe kwoj keboj juõn ennan in lelok magazine eo?