Lelok Magazine ko Rej Kennan kin Mol Eo
1. Ta jerbal eo an Imõniaroñroñ im Awake!?
1 Magazine in Imõniaroñroñ—Ej Kwalok kin Ailiñ eo an Jehovah im magazine eo juõn, Awake! (Ruj!), rej mõttan kein jerbal ko raorõktata ilo jerbal in kwalok nan im kõmman ri kalor ro. (Mat. 24:14; 28:19, 20) Jej lañliñ ilo ad ekkeini in lelok magazine kein ñe jej bõk kunad ilo elõñ wãwen ko ilo jerbal in Ailiñ eo.
2. Ta oktak ko emwij kõmmani ilo Imõniaroñroñ im Awake!, im etke?
2 Iumin elõñ yiõ ko emwij ad lo elõñ oktak ko ilo joñan kilepin magazine ko im ilo lajrak in katak ko ilo peij eo ituman ekoba wãwen ko jej kajerbali ñan leto letak. Oktak kein emwij kõmmani kin mejenkajjik eo bwe magazine ko ren laplok air kaitoktoklimo im keie, bwe ennan eo kin Ailiñ eo en tõbar buruen ‘armij otemjej bwe ren maroñ bõk lomor im mour kin mol.’—1 Tim. 2:4.
3. Enaj ewi wãwen kajerbal magazine ko ilo jerbal in kwalok nan?
3 Jen January 2006, ekar kabel lok wãwen ad kajerbal ennan ko kin magazine in Awake! eo ej itok kajjojo alliñ. Kiõ ilo ejja wãwen in lok wõt, jenaj lelok juõn magazine in Imõniaroñroñ—Ej Kwalok kin Ailiñ eo an Jehovah kajjojo alliñ ilo jerbal in kwalok nan eo ad. Ennan ko kin ta eo jemaroñ ba kin magazine kein, rebed ilo tulikin peij eo ilo Ad Jerbal Ñan Ailiñ Eo. Enañin aolep ien ennan kein rej bõkmantak juõn ian katak ko ilo jinoin magazine eo, ak ilo ien kein ewõr katak ko jet me armij ro rej itoklimo kaki rej walok iloan. Wãwen kein jemaroñ kajerbali ilo juõn wãwen ekeie ñe jejelã kin katak ko iloan im kajerbal nan ko ad make ñan ukõt ennan eo ekkar ñan territory eo ad.
4. Etke emaroñ wõr tokjen ñan kajerbal ennan ko jet kin kilen lelok magazine ko ijellokin ennan ko ilo Ad Jerbal Ñan Ailiñ Eo?
4 Meñe Ad jerbal Ñan Ailiñ Eo ej kwalok ennan ko jemaroñ kajerbali kin kajjojo magazine, kwomaroñ kajerbal ennan ko jet. Juõn ian un ko unin am maroñ kõmman eindein ej kinke katak ko jet remaroñ lap an kareel ro ilo territory eo am. Ak emaroñ kinke kwoj eñjake bwe kwomaroñ kõmman juõn ennan ekeie ilo am kajerbal juõn katak elap am itoklimo kake.
5. Ta eo kwoj aikwij kõmmane mokta jen am keboj juõn ennan kin magazine eo kwoj iten kwalok kake?
5 Wãwen ñan Keboj Ennan eo Am: Moktata, kwoj aikwij lukkun jelã kin kobban katak eo kwonaj kwalok jen magazine eo. Emaroñ jab aolep ien kwoj jelã aolep katak ko ilo magazine eo mokta jen am jino kajerbale ilo jerbal in kwalok nan. Bõtab, kwoj aikwij kwalok am itoklimo im mol kin katak ko ilo magazine eo kwoj kãlet ñan kwalok kake. Kwomaroñ kõmmane men in ñe kwoj lukkun jelã kin kobban katak eo kwoj kwalok.
6. Ewi wãwen kwomaroñ keboj ennan ko am make?
6 Kein ka ruo, jej aikwij jelã kilen ukoktak ilo ad keboj ennan in ijjino ko ad. Bõkmantak juõn kajitõk ekaitoktoklimo ej ekkejellok ñan katak eo emaroñ tellok ñan jino juõn bwebwenato. Aolep ien jen atartar ion kajur in Nan eo an Anij ñan tõbar burueir. (Hib. 4:12) Kãlet eon eo ekkar me ej ekkejellok ñan men eo kwoj konono kake, ak emõntata bwe kwon kãlet juõn eon me ej walok ilo katak eo kwoj bõkmantak. Lemnak kin wãwen eo ñan kõmman bwe eon eo en ekkejellok ibben katak eo.
7. Ewi wãwen jemaroñ kakõmõnmõnlok ennan ko ad?
7 Aolep Ien ko Rebellok: Bwe ennan eo am en keie, kwoj aikwij kajerbale. Kajerbale ilo am kobalok ibben congregation eo ilo ien lelok magazine ilo Saturday. Lelok magazine ko ñan armij ro ekkã air mõnõnõ in bõk book ko jet ilo ien ko mokta. Ien otemjej kwon lelok magazine ko ñan ri katak Bible ro am im ñan ro kwoj ion ir ñe kwoj jeblak. Kwomaroñ lelok magazine ko ñan ibben armij ro kwoj konono ibbeir ilo ien kaikujkuj, ñe kwoj itoitak, ak ñe kwoj kõttar ilo office an juõn doctor. Kakõmõnmõnlok ennan ko am ñe kwoj kwaloki ilo aolepen alliñ eo.
8. Ilo wãwen et ko magazine in Imõniaroñroñ im Awake! rejej uair?
8 Magazine kein Imõniaroñroñ im Awake! rej magazine ko rejej uair. Rej nebar Jehovah einwõt Iroij Bõtata eo ijoko otemjej. (Jerb. 4:24) Im rej kainemõn armij kin news eo emõn kin Ailiñ eo an Anij im rejañ ñan tõmak ilo Jesus Christ. (Mat. 24:14; Jerb. 10:43) Bareinwõt, magazine kein rej etale wãwen makitkit ko ilo lal einwõt rej jejjet kitieir ilo kanan ko lo Bible. (Mat. 25:13) Kwon jibañ kajjojo armij ro ilo territory eo am ñan bõk tokjen jen ennan kein rej walok ibelakin lal ilo magazine kein ikijen am keboj kwe make ñan liloki ilo ien ko remõn me rebellok!
9. Ewi wãwen jemaroñ likit juõn bedbed ñan kõmman bar jeblak?
9 Ñe kwoj lo tõbrak ilo am likit juõn magazine, ak ñe kwoj kwalok am mõnõnõ in bwebwenato ibben armij eo kin men ko lor jitõb, kwon bojak kin juõn kajitõk ak juõn ennan ekaitoktoklimo me emaroñ kabellok ial ñan kõmman bar jeblak im jino bar juõn bwebwenato ibben. Elañe jej kijejeto in kallip inen mol, jej liki bwe Jehovah enaj kabellok buruen ro me relukkun kõnan jelã kajjen im jerbal ñan E.—1 Kor. 3:6.