Magazine ko Rej Keañ kin Ailiñ eo
1 Einwõt Ri Kennan ro an Jehovah, elap ad buñbuñ kin ad kwalok nan ilo kijejeto kin Ailiñ in Anij. Imõniaroñroñ im Awake! magazine ko jej jaketo-jaketak elap air jibañ million armij ro ñõn katak kin karõk ko an Jehovah. Ennan eo ej bed iloan emol ej news eo emõn, bwe ej keañ kin Ailiñ eo an Anij ilõñ einwõt kejatdikdik eo wõt an armij.
2 Magazine ko rej etale aikwij ko remol an armij—ilo eñjake, ikijen social (mour ibben don) im ilo jitõb. Ke mwil emõn im aorõkin mour in family ej jorrãn lok, Imõniaroñroñ im Awake! rej jibañ armij ñõn kakõmõnmõnlok emõnin mour ko air ilo an kwalok ñõn ir wãwen eo ñõn jerbale nan in kakabilek ko ilo Bible. Jenaj mõnõnõ in kwalok magazine kein ilo May im June.
3 Ewor Karelel eo Emol: Imõniaroñroñ im Awake! rej walok ilo enañin aolep kajin ko ilo lõl in. Kin men in, elap an armij jela kajjen magazine ko ad. Ijin ej jet un ko unin armij rej rel kaki:
◼ Einwõt magazine ko retiljek im mol, rej kwalok ilo alikar oktak eo ikõtan emõn im nana.
◼ Rej lelok juõn kejatdikdik kin juõn paradise ewãnik eo ej itok, eo ej wawa ion kallimur eo an Anij ñõn bõktok lõl in iumin iroij eo an Ailiñ eo an.
◼ Rej kwalok juõn ekããlel elap kin katak ko rejejjet, im rej emejaja ñõn armij ro jen aolep wãwen mour im manit ko.
◼ Katak ko rej jejjet, elap an katakin, mol, im ejelok kalijeklok im ejjab ebbõruru.
◼ Pija ko remejaja emõkaj air kaitoklimoen armij, im wãwen jeje eo elamwan ej kõmmõn bwe en bidodo air readi magazine eo.
4 Elap Jaketo-Jaketaki: Jaketo-jaketak ilo bolemen magazine ko ej wawa ion ad tiljek in keboje ennan ko ad, schedule i ien eo ad, im karõke jerbal in kwalok nan eo ad. Nan in rejañ ko rekeie kar walok ilo Ad Jerbal Ñõn Ailiñ Eo ilo September 1995 im November 1996, im enaj emõn ñõn eliji im jerbali.
5 Jela Kajjen Magazine ko: Ñe kwoj readi kajjojo magazine, lemnak kin wõn eo enaj mõnõnõ in bõk juõn copy. Kabuk point ko ak eon ko kwomaroñ eliji ilo ennan eo am. Lemnak kin juõn kajitõk kwomaroñ bõkmantak ñõn jino juõn bwebwenato im kaitoklimoen armij eo kin katak eo.
6 Ukõt Ennan eo Bwe En Ekkar ñõn Armij eo: Keboj juõn ennan elamwan im bidodo ukõte me emaroñ jejjet ñõn juõn emaan, juõn kõra, juõn armij eritto, ak juõn jodikdik, meñe kwoj jela kajjen ak ej juõn ruamaijet.
7 Ien Otemjej Kwon Bojak in Lelok Imõniaroñroñ im Awake!: Kinke magazine ko ebidodo air deloñ ilo juõn bag, ak bõjo, jemaroñ bõk copy ko ibbed ñe jej ito-itak ak kaikujkuj. Leloki ñe jej konono ibben ro nukid, ri turid, ri jerbal ro mõttad, ri school ro mõttad, ak ri kaki ro. Kajenolok juõn ran ilo kajjojo week ñõn kwalok nan ilo kajerbal magazine ko.
8 Kwalok Kamolol kin Magazine ko: Ejjab jakolok aorõkiir. Ñe ej motlok ien ejjab kadiklok aorõkin ennan eo ej bed iloan. Emol, elañe jej kate kij ñõn kamãt aolep magazine ko jej bõki, eban laplok oran magazine ko remor ibbed.
9 Kwalok Nan Turin Ial Ej Bolemen: Wãwen in ej juõn ian wãwen ko remõntata ñõn lelok magazine ko ñõn elõñ armij. Jet ri kwalok ro ekeini air jerbal turin ial ko rebuob ilo ran in kaikujkuj ko.
10 Business Territory Ej Walok Tõbrak Ñe jej kwalok nan jen mõn wia-ñõn-mõn wia ewor jejjo wõt jikin ko ejelok armij ro ie. Enañin aolep armij ro ilo business rej joij, im elõñ rej mõnõnõ in bõk magazine ko. Kwalok katak ko rejejjet ñõn kain business eo kwoj kebake.
11 Magazine Route (Karõk in bar jeblak ñõn lelok magazine ko rekãl) ko Ewor Maroñ in Wor Tõbrak: Kinke magazine ko rej kõmmõne ruo allen ilo juõn alliñ, ej ekkar bwe jen bar jeblak ibben armij im lelok magazine ko rekãl. Jej aikwij keini ad kõmmõn bar jeblak ko, jab ñõn lelok magazine ko wõt ak bareinwõt ñõn kaddeklok itoklimo eo an armij eo ilo Bible. Magazine route ko rej juõn unjen emõn kin ro remaroñ katak Bible.
12 Kortokjen Alliñ ko in May im June: Imõniaroñroñ im Awake! kar wini liki eo an elõñ million ri konono ro rej kamolol. Kin air bolemen in keañ kin Ailiñ eo jej aikwij bõki ibbed im leloki ilo aolep ien ko remõn. Jej kejatdikdik bwe alliñ in May im June renaj ien ko rekabwilõñlõñ ñõn jaketo-jaketak magazine ko!