Ej Let ke Wãwen eo Kwoj Kõtõbrak Jerbal in Kwalok Nan eo Am?
1 Ilo book in Jerbal, ej jiroñ kij bwe ri kalor ro an Jesus rar kõtõbrak jerbal in kwalok nan eo air ilo an let air “kennan” ñan armij. (Jerbal 2:40; 8:25; 28:23) Eñin kar mejenkajjik eo an Paul. (Jerbal 20:24) Ejjab mejenkajjik eo am in bareinwõt ke einwõt juõn ri karejar eo kin news eo emõn? Ewi wãwen kwomaroñ kõtõbrak men in?
2 Keboj Ennan eo Am: Ñan kõmman bwe en bolemen am kwalok nan, eaorõk ñan kebojak lok iman. Men in elaptata an mol ñe kwoj lelok magazine ko, ke katak ko ekkã air oktak. Ñan jibañ kij bwe en emõnlok ad bojak, copy in kin Ad Jerbal Ñan Ailiñ Eo ej bõkmantak juõn men ekãl—column eo itu-anmiñ, eo ej kõlajrak wanjoñok in ennan ko kin Imõniaroñroñ im Awake! magazine ko rekãl. Juõn katak me enaj kareel elõñ armij naj kwalok kake ilo kajjojo copy. Ewi wãwen kwomaroñ kameleleiklok ennan kein rekadu?
3 Kãlet juõn ennan me kwoj lemnak enaj laptata an bolemen ilo territory eo am. Readi katak eo, im bukõt point ko rejejjet me renaj kaitoklimoen armij. Bukõt juõn eon ilo magazine eo me ej rejetake bwebwenato eo im kwomaroñ readi ñan ri mweo. Kobaik juõn nan in kajemlok ekadu, elañe ekkar, ñan rejañ eo ej roñjake ñan readi magazine eo im juõn nan ekadu ñan kejelãik ri mweo bwe emaroñ letok juõn jabawõt ñan jerbal eo ibelakin lal an Ri Kennan ro an Jehovah. Kiõ, kamelmel ennan eo am.
4 Karõk ñan Kajerbal Bible eo: Kin juõn karõk emõn, ekkã am naj maroñ kobaik juõn eon ilo ennan eo am. Ñan wanjoñok, ri kwalok ro me ewõr air iminene ilo elõñ jikin ko rej lo tõbrak ilo air kebak juõn em ilo air jibwe Bible eo, yokyokwe ri mweo, im ba:
◼ “Kimij kajitõk ibben armij elañe rej tõmak kin men in . . . ” Readi Jenesis 1:1, inem kajitõk: “Kwoj errã ke ibben nan kein?” Elañe armij eo ej errã, inem ba: “Ña bareinwõt ij tõmake. Bõtab, kwoj lemnak ke bwe elañe Anij ear kõmanman men otemjej, ej bareinwõt bõk eddon aolep nana ko?” Elikin am kamolol kin uak eo an armij eo, readi Ekklisiastis 7:29. Kabellok Jeran Anij brochure eo ñan peij 13, im read paragraph 2. Rejañ armij eo ñan readi brochure eo. Elañe ri mweo ejjab errã ibben nan ko ilo Jenesis 1:1, rejañ e ñan etale bwebwenato ko jilu jinoin ilo book eo Aõ Buk in Bwebwenato ko Jen Baibel.
5 Bar Jeblak Ibben Aolep Ro Rej Kwalok Air Itoklimo: Kwojjab maroñ lukkun kajejjet am kõtõbrak jerbal in kwalok nan eo am elañe kwojjab bar jeblak ibben aolep ro rar kwalok air itoklimo. Ñe ej emõn am bwebwenato ibben juõn armij, meñe kwoj lelok magazine ko ak book ko jet ak jab, je etan im address eo an armij eo. Ilo tiljek kajeoñ in kaddeklok itoklimo eo an armij eo ilo am bar jeblak ilo mõkaj. Ilo mol, tilmaake juõn Bible study.
6 Ri kalor ro ilo ebeben eo kein kajuõn rar jelã bwe Jesus ear kakien ir ñan air “kwalok ñõn armij rõn.” (Jerbal 10:42) Ejja kien eo wõt ej jerbal ñan kij, bwe ej wãwen eo wõt jenaj maroñ kõmman ri kalor ro. (Mat. 28:19, 20) Jen kõmman joñan ad maroñ bwe en let wãwen eo jej kõtõbrak jerbal in kwalok nan eo ad.—2 Tim. 4:5.