KAL̦APL̦O̦K AM̦ JEL̦Ã KWAL̦O̦K NAAN
Kilen bwe En Em̦m̦anl̦o̦k Wõt Ad Kwal̦o̦k Naan—Kõpooj Naan ko Am̦ Make
UNIN AN AORÕK KÕL IN: Meñe ewõr kadede waanjoñak ko rem̦m̦an kõn kilen lel̦o̦k bok ko ilo bokin katak in ad, bõtab men kein rej baj waanjoñak wõt ñan jipañ kõj. Em̦m̦an ñe kwõj kõjerbal naan ko am̦ make. Bõlen, em̦m̦an ippam̦ kõjerbal jet naan ko roktak ak bõlen kokõn̦aan bar kõnono kõn juon iaan katak ko ilo bok eo me enaaj l̦apl̦o̦k an kãitoklimoik armej ro ilo jikin eo. Ta eo emaroñ jipañ eok ñan jel̦ã make ejaak am̦ naanin ijjino? Eokwe ãlikin am̦ riiti juon Naan in Keeañ im lale waanjoñak ko kar jei kõn kilen lel̦o̦ke bok in, bareinwõt ãlikin am̦ alwõje pija eo ej kwal̦o̦k kilen ad lel̦o̦k bok ko, kiiõ kwõmaroñ l̦oore wãween kein itulal̦.
KILEN KÕM̦M̦ANE:
Kajjitõk ippam̦ make, ‘Ikõn̦aan ke kõjerbal juon iaan waanjoñak ko kõn kilen lel̦o̦k bok ko?’
AET
Kõpooj naanin ijjino ko am̦. Ãlikin am̦ kwal̦o̦k naanin yokyokwe ko, kwõmaroñ kwal̦o̦k jidik kõn unin am̦ kar etal. (Ñan waanjoñak: Kwõmaroñ ba: “Unin aõ kar jibadektok eok ej kõnke . . . ”)
L̦õmn̦ak kõn ta ko kwõmaroñ ba m̦okta jãn am̦ kwal̦o̦k kajjitõk eo, im kwal̦o̦k eoon eo, im kwal̦o̦k kõn kein lel̦o̦k eo. (Ñan waanjoñak: Ñe kwõj itõn kwal̦o̦k eoon eo, kwõmaroñ ba, “Jemaroñ lo uwaakin kajjitõk in ilo eoon in.”)
JAAB
Kããlõt juon katak em̦m̦an ippam̦ ilo bok eo im enaaj kãitoklimoik armej ro ilo jikin eo
L̦õmn̦ak kõn juon kajjitõk me enaaj kõm̦akũt rũm̦weo ñan kwal̦o̦k l̦õmn̦ak eo an im kõn̦aan bwebwenato ippãd. Kõjparok bwe kwõn jab kwal̦o̦k kajjitõk ko renaaj kalel im kajook rũm̦weo. (Ñan waanjoñak: Bwe en kwal̦o̦k l̦õmn̦ak eo an, kwõmaroñ kwal̦o̦k juon iaan kajjitõk ko rej pãd ilo peij 2 ilo Naan in Keeañ eo.)
Kããlõt juon eoon bwe kwõn kab riiti. (Ñe kwõnaaj kwal̦o̦k kõn Awake! eo, am̦ pepe ñe kokõn̦aan riiti juon eoon ak jaab, kõnke bok in kar kõm̦m̦ane ñan ro jidik wõt aer jel̦ã kõn Baibõl̦ im bõlen rejjab tõmak im lõke jabdewõt kabuñ.)
Kõpooje juon ak ruo jãntõj me ej kwal̦o̦k ewi wãween an naaj rũm̦weo bõk tokjãn jãn katak eo ñe enaaj riiti
MEÑE AET AK JAAB
Kõpooj juon kajjitõk kadede ñan am̦ naaj jepl̦aak in uwaake tokãlik
Je men ko komiro ar kõnnaan kaki ñan kakeememej eok kõn men ko kwõnaaj ba ñe kwõbar jepl̦aak