Ijjibed jen Ro Mõttam im Jerammõn eo Am ñan Kwalok Nan
1 Ijjibed eo an ro mõttam ej juõn kilan ekajur—ñan emõn ak ñan nana. Ri karejar ro mõttad karejaran Jehovah rej juõn kilan emõn me ej kamakit kij ñan kõmman jerbal in Christian ko remõn. (Hib. 10:24) Bõtab, ro uan family eo me rejjab ri Kennan ro, ri jerbal ro mõttad, ri school ro mõttad, ro ri turid, ak ro jet mõttad remaroñ jibed kij ñan lor juõn ial me ej nae kien ko an Christian. Remaroñ konono “nae [ad] etetal emõn ilo Kraist.” (1 Pit. 3:16) Ewi wãwen jemaroñ wõnmanlok ilo bebe eo ad ñan kwalok wõt nan meñe jemaroñ jelmae ijjibed eo enana jen ro mõttad?
2 Ro Uan Family eo: Jet ien, leo belen im jemen eo ejjab juõn ian ri Kennan ro an Jehovah emaroñ jab kõnan bwe lio ibben im ro nejin ren bõk kunair ilo jerbal in kwalok nan. Wãwen in ear eindein ibben juõn family ilo Mexico. Lio belen juõn emaan im jiljilimjuõn nejin rar deloñ ilo mol eo. Ilo jinoin ear jumae kinke ear jab kõnan bwe ro uan family eo an ren kwalok nan im lelok book in Bible ko jen em ñan em. Ear eñjake bwe jerbal in ear juõn jerbal ettã. Bõtab, lio belen im ajiri ro rar jutak bin ilo bebe eo air ñan karejar ñan Jehovah im ñan keini air bõk kunair ilo jerbal in kwalok nan. Tokelik, leo ear jino kile aorõkin an bõk karõk eo an Anij kin jerbal in kwalok nan, im e bareinwõt ear wujleplok an mour ñan Jehovah. Ear bõk 15 yiõ ko ñan an leo bõk mol eo, ak enaj kar ke elañe family eo an ear jab kijenmij ilo jerammõn eo air ñan kwalok nan?—Luk 1:74; 1 Kor. 7:16.
3 Ri Jerbal ro Mõttad: Jet remaroñ jab mõnõnõ kin jibadbad ko am ñan kwalok nan ibben ri jerbal ro mõttam. Juõn sister ear kwalok bwe ke juõn bwebwenato kin jemlokin lal ear walok ilo office eo an, rar kajirere kake e kinke ear rejañ ir bwe ren read Matthew katak 24. Bõtab, jet ran ko tokelik, juõn ian ri jerbal ro mõttan ear ba bwe ekar readi katak eo im ear bwilõñ kake. Ear lelok juõn book ñan e, im karõk ñan kõmman juõn Bible study ibbeirro leo belen. Katak eo mokta ear bed ñan ruo awa jibboñ tata. Elikin katak eo kein kajilu, rar jino bed ilo kwelok ko, im ejjabto tokelik rar jolok air kajerbal tobacco im rar bõk kunair ilo jerbal in kwalok nan. Men in enaj kar walok ke elañe sister eo ear jab kõmman jibadbad ko ñan jaketo-jaketak kejatdikdik eo an ibben ro jet?
4 Ri School ro Mõttad: Ejjab jeja an ri Kennan jodikdik ro iion ijjibed ko jen ro mõttair ilo school im ñan mijak bwe jodikdik ro jet renaj kajirere kake ir kin air bõk kunair ilo jerbal in kwalok nan. Juõn ri Christian jodikdik ilo United States ear ba: “Iar mijak in kwalok nan ibben jodikdik ro jet kinke iar mijak bwe renaj kajirere kake iõ.” Inem jiroñ eo ear jab kortokjen ien ko remõn ñan kwalok nan ibben ro mõttan ilo school im ilo territory eo. Ewi wãwen kwomaroñ kaddeklok kajur eo ñan anjo ion ijjibed ko jen ro mõttam? Liki Jehovah, im bukõt an buñburuen kake yuk. (Ken. 29:25) Kwon juburu kin maroñ eo am ñan kajerbal Nan eo an Anij ilo jerbal in kwalok nan eo am. (2 Tim. 2:15) Jodikdik eo me kar eliji nan ko an ilañ ear jino an jar ñan Jehovah, im kajitõk ibben ñan jibañ e kaddeklok kõnan eo ñan konono ibben ri school ro mõttan. Ear jino kwalok nan ilo jabdewõt ien emõntok ilo school, kar bõk tokjen ko remõn, im ejjabto tokelik ear konono ibben aolep armij. Ear kajemlok: “Jodikdik rein rej aikwij im rekõnan juõn kejatdikdik emõn kin ilju im jeklaj, im Jehovah ej kajerbal kij ñan jibañ ir.”
5 Ro Ri Turid: Emaroñ wõr jet ri turid ak ro jet jej jelã kajjiir me rej kwalok air abõnõnõ nae kij kin wõn eo jej jutak ikijen im kin tõmak ko ad. Elañe kwoj mijak kin ta eo rej lemnake, kajitõk ibbam make: ‘Rej jelã ke kin mol eo ej tellok ñan mour indio? Ta eo I maroñ kõmmane ñan tõbar burueir?’ Juõn circuit overseer ear lo bwe tokjen ko remõn rej walok ñe ej keini ak ejjab lap ad kwalok nan ñan ri turid. Akwelap ibben Jehovah kin kajur im meletlet kwoj aikwiji ñan wõnmanlok im bukõt ro emol burueir.—Pil. 4:13.
6 Ad ebwer iumin ijjibed eo enana an ro mõttad emaroñ kabuñburuen ri jumae ro, ak enaj ñan tokjen eo air ke?—ak ñan tokjen eo ad? Armij ro ilo bukwon eo make an Jesus rar jumae e. Ear aikwij kijenmij kin nan ko rekkañ an ro jatin. Ak ear jelã bwe wãwen eo wõt enaj maroñ jibañ ir ej ikijen an tiljek wõt ilo ial eo Anij ear likiti ñan e. Kin men in, Jesus ear “kijenmij kin konono nana an ri jerawiwi ro nae tokjen ko air make.” (Hib. 12:2, 3) Jej aikwij kõmman ejja einwõt. Kwon beek ilo buruõm ñan kortokjen jerammõn eo am ñan kwalok kin ennan in Ailiñ eo. Ilo am kõmmane, “kwo naj mõke lomoren yuk, kab ro rej roñjake yuk.”—1 Tim. 4:16.