Kwomaroñ Kwalok Nan ilo Jabrewõt Ien Emõntok!

1. (a) Ta melelen kwalok nan ilo jabrewõt ien emõntok? (b) Jete oran ro rej ber ilo kwelok in rar lo mol eo ikijen wãwen in?

¹ Ilo congregation eo am, jete oran ro rar lo mol eo ikijen an juõn kar kwalok nan ñõn ir ilo jabrewõt ien emõntok? Bwelen kwomaroñ bwilõñ kin uak eo. Kwalok nan ilo jabrewõt ien emõntok ej kitibuj ar kwalok kin nuuj eo emõn ñõn armij ro jej iion ir ilo makõtkit ko ar ran otemjej, einwõt ilo ien ko jej itoitak, lolok ro nukid ak ro dri turid, ak kaikujkuj, im bareinwõt ñe jej ber ilo jikuul, jikin jerbal, im jikin ko jet. Ilo juõn kumi im elõñlok jen 200 dri Kennan ro emwij air baptais, 40 bõjjããn in rein rar lo mol eo ikijen an kar juõn kwalok nan ñõn ir ilo jabrewõt ien emõntok! Kin men in, elap an keie ñõn kwalok nan ilo wãwen in.

2. Ta joñok ko jej loi ilo Baibel eo kin kwalok nan ilo jabrewõt ien emõntok?

² Ilo ien ko an dri Kristian ro jinoin, ekkã an kar dri kwalok ro kwalok nan ilo jabrewõt ien emõntok. Ñõn wanjoñok, ilo ial eo air lok ñõn Sameria, Jisõs ear kwalok nan ñõn juõn kõra eo ear itõk dren ilo aibijlõl eo an Jekõb. (Jon 4:6-26) Pilip ear jino juõn bwebwenato iben juõn dri utiej in Itiopia eo ear riit jen buk eo an Aiseia ilo an kar kajitõk: “Kwoj melele ke men eo kwoj konono kake?”(Jerb. 8:26-38) Ke dri jilik Paul ear kalbuj ilo Pilippai, ear kwalok nan ñõn eo ej dri lale prisõn eo. (Jerb. 16:23-34) Tokelik, ke ear kalbuj ilo juõn im, Paul ear “bõk ir otemjej rej dreloñ ñõn iben, im ej kwalok ailiñ in Anij, im katakin men ko kin Iroij Jisõs Kraist.” (Jerb. 28:30, 31) Inem kwe bareinwõt kwomaroñ kwalok nan ilo jabrewõt ien emõntok meñe kwoj juõn eo ejokok. Ewi wãwen?

3. Ta eo emaroñ jibõñ kij ñõn anjo ion ar ejokok?

³ Wãwen Ijjino: Elõñ iar jej lo bwe ebin ñõn jino bwebwenato iben ruwamaejet ro. Meñe ro jejela kajeir, ak emaroñ bin ñõn ar konono kin mol eo ibeir. Bõtab, elañe jej kalomõnlokjen kin emõn eo an Jeova, katak ko raurõk ear litok ñõn dri korijer ro an, im wãwen ber eo ekaburomõjmõj an armij ro ilo lõl, men in enaj kamakõt kij ñõn ar konono kin mol eo. (Jona 4:11, UBS; Sam 40:5; Matu 13:52) Bareinwõt, jemaroñ kajitõk iben Jeova bwe en jibõñ kij ñõn “beranlok.”(1 Tes. 2:2) Juõn brother eo ear jikuul ilo Giliad ear ba: “Ekkã aõ lo bwe elap an jar jibõñ iõ ñe ej bin aõ konono iben armij ro.” Elañe kwoj ãliklik in konono kin mol eo, ilo tukaru kwon jar ibõm mõke.​—Nih. 2:4.

4. En ta mejenkajik eo ar jinointata, im etke?

⁴ Ejjab juõn menin aikwij ñõn ijjino bwebwenato eo kin juõn nan in kebellok ak juõn eon ñe jej kwalok nan ilo jabrewõt ien emõntok. Jemaroñ lo bwe enaj laplok an jibõñ ñe jej kõmõn bwe en mejenkajik eo ar ñõn ijjino bwebwenato ko im jab bõk lemnok eo bwe jej aikwij konono kin mol eo ilo ien eo wõt. Elõñ dri kwalok nan ro rar kwalok bwe air kõmõne men in ear kaberan ir ñõn jidrik kin jidrik bõkmantak kin nuuj eo emõn. Elañe armij eo ejjab kõnan bwebwenato, inem kwon jab jibede bwe en wõnmanlok wõt im konono ibõm. Ilo joij, kwon kajemlok bwebwenato eo.

5. Ta eo ear jibõñ juõn sister ejokok ñõn an kwalok nan ilo jabrewõt ien emõntok?

⁵ Ke juõn sister ejokok ear kaikujkuj, moktata ear reilok ñõn armij ro im ettõñdrikdrik ñõn ir. Elañe armij eo ej bar ettõñdrikdrik ñõn e, inem sister in ej kennanlok ñõn e. Im elañe armij eo ej mõnõnõ in bwebwenato, men in ej kaberan e ñõn wõnmanlok wõt ilo bwebwenato eo. Sister in ej kanuij roñjake im kajeoñ in lale ewi ian katak ko kin nuuj eo emõn emaroñ kaitoklimoik armij eo. Ilo an kwalok nan ilo wãwen in, sister in ear maroñ likit elõñ buk ko im ear bareinwõt jino katak Baibel iben juõn armij.

6. Ewi wãwen jemaroñ jino juõn bwebwenato ilo jabrewõt ien emõntok?

⁶ Ijjino Bwebwenato Ko: Ta eo jemaroñ ba ñõn ijjino juõn bwebwenato? Ke Jisõs ear bwebwenato iben kõra eo ilo aibijlõl eo, ear jino ilo an kar kajitõk iben bwe en lelok limen dren. (Jon 4:7) Inem jemaroñ jino juõn bwebwenato kin juõn nan in yokyokwe ak kajitõk. Ilo ien eo kwoj konono iben armij eo, kwomaroñ lo juõn ien ebellok ñõn am bõkmantak juõn katak jen Baibel eo im bwelen kwonaj jeor ine in mol eo. (Ekk. 11:6) Jet rar lo tõbrõk ilo air kwalok nan ko rekaitoktoklimo im remaroñ kamakõt armij ro ñõn kwalok kajitõk ko. Ñõn wanjoñok, ke kwoj kõtar taktõ eo, kwomaroñ jino juõn bwebwenato ilo am ba, “Inaj lukkun mõnõnõ ñe ijamin bar nañinmij.”

7. Ewi wãwen ar lale ta ko rej walok ibelakir emaroñ jibõñ kij ñõn kwalok nan ilo jabrewõt ien emõntok?

⁷ Ar lale ta ko rej ber ibelakir enaj bareinwõt jibõñ kij ñõn jino juõn bwebwenato. Elañe jej lo juõn jemen ak jinen iben ajiri ro nejin im emõn mwiliir, jemaroñ nebar e im kajitõk, “Ta eo ear jibõñ yuk ñõn lo tõbrõk einwõt juõn jemen ak jinen?” Juõn sister ej lale ta eo ro jet ilo jikin jerbal eo an rej konono kake, inem ej kwalok ñõn ir jet katak ko rejejit ñõn men ko dri jerbal ro mõtõn rej itoklimo kaki. Ke ear roñ bwe juõn kõra ilo jikin jerbal eo an ear lemnok in mare, ear lelok ñõn e buk eo etan Ruj! (Awake!) me ear konono kin wãwen kapojõk ñõn ran in mare eo. Men in ear tellok e ñõn an wõnmanlok wõt im konono kin katak ko jet ilo Baibel eo.

8. Ewi wãwen jemaroñ kajerbal buk ko ar ñõn jino juõn bwebwenato?

⁸ Bar juõn wãwen jemaroñ jino juõn bwebwenato ej ilo ar riiti buk ko ar ijoko ro jet remaroñ lo kij ie. Juõn brother ej kebellok Imõniaroñroñ ak Ruj! (Awake!) ñõn juõn katak ekaitoktoklimo im riiti. Elañe ej kile an juõn lale magazine eo, ej kwalok juõn kajitõk ak konono kin katak eo. Ekkã an men in tellok ñõn juõn bwebwenato im juõn ien emõn ñõn kwalok nan. Ilo ar likit buk ko ar ijoko aolep remaroñ loi, men in emaroñ kamakõt dri jerbal ak dri jikuul ro mõtar ñõn air kwalok kajitõk ko.

9, 10. (a) Ewi wãwen jemaroñ bukot ien ko rebellok ñõn kwalok nan ilo jabrewõt ien emõntok? (b) Ewi wãwen kwar maroñ kõmõne men in?

⁹ Bukot Ien ko Rebellok: Kin ar kile aurõkin jerbal in kwalok nan eo, jen kar jab watõk jerbal in kwalok nan ilo jabrewõt ien emõntok einwõt juõn men ej jirullok im walok. Jen men in, jej aikwij bukot ien ko rebellok ñõn kwalok nan ke jej kõmõni makõtkit ko ar jen ran ñõn ran. Lemnoklok iman kin armij ro kwonaj iion ir, im lemnok kin wãwen eo kwomaroñ jino juõn bwebwenato. Bõk Baibel eo ibõm im bareinwõt buk ko me kwomaroñ lilok ñõn ro rej kwalok air itoklimo.​—1 Pit. 3:15.

¹⁰ Elõñ dri kwalok nan ro rekabel ilo air bukot wãwen ko rebellok ñõn kwalok nan ilo jabrewõt ien emõntok. Juõn sister ear kajerbal jikin ikkure eo an building eo ej jokwe ie ñõn ikkure kin puzzle ko me pija ko ie raibujuij. Ñe armij ro rej bwijrõk im konono iben kin an aibujuij pija ko, ej kajerbal ien in ebellok ñõn an jino juõn bwebwenato im kwalok ñõn ir kin kalimur eo ilo Baibel kin “lõñ ekãl im lõl ekãl.”(Rev. 21:1-4) Kwomaroñ ke lemnok kin wãwen ko kwomaroñ kajerbali ñõn kebellok juõn ien emõn ñõn am kwalok nan ilo jabrewõt ien emõntok?

11. Ewi wãwen jemaroñ bar jeblak iben armij eo ear itoklimo in roñjake ke jar kwalok nan iben ilo jabrewõt ien emõntok?

¹¹ Jeblak Iben Eo Ej Itoklimo: Elañe kwoj iion juõn eo ej mõnõnõ in roñjake, kajeoñ in kõmõn bwe kwon bar jeblak iben. Elañe ekkar, kwomaroñ ba ñõn armij eo: “Iar lukkun mõnõnõ in bwebwenato ibõm. Ia eo imaroñ tõbar yuk bwe kijro en bar bwebwenato?” Jet dri kwalok nan ro rej lelok address im nõmba in telephone eo air ñõn armij eo im ba: “Imõnõnõ in kar bwebwenato ibõm. Elañe kwokõnan kalaplok am melele kin men eo kijro ar bwebwenato kake, kwomaroñ tõbar iõ ilo address in ak nõmba in.” Elañe kwojjab maroñ jeblak iben armij eo ear kwalok an itoklimo, kwomaroñ kanne peba eo Please Follow Up (S-43) im lelok ñõn secretary eo an congregation eo am.

12. (a) Etke jej aikwij kadreloñ ilo report eo ar aolep auõ ko jej joloki ñõn kwalok nan ilo jabrewõt ien emõntok? (b) Ta tõbrõk ko rar walok jen jerbal in kwalok nan ilo jabrewõt ien emõntok? (Lale box eo “Tõbrõk ko jen Kwalok Nan ilo Jabrewõt Ien Emõntok!”)

¹² Jej aikwij kadreloñ ilo report eo ar auõ ko jar joloki ñõn kwalok nan ilo jabrewõt ien emõntok. Kin men in, jei aolep auõ ko kwar joloki, meñe emaroñ kar jejjo wõt minit ko. Lemnok mõk kin men in: Elañe aolep dri kwalok nan ro rar kwalok nan ilo jabrewõt ien emõntok iomin lailim minit kajjojo ran, ñe jenaj kobaiki aolep jenaj tõbar elõñlok jen 17 million auõ ko kajjojo aliñ!

13. Ta eo ej aikwij kamakõt kij ñõn ar kwalok nan ilo jabrewõt ien emõntok?

¹³ Eor iber un ko relap ñõn ar kwalok nan ilo ien ko remõntok, im ej kin ar yokwe Anij im ro dri turid. (Matu 22:37-39) Ar kamolol kin karkar ko karkarin Jeova im karõk ko an ej kamakõt kij ñõn ar konono kin “aibujuij in utiej eo An.” (Sam 145:7, 10-12) Ar lukkun kea kin ro dri turid ej kamakõt kij ñõn ar kortokjen aolep ien ko rebellok ñõn ar kwalok kin nuuj eo emõn ñõn ir ke ej or wõt ien. (Rom 10:13, 14) Ilo ar karõklok iman im kapojõk, kij aolep jemaroñ kwalok nan ilo ien ko remõntok im bwelen jenaj lo lõñliñ ilo ar kwalok kin mol eo ñõn juõn eo emol buruen.

[Kamelele ilo peij 4]

Kwomaroñ lo bwe elap an jibõñ ñe kwoj kõmõn bwe en am mejenkajik ñõn iion armij ro im jino bwebwenato ibeir.

[Kamelele ilo peij 5]

Elõñ dri kwalok nan ro rekabel ilo air bukot wãwen ko rebellok ñõn kwalok nan ilo jabrewõt ien emõntok

[Box ilo peij 5]

Nan in Rejañ ko ñõn Jino Bwebwenato ko

◼ Jar kin jibõñ bwe kwon maroñ jino bwebwenato eo

◼ Kãlet ro im rejoij im rejjab ekkaiurir

◼ Mokta reilok ñõn ir, ettõñdrikdrik, im konono kin juõn men komro jimor ej itoklimo kake

◼ Kwon kanuij roñjake

[Box ilo peij 6]

Tõbrõk ko jen Kwalok Nan ilo Jabrewõt Ien Emõntok!

• Ke juõn brother ear kõtar air kõmõne wa eo waan ilo mõn kõmõn wa ko, ear kwalok nan ñõn armij ro ijo im lelok ñõn ir peba in kir eo ñõn juõn katak ilo kwelok eo elap. Ilo juõn kwelok elap ilo yiõ eo tok juõn, juõn brother ear kebake brother in im karuwaineneik e. Brother eo ear kebake e ear juõn ian lõmaro ear lelok peba in kir eo ñõn ir ilo mõn kõmõn wa ko ilo yiõ eo lok! Brother in me kar kwalok nan ñõn e ear etal im roñjake katak eo ilo kwelok eo elap im ear kajitõk elañe juõn emaroñ katak Baibel iben. Kiõ, emwij airro lio belen baptais.

• Juõn sister eo ear lo mol eo ilo an kar juõn kwalok nan ñõn e ilo jabrewõt ien emõntok ej kwalok nan ñõn armij ro ej iion ir ikijen ajiri ro jilu nejin. Rein rej kitibuj ro dri turin, ro jemen im jinen ajiri ro ej iion ir ilo jikuul im kwelok ko an ro jemen im jinen ilo jikuul. Ñe sister in ej kwalok kajen ñõn ro jet, ej kwalok jen buruen bwe Baibel eo elap an jibõñ e ñõn katakin ajiri ro nejin, inem ej wõnmanlok im konono kin bar juõn men. Ak kinke ear ijjino juõn bwebwenato, ear lo bwe elap an biruru ñõn an kiõ bõkmantak katak ko ilo Baibel eo tokelik ilo bwebwenato eo. Ilo an kõmõne men in, ear jibõñ 12 armij ro im rar baptais.

• Ke juõn dri wia kake insurance ear lolok juõn sister, sister in ear kajerbal ien in ebellok ñõn an kwalok nan. Ear kajitõk iben leo elañe ear kõnan bwe en emõn ejmour eo an, bõk juõn mour elemõnõnõ, im mour ñõn indrio. Leo ear uak im ba aet im ear kajitõk iben sister eo kain insurance rõt eo ear konono kake. Sister in ear kwalok ñõn e kalimur ko ilo Baibel im ear lelok juõn ian buk ko ar me lein ear riiti iomin juõn wõt boñ. Kar karõk bwe juõn en katak Baibel iben. Im ear jino ber ilo kwelok ko im tokelik ear baptais.

• Ke juõn sister ear ber ilo juõn balun, ear jino bwebwenato iben kõra eo me ear jijõt iturin im ear maroñ kwalok nan ñõn e. Ke balun eo ear iten jok, sister eo ear lelok ñõn kõra eo address im nõmba eo an im ear rejañ e bwe en kajitõk bwe juõn en katak Baibel iben ñe Dri Kennan ro an Jeova renaj kwalok nan ilo mweo imõn. Ilo ran eo tok juõn, ruo sister rar kwalok nan ilo mweo imõn kõra in. Kõra eo ear jino katak Baibel eo, ear mõkõj an kõmõn wõnmanlok ko, ear baptais, im ejjabto ear or jilu an dri katak Baibel.

• Juõn brother 100 yiõ ridtõn im ebilo, eo ej jokwe ilo mweo imõn ridto ro, ekkã an ba, “Jej aikwiji Ailiñ eo.” Men in ear kamakõt nurse ro im ridto ro jet ñõn air kwalok kajitõk ko ñõn e, im ear tellok e ñõn an kemelele kin ta in Ailiñ eo. Juõn ian kõra ro ej jerbal ijo ear kajitõk iben kin ta eo enaj kõmõne ilo Paredais. Ear uak im ba, “Inaj maroñ lo im bar etetal im inaj tile waan bwilbwil eo aõ.” Kinke brother in ebilo, ear kajitõk iben kõra in bwe en riiti magazine ko ñõn e. Ke ledrik eo nejin lõlap eo ear lotok e, dri jerbal eo ear kajitõk iben elañe emaroñ bõk magazine ko iben ñõn mweo imõn. Juõn nurse ear ba ñõn ledrik eo nejin, “Unin tel eo ekãl an mwen imõn ridto ro ej: ‘Jej aikwiji Ailiñ eo.’”

• Juõn sister ej kõtar ilo juõn mõn mõña ear roñ an jet lõlap ro konono kin abañ ko kin kien. Juõn iair ear ba bwe kien eo ejjab maroñ kamarmiri abañ ko. Sister eo ear ba ñõn e mõke, ‘Eñin juõn ien ebellok.’ Ear jar ilo tukaru im ear kebake ir. Elikin an kar kwalok kajen, ear kwalok ñõn ir kin juõn kien me enaj kamarmiri aolep abañ ko an armij ro, Ailiñ eo an Anij, im ear lelok ñõn ir juõn brochure. Ejjabto booj eo an mõn mõña eo ear kebake ir. Sister eo ear lemnok bwe ear iten kajitõk iben bwe en drioij. Jen men in, ear jiroñ e bwe ear roñjake men eo rar konono kake, im bwe ear kõnan bar juõn an brochure. Bar juõn dri jerbal eo ear roñjake ear kebake ir im ear toor drenin mejen kin kemjalal. Dri jerbal in ear katak mokta iben Dri Kennan ro an Jeova im ear kõnan bar wõnmanlok im katak.