Kaibujuij Jehovah ilo Ad Kwalok Nan ilo Jabdewõt Ien Emõn Tok
1 Ri karejar ro retiljek an Jehovah rej bukõt ien ko remõn ñan kaibujuij e kajjojo ran. (Sam 96:2, 3; Hib. 13:15) Juõn wãwen jemaroñ kõmmane men in ej ilo ad kwalok nan ilo jabdewõt ien emõn tok. Elõñ ri kabuñ ro an Jehovah rainin rej kamolol bwe juõn armij ear kwalok ñan ir kin ennan in Ailiñ eo ikijen kwalok nan ilo jabdewõt ien emõn tok.
2 Kwalok nan ñan armij ilo jabdewõt ien emõn tok ekkã an kabellok ial eo bwe ro jet ren roñ kin ennan in Ailiñ eo. Ñan wanjoñok, bwebwenato eo an Jesus ibben juõn kõrã in Samaria ilo aebõj eo an Jacob ear tellok ñan an elõñ armij itoklimo kin news eo emõn. (Jon 4:6-30, 39-42) Ke Paul im Silas rar kalbuj ilo Philippi, rar kwalok nan ñan ri lale prison eo, im aolepen family eo an rar bõk mol eo.—Jerbal 16:25-34.
3 Ien ko Remõn: Ta ien ko remõn ewõr ibbam ñan kwalok nan ilo jabdewõt ien emõn tok? Jet rej kõmmane ñe rej kaikujkuj, uwe ilo taxi ak bus, ak kõttar ilo jikin doctor. Ro jet remaroñ kwalok nan ilo ien kakije ilo jikin jerbal eo ak ilo school. Ilo an wõr book in Bible ko ad ilo juõn jikin ebidodo an armij ro maroñ loi emaroñ kamakit ro jet ñan kajitõk kin tõmak ko ad.—1 Pit. 3:15.
4 Wãwen eo ñan Jinoe: Juõn ledik ejookok jiljilimjuõn an yiõ ear roñ ilo juõn kwelok bwe elap an aorõk bwe aolep ren kwalok nan. Inem ke ear kaikujkuj ibben jinen, ear likit ruo brochure ko ilo ieb eo an. Ke jinen ear boub ilo jikin kõllã mweiuk ko, ledik eo ear lelok juõn brochure ñan juõn kõrã, eo ear mõnõnõ in bõke. Ke kar kajitõk ibben kin ewi wãwen ear bõk kajur eo ñan kebak kõrã eo, ledik in ejookok ear uak: “Iar baj ba ñan ña make, Bojak, Etal! Im iar etal im kõmmane!”
5 Ñan kwalok nan ilo jabdewõt ien emõn tok, kij aolep jej aikwiji juõn jitõb in mõnõnõ einwõt ledik eo. Ta eo emaroñ jibañ kij? Jar kin kajur eo ñan konono ilo beran. (1 Tess. 2:2) Keboj juõn kajitõk ak juõn uak kin juõn katak ekaitoktoklimo me kwomaroñ kajerbale ñan jino juõn bwebwenato. Inem liki bwe Jehovah enaj kajerammõn jibadbad ko am.—Luk 12:11, 12.
6 Kwalok nan ilo jabdewõt ien emõntok ñan armij ro jej iion ir kajjojo ran ej bõktok nebar ñan Jehovah im ej kalañliñ kij. Emaroñ jibañ juõn armij ñan jino an etetal ilo ial eo ñan mour indio.