Jej Dri Kennan Ien Otemjej
1. Ta eo jej katak jen bwebwenato eo kin an kar Jisõs kennan iben kõra eo iturin aibij lõl eo?
1 Jisõs ear etetal iomin elõñ auõ ko. Ear mõk im maro. Ke dri kalor ro an rar ilen wiaik mõña ko, ear jijõt iturin juõn aibij lõl ilikin juõn jikin kwelok ilo Sameria bwe en kakije. Jisõs ear jab ber ilo Sameria bwe en kwalok nan, ak ear dribloke ilo an jibarek Galili bwe en kwalok nan ie. Mekarta, ear kajerbal ien in bwe en kwalok nan iben juõn kõra eo ear iten itõk dren. (Jon 4:5-14) Etke? Kinke jerbal eo an Jisõs einwõt juõn ‘dri kennan etiljek im emol” an Jeova ear jab bwijrõk. (Rev. 3:14) Jej kajeoñwe Jisõs ilo ar kennan kin Jeova ien otemjej.—1 Pit. 2:21.
2. Ewi wãwen jemaroñ kapojõk ñõn kwalok nan ilo jabrewõt ien emõn tok?
2 Pojõk Wõt: Jemaroñ pojõk ñõn kennan ilo ar bok buk ko iber aolep ien. Elõñ dri kwalok ro rej bõk buk ko ibeir im rej lelok buk kein ñõn dri jerbal ro ilo mõn wia ko, dri jerbal ro ilo jikin eteñ gas, im jabrewõt armij me rej iione ilo ran eo. (Ekk. 11:6) Juõn jeer im jãter kõra im ekkã an ito itak ej lale aolep ien bwe ilo ieb eo an, en or juõn Baibel edrik kab buk eo Baibel Ej Katakin, im ej kajeoñ in bwebwenato iben ro rej jijõt iturin.
3. Ewi wãwen ar maroñ jino bwebwenato?
3 Jino Am Bwebwenato: Ñe jej kwalok nan ilo jabrewõt ien emõn tok, jejjab aikwij jino ilo ar konono kin Baibel eo. Ke Jisõs ear bwebwenato iben kõra eo iturin aibij lõl eo, ear jab jino an bwebwenato iben ilo an kwalok bwe e Messaia eo. Ear baj kajitõk kin limen aibij, im ilo wãwen in ear kworuj an lemnok. (Jon 4:7-9) Juõn jeer im jãter kõra ear lo bwe ilo an lor joñok in, ebiruru an jino bwebwenato iben armij ñe rej kajitõk iben elañe ear emõn an kar kememe juõn ian ran in kwojkwoj ko an lõl. Ijellokin an ba bwe ej juõn ian Dri Kennan ro an Jeova im ejjab bõk kwonan ilo kwojkwoj in, ej ba, “Emwij aõ bebe ilo buruõ bwe in jab bok kwonaõ ilo kwojkwoj in.” Enañin aolep ien armij eo ej itoklimo ekin kajitõk kin etke, im kõra eo emaroñ kennan ñõn e.
4. Etke nan ko ilo Mat. 28:18-20 rej kamakõt yuk?
4 Meñe emwij an kar Jisõs kwalok nan ijin ion lõl ilo kijejeto, elap wõt an kõnan bwe jerbal in kwalok nan en wõnmanlok wõt ilo wãwen eo ear kõmõne. (Matu 28:18-20) Inem, einwõt Jisõs eo ej Joñok eo ar, jej dri kennan ro im rej pojõk jabrewõt ien ñõn kwalok ilobwilij kin tõmak eo ar.—Hib. 10:23