Kilen bwe En Em̦m̦anl̦o̦k Wõt Ad Kwal̦o̦k Naan—Jino Kõnnaanl̦o̦k ñan Armej ro Jabdewõt Iien bwe Jen Kwal̦o̦k Naan Ippãer

Unin an Aorõk Kõl In: Ñe jej em̦ ñan em̦, elukkuun jejja armej rej pãd ilo m̦õko im̦weer. Bõtab, jemaroñ iioon er ñe jej uwe ilo baj ak tããkji ko, ñe jej kõttar ilo aujpitõl̦, ñe jej kakkije ilo jikin jerbal ak jikin jikuul̦, im bar jikin ko jet. Ej ankilaan Jeova bwe aolep armej ren roñ kõn nuuj eo em̦m̦an kõn Aelõñ eo an Anij. (1 Ti. 2:3, 4) Kõn men in, bwe en maroñ pel̦l̦o̦k juon iien ñan ad kwal̦o̦k naan ippãn armej ro, kõj eo jinoin jej aikuj kõnnaanl̦o̦k ñan er.

Kilen Kõm̦m̦ane:

Kwal̦o̦k lol̦o̦kjen̦. Armej eo ejouj ke im ekõn̦aan ke bwebwenato? Em̦m̦an ke iien eo ñan lukkuun bwebwenato? Jet rukwal̦o̦k rej reilo̦k ñan armej eo im baj ettõñdikdik ñane. Ñe armej eo ej bar ettõñdikdik l̦o̦k ñan er, rej kiiõ kajjioñ jino kwal̦o̦k naan ippãn.
Jar ilo tukadu, ak jar ilo bũruod bwe Jeova en kaperan kõj ñe jej ikkũm̦kũm̦.—Nih. 2:4, UBS; Jrb. 4:29.
Jino kõnnaanl̦o̦k ñan er, bõlen ilo ad baj ba yokwe. Ke Jijej ear iioon kõrã in Sameria eo, ear jab jino kõnnaanl̦o̦k ippãn ilo an kwal̦o̦k naan kõn Aelõñ eo an Anij. (Jon 4:7) Jet iien jemaroñ jino ad kõnnaanl̦o̦k ñan armej ro ilo ad nõbar er im ba: “Elukkuun em̦m̦an m̦wilin ajri ran̦e nejũm̦!” Ak jemaroñ baj kwal̦o̦k juon kajjitõk im ba: “Kwaar ke roñ kõn men eo enana ear wal̦o̦k boñ?”
Ñe armej eo ej jino an bwebwenato im kwal̦o̦k l̦õmn̦ak ko an, kwõn pukot ta ko kwõmaroñ ba ñan am̦ jino kwal̦o̦k kõn nuuj eo em̦m̦an ñane. Bõtab, jab kaiur im kõm̦m̦ane men in. Komiro en baj wõnm̦aanl̦o̦k wõt im bwebwenato bajjek. Tokãlik, bõlen kwõmaroñ ba ñane kõn juon men me enaaj kãitoklimoen im kõm̦m̦an menin an kwal̦o̦k waj juon kajjitõk. Ñan waanjoñak, ñe komiro ar bwebwenato kõn baam̦le, kwõmaroñ ba, “Iar riiti jet naan in kakapilõk ko rem̦m̦an im remaroñ jipañ ro ewõr nejier kõn kilen aer lale im katakin ajri ro nejier!” El̦aññe kwõj kwal̦o̦k kõn men eo enana ear wal̦o̦k, kwõmaroñ ba, “Enañin aolep iien jej roñ kõn men ko renana rej wal̦o̦k, ak ewõr juon men em̦m̦an iar riiti im bõlen enaaj bar em̦m̦an ippam̦.” Jab ebbeer el̦aññe kwaar jab maroñ kwal̦o̦k naan ippãn kõn an m̦õkaj an jem̦l̦o̦k amiro bwebwenato.
Ebbõk kadede tũrããk ak bok ippam̦ bwe kwõn maroñ nãj lel̦o̦k ñan armej ro rej kwal̦o̦k aer itoklimo.

Kõm̦m̦ane Men in Ilo Allõñ In:

Kajjojo wiik, kwõn kajjioñ l̦oore men in im jino kõnnaanl̦o̦k ippãn armej ro bwe kwõn maroñ kwal̦o̦k naan ippãer ilo jabdewõt iien epel̦l̦o̦k.