Manit ko Remõn—Kadkad eo Kadkadin Armij ro an Anij
1 Manit ko remõn rejeja rainin. Etke ej eindein? Kin an armij kakaiuriur ejeja air lemnak kin manit ko rejoij, einwõt ñan ba “Joij,” “Komoltata,” ak “Jolok Bwid.” Nan in Anij ear kanan bwe manit an armij naj nana lok ilo ran ko eliktata ke ear ba bwe armij renaj ‘anij lo burueir, ri jualõñlõñ, ri jua, ro rejjab kamolol, ro rejjab yokwe ro nukiir, ro rejjab kõmmanwa, ro rej dike emõn, im ro re mõlkaro.’ (2 Tim. 3:1-4) Kadkad kein aolep rej kõmman manit ko renana. Einwõt armij ro remijak Anij, Ri Christian ro rej aikwij kejbãrok bwe ren jab bõk lemnak in jab kautiej an lal in.
2 Ta in Manit ko? Jemaroñ kamelele kin manit ko remõn einwõt jelã kin eñjake ko an ro jet, im maroñ eo ñan mour ibben ro jet ilo ainemõn. Jet ian wãwen ko kin manit ko remõn rej jelã kunan, joij, jelã kõppelok, im lemnak kin ro jet. Kadkad kein rej ejaak jen yokwe an armij eo kin Anij im ro ri turin. (Luk 10:27) Ejelok wõnãir, ak elap air aorõk ñan kakõmõnmõnlok kõtan eo ad ibben ro jet.
3 Jesus Christ ear likit joñok eo ewãppen. Ien otemjej ear jerbale Kien Gold eo: “Einwõt kom kõnan bwe armij ren kõmõn ñõn kom, en ein drein ami kõmõnmõn bareinwõt ñõn ir.” (Luk 6:31) Jejjab bwilõñ ke kin wãwen eo Jesus ear jerbal ibben ri kalor ro an ilo joij im yokwe? (Mat. 11:28-30) Manit ko an remõn rar jab itok jen kien ko kar jeje ilo book in manit ko remõn. Rar jarjar jen juõn buru emol im joij. Jej aikwij kajeoñ in anõk joñok eo an emõn.
4 Ñããt eo Ri Christian ro rej aikwij kwalok manit ko remõn? Ilo ien ko ejej uair wõt ke, ñe rekõnan kabwilõñ ro jet? Rej aikwiji ke ilo ien eo wõt rej kajeoñ in kareel ro jet? Jaab! Jej aikwij kwalok manit ko remõn ien otemjej. Ikijen wãwen ta ko jej aikwij lemnak kin men in ñe jej koba ibben don ilo congregation eo?
5 Ilo Kingdom Hall eo: Kingdom Hall eo ej jikin kabuñ eo ad. Jej bed ie kin an Jehovah Anij kir kij. Ilo wãwen in, jej einwõt ri lotok ro. (Sam 15:1) Jej ri lotok ro remõn ke ñe jej itok ñan Kingdom Hall eo? Jej lale ke ballid im baotokid? Emol jej aikwij kõnan bõprae ballid me re jabde ak le jen joñan. Meñe jej bed ilo convention ko ak ilo kwelok ko an congregation eo week otemjej, armij ro an Jehovah rej jelã kajjiir kin jejjet in baotokiir im rekkar ñan ro rej ba rej kautiej Anij. (1 Tim. 2:9, 10) Ilo wãwen in jej kwalok ad lemnak im kautiej ñan Iroij in kwojkwoj eo ad ilañ im ñan ri lotok ro jet me kar kir ir.
6 Bar juõn wãwen jej kwalok manit ko remõn ilo kwelok ko ej ikijen ad itok ilo mõkaj. Emol, men in ejjab bidodo ien otemjej. Jikin jokwe ko an jet armij remaroñ etolok jen mõn kwelok eo ak remaroñ aikwij keboj elõñ ro uan family eo. Bõtab, rar lo bwe ilo jet congregation ko enañin 25 percent in ri kwelok ro ekkã air itok elikin an mwij air al im jar. Men in ejjab juõn men in kejak. Jej aikwij kememej bwe manit ko rej kwalok ad lemnak kin eñjake ko an ro jet. Jehovah, Iroij in kwojkwoj eo ad ejoij, ear keboje kwojkwoj kein ilo jitõb kin tokjen eo ad. Jej kwalok ad kamolol im lemnak kin eñjake ko an ilo ad itok ilo mõkaj. Bareinwõt, ad rumijtok ñan kwelok ko ej kamad ro jet im ejjab kwalok ad kautiej ñan ro rej bed kadede ilo kwelok eo.
7 Ñe jej kwelok, jej lale ke elañe ro rekãl rej bed? Karuwaineneik ir ej mõttan wãwen eo jej kwalok manit ko remõn. (Mat. 5:47; Rom 15:7) Juõn yokyokwe emãnãn, idik peiir, juõn ettõñdikdik ejoij—aolep men ko redik, ak rej kwalok kajjid einwõt Ri Christian ro remol. (Jon 13:35) Elikin an kar itok juõn alen ñan Kingdom Hall eo, juõn emaan ear ba: “Iar lo elõñlok armij ro emol air yokwe, ruwamaejet aolep, ilo juõn ran jen ke iar loe ilo kabuñ eo iar rittolok ie. Ear alikar bwe iar lo mol eo.” Tokjen men in, ear ukõt wãwen mour eo an, im jiljilimjuõn alliñ ko tokelik ear baptais. Aet, manit ko remõn emaroñ wõr tokjen ko relap!
8 Elañe jej kwalok manit ko remõn ñan ruwamaejet ro jej iion ir, jejjab aikwij kõmmane ke “elaplok ñõn ro rej ber ilo nukin tõmak”? (Gal. 6:10) Kien eo ej jerbal: “Kwon . . . kõñiajoik turin mejen eo e lõlap [ak lellab].” (Liv. 19:32) Jen jab jerwane ir ilo kwelok ko ad.
9 Komin Lukkun Roñjake: Ilo kwelok ko an congregation eo, Christian ri karejar ro an Anij rej konono bwe ren letok jabdewõt men in yokwe an jitõb ñan kõketak kij. (Rom 1:11) Enaj mol ad kwalok manit ko renana elañe jar kiki, lap ainikien ad meme bwil, emakijkij ad unojdikdik ñan juõn eo ej jijet ebak, ekkã etal ñan mõn kebojak eo, read men ko ejelok kõtair ñan kwelok eo, ak lale men ko jet ilo ien kwelok eo. Elder ro ren joñok eo emõn kin men in. Manit ko remõn an Christian ren kar kamakit kij ñan kwalok ad kautiej ri konono eo im ennan eo an ej bedbed ion Bible ilo ad lukkun roñjake.
10 Bareinwõt, ilo lemnak kin ri konono eo im ri kwelok ro jimor, jej aikwij kõmman bwe electronic peijr ko im cellular telephone ko ren jab kokkure kwelok ko ad.
11 Manit ko im Ajiri ro: Ro jemen im jinen ren ien otemjej lale mwilin ajiri ro nejiir. Elañe juõn ajiri ej jino an jañ ak makitkit ilo ien kwelok eo im men in ej kamad ro jet, ej emõn ñan kadioj ajiri eo ilo mõkaj im kainemõn e. Jet ien men in emaroñ bin, ak kememej, men in ej kwalok bwe kwoj lemnak kin eñjake ko an ro jet. Ro jemen im jinen me ewõr nejiir redik im rej makitkit ekkã air jijet itulik in mõn kwelok eo bwe ren jab kamad ro jet ñe rej aikwij jutak im etal ilo ien kwelok eo. Emol, ri kwelok ro jet remaroñ kwalok air lemnak kin family kein ilo air kõtlok bwe jea kein itulik ren bellok ñan air kajerbali, elañe rekõnan.
12 Ro jemen im jinen rej aikwij bareinwõt lale mwilin ro nejiir mokta im elikin kwelok ko. Ajiri ro rej aikwij jab ettõr ilo mõn kwelok eo, bwe juõn men emaroñ jirullok im walok. Ettõr inabõj in Kingdom Hall eo emaroñ kauwatata bareinwõt, elaptata ilo jota ñe ebin ad reito-reitak. Konono ilo lap ainikien inabõj emaroñ kokkure ainemõn an ro ri turid im kõmman bwe armij ren bõk juõn lemnak enana kin kabuñ eo ad. Jej aikwij nebar ro jemen im jinen me rej lolorjake ro nejiir iloan im inabõj in Kingdom Hall eo kinke menin ej kalaplok mõnõnõ eo ñan ad bed ibben don ilo buru wõt juõn.—Sam 133:1.
13 Ilo Book Study eo: Jej kamolol kin karuwainene eo an ro jeid im jatid me rej kõtlok bwe ren kajerbal moko imwiir ñan kwelok ko an congregation eo. Ñe jej kwelok, jej aikwij kwalok kautiej im lemnak kin men ko mweieir. Mokta jen ad deloñ, jej aikwij iri juj ko ad bwe jen jab katton iloan in mweo ak carpet ko. Jemen im jinen rej aikwij lolorjake ro nejiir, im kõmman bwe ren bedwõt ilo jikin eo rar karõke kin book study eo. Meñe edik kumi in book study eo im ejjab ilo juõn mejatoto e kijñeñe, jejjab kõnan anemkwoj ilo moko imõn ro jet. Jemen ak jinen en karwaan ajiri eo ñan mõn kebojak eo. Bareinwõt, ke book study eo ej juõn kwelok an congregation eo, jej aikwij kõnak nuknuk ko einwõt ñe jej etal ñan Kingdom Hall eo.
14 Manit ko Remõn Raorõk: Jerbale manit ko an Christian ejjab kõmman bwe armij ren bõk juõn lemnak emõn kin jerbal in kwalok nan eo ad wõt ak ej bareinwõt kowõnmanlok kõtan ko remõn ibben ro jet. (2 Kor. 6:3, 4, 6) Einwõt ri kabuñ ro an Anij eo emõnõnõ, en kar bidodo ad ettõñdikdik, ñan ad errã ibben ro jet, im ñan kõmman jerbal ko rejoij meñe redik ñan kalañliñ ir. Kadkad kein rejoij naj kaibujuij mour ko ad einwõt armij ro an Anij.