Likit Ien Kakije Na Ijo Jikin Ekkar
1 Ilo ran kein rebin, kij aolep aikwij ien ñan kakije jen ien ñan ien. Ekkar bwe kwon bõk jidik ien ñan ikkure. Bõtab, ñe kwoj jolok elap ien ñan kakije, kin men in kamõnõnõ ko, im ñan kamao bajjek men kein remaroñ kõmman bwe armij eo en kadiklok ien eo ej kajerbale kin jibadbad ko ilo jitõb. Jej aikwij likit ien kakije ilo ijo jikin. (Mat. 5:3) Ewi wãwen an maroñ tõbrak men in? Ilo ad lor nan in rejañ eo ilo Dri Epesõs 5:15-17.
2 Kõmman Joñan ko: Paul ear je bwe Ri Christian ro rej aikwij “kanuij lale” ewi meletlet in wãwen eo rej mour. Jelã debdeb im jatõr rej men ko kwoj aikwiji ñan kõmman bwe ien kakije en bed ilo joñan eo ej lukkun men in aikwij. Ej juõn men emõn ñan lemnak kin wãwen eo jej kajerbal ien ko ejelok jabdewõt men kar karõki ie. En kar wõr un eo ewõr tokjen ien kakije ko ad jen an kõmman ad eñjake bwe jaar kokkure ien eo ad ak kõmman ad lukkun mõk. Elañe elikin ad bõk kunad ilo jet makitkit ko jej bõk juõn eñjake in ejelok tõbrak, jab juburu, im jej bareinwõt eñtan kin an nana bõklikit eo ad, men in enaj kar kalikar bwe jej aikwij kõmman jet oktak ko ilo wãwen eo jej kajerbal ien eo ad.
3 Kwon Kwalok Kõmmanwa: Paul ear letok nan in kakabilek ko ikijen “wiaik ien” kin men ko relikjiklok ilo mour, im jab “bwebwe.” Ri Christian ro emwij wujleplok air mour rejjab maroñ kõtlok bwe mour ko air ren keolaplap ion men in kamõnõnõ ko. Meñe kakije im ikkure remaroñ kakajur kij ilo enbwin, unjen kajur eo ad ilo jitõb ej kajur eo ej jerbal an Anij. (Ais. 40:29-31) Jej bõk jitõb eo an ikijen makitkit ko rej theocratic—katak Bible, bed ilo kwelok ko an congregation eo, bõk kunam ilo jerbal in kwalok nan—jab ikijen ikkure ak men in kamõnõnõ ko.
4 Kõlajrak Men Ko Raorõk: Paul ear lelok ñan Ri Christian ro nan in tel eo “komin jelalokjen ta eo ankil an Iroij.” Jesus ear katakin bwe makitkit ko ad ren keolaplap ion Ailiñ in Anij einwõt men eo eaorõktata ilo mour. (Mat. 6:33) Eaorõk bwe jen likit mokta men ko me renaj kõtlok ad kajejjet wujleplok eo ad ñan Jehovah. Elikin men in, jemaroñ likit ien kakije ilo ijo jikin. Ñe jej kõmman men in, enaj jelet kij ilo juõn wãwen emõn, im enaj laplok ad lañliñ kake.—Ekkl. 5:12.