Ej Juõn Abañ ke ñan Kwalok Nan?
1 Enañin aolep armij rej boub. Ri Kennan ro an Jehovah rej ibwiljin ro elaptata air boub—katak Nan eo an Anij, bed ilo kwelok ko an congregation eo, im bõk kunair ilo jerbal in kwalok nan. Bareinwõt, jej boub ilo jikin jerbal eo ad, jerbal ilo mweo ak ilo school, im elõñ eddo ko jet, im men kein aolep rej bõk ien. Men in elaptata an bin ñan ro bõran family eo.
2 Kin wãwen ko renana ikijen economy ilo elõñ jikin ko, ro bõran family ko rej aikwij kate ir im jerbal elõñ awa ko ñan kabwe aikwij ko air. Ñe job ko rej bõk enañin aolep ien im kajur ko air, ejjab lap ien ibbeir ñan jerbal in kwalok nan. Kinke ewõr eddo eo ibbeir ñan kabwe aikwij ko ilo kanniek an family ko air, jet remaroñ eñjake bwe jidik wõt air maroñ bõk kunair ilo jerbal in kwalok nan. (1 Tim. 5:8) Emol, rainin jej jelmaik elõñ ijjibed ko ikijen bõk men in aikwij ko kin mour. Ak job eo an juõn armij ejjab aikwij juõn men in kabañ jerbal in kwalok nan kin news eo emõn. (Mark 13:10) Kin men in, emõn bwe jen etale mol in wãwen ko ibbed.
3 Kinke wãwen lal in ien otemjej ej oktaklok, bõran juõn family emaroñ kõnan jolok elap ien ilo jikin jerbal eo, ilo an bõk mejenkajjik eo ñan kalaplok jortoklik eo an ñan an maroñ jelmae jabdewõt men in walok ko me ear jab kõtmene kaki. (1 Kor. 7:31) Ke laplok in ien eo kwoj joloke ilo job eo emaroñ kamaroñ yuk ñan wia elõñlok mweiuk ko ak letok ien ko jet remõn kin ikkure im men in kamõnõnõ ko, men in enaj ke kõmman bwe family eo en laplok an mõnõnõ im juburu elañe kwoj kõmmane ilo am kajerbal ien eo kwonaj kar kajerbale kin jibadbad ko ilo jitõb ak keini am bed ilo kwelok ko? Je lukkun kõnan bõprae jabdewõt men me enaj kajorrãn mour in jitõb eo ad. Bokake nan in kakabilek eo an Jesus ñan ‘korlok mweiuk ilañ’ im bwe jen “mweie ñõn Anij” ej ial eo emeletlet.—Mat. 6:19-21; Luk 12:15-21.
4 Bukõt Mokta Men ko An Ailiñ eo: Jesus ear katakin ri kalor ro an ñan likit men ko ilo jitõb iman jabdewõt men ko jet. Ear rejañ ir: “Inem komin jab inebata buruemi im ba, Ta je naj mõña? Ak ta je naj irak? Ak e naj kijkan ar balle?” Etke ear ba men in? Ear kamelele: “Bwe Jememiuij i lõñ E jela ami aikwij men kein otemjej.” Elañe ej mol ad liki men in, enaj ejelok abañ me enaj bõprae kij jen ad kõmman men eo Jesus ear ba jeltokin: “A komin bukot mokta ailiñ in Anij, im kwojarjar eo An; im naj koorlok men kein [aikwij ko ilo kanniek] otemjej ñõn kom.” Anij enaj kõmman bwe en bwe men in aikwij kein! (Mat. 6:31-33) Kiõ ejjab ien eo ñan ad mad kin an le jen joñan ad inebata kin aikwij eo ñan mour ak kin juõn kõnan bwe en jokane ad bed ilo juõn jukjuk im bed me ejjabto enaj jako.—1 Pit. 5:7; 1 Jon 2:15-17.
5 Un eo elaptata unin ad kabuk juõn jikin jerbal ej ñan kabwe aikwij ko ad ilo kanniek. Ak ewi joñan eo jej aikwiji? Ri jilek Paul ear je: “A elañe eor mõña im nuknuk ko iber, jen jokõne kaki.” Jej kajeoñ ke in bõk elaplok jen joñan in? Elañe aet, inem jemaroñ kamadmõde tokjen ko me Paul ear kakkõl kake: “A ro re kanuij kõnan bwe ren dri mweie, re buñ ilo kabo im oujir im elõñ mõm ko re bwebwe im nana, rej kamaloñ armij im kokkure ir ilo jikin joko.” (1 Tim. 6:8, 9; Mat. 6:24; Luk 14:33) Ewi wãwen ad maroñ jelã elañe kõnan ko rele jen joñan rej kabañ kij?
6 Elañe jibadbad ko ad ilo jikin jerbal eo ej kõmman bwe en jidik wõt ad bõk kunad ilo jerbal in kwalok nan ak jej likjap in lo aikwij eo ñan karmijeteik kõnan ko ad kin tokjen news eo emõn, inem ewõr aikwij eo ñan ukõt lajrak in men ko raorõktata ibbed. (Hib. 13:15, 16) Juõn wãwen mour elaplok an lamwan enaj lap an jibañ ñan jolok abañ in ñan jerbal in kwalok nan eo ad. Men ko an Ailiñ eo ien otemjej en moktata ñe ej itok ñan wãwen ad kajerbal ien im kajur eo ad.
7 Jerbal eo Ejjab Jekdon: Nan ko an Paul rej rejañ kij bwe ien otemjej jej aikwij “boub ilo jerbal an Iroij, ilo jelã bwe jerbal eo [ad] ejjab jekdon ilo Iroij.” (1 Kor. 15:58, New World Translation) “Jerbal an Iroij” eo elaptata ej jerbal in kwalok nan kin Ailiñ eo im kõmman ri kalor ro. (Mat. 24:14; 28:19, 20) Ñan bõk kunad ilo joñan ad maroñ, jej aikwij karõk ien ñan kwalok nan kajjojo week im jab kajeoñ in kajerbal ien eo kin jibadbad ko jet. (Ep. 5:15-17) Inem, jikin jerbal eo im jabdewõt men ko jet bareinwõt rejamin juõn men in kabañ ñan jerbal in kwalok nan eo ad.
8 Ñe jej lelok kij make ilo ad jakelok mol ko ilo Bible ibben ro jet, jej lo mõnõnõ eo elap ej itok jen lelok. (Jerbal 20:35) Ilo ad kõmman jerbal in kwalok nan kin Ailiñ eo, jemaroñ reimanlok ñan ilju im jeklaj kin liki, “Bwe Anij e wãnik wõt, im E jamin meloklok [ad] jerbal im yokwe, eo [jaar] kwalok kin etan.”—Hib. 6:10.