Jerbal in Kwalok Nan an Christian—Jerbal eo Ad Elaptata
1 Elõñ kain jerbal ko kij aolep jej aikwij kõmmani. Kabwe aikwij ko an family eo ej juõn men in aikwij jen Anij. (1 Tim. 5:8) Bõtab, jerbal eo ekoba ilo men in aikwij in jen Anij en jab oktak im aorõklok jen jerbal in kwalok nan kin Ailiñ eo im kõmman ri kalor ro.—Mat. 24:14; 28:19, 20.
2 Jesus ear likit juõn joñok ñan ad lore ilo “bukot mokta ailiñ in Anij.” (Mat. 6:33; 1 Pit. 2:21) Meñe ear jab lõñ men ko mweien ilo kanniek, ear lukkun boub in kõmanman ankil an Jemen. (Luk 4:43; 9:58; Jon 4:34) Ear kate e ñan kwalok nan ilo jabdewõt ien emõn tok. (Luk 23:43; 1 Tim. 6:13) Ear rejañ ri kalor ro an bwe en eindein air itoklimo ilo jerbal in madmõd eo.—Mat. 9:37, 38.
3 Kajeoñe Jesus Rainin: Jemaroñ kajeoñe wanjoñok eo an Jesus ilo ad kate kij bwe en lamwan wãwen mour eo ad me ej keolaplape jerbal in kwalok nan eo an Christian. Elañe ewõr men in aikwij ko an mour ibbed, jen eoroñ nan in kakabilek eo ilo Bible bwe jen jab korlok mweiuk ko an lal in. (Mat. 6:19, 20; 1 Tim. 6:8) Elaplok an emõn elañe jej kalaplok ijo kunad ilo jerbal in kwalok nan! Elañe jej jelmae wãwen ko rebin, jen kate kij einwõt an kar Jesus kõmmane, im jab kõtlok bwe inebata ko an mour in ren aorõklok jen jerbal eo ad elaptata ñan keañ kin news eo emõn kin Ailiñ eo.—Luk 8:14; 9:59-62.
4 Ro elõñ eddo ko ibbeir rej bareinwõt watõk bwe jerbal in kwalok nan eo en moktata. Juõn brother eo ear lap family eo an, ewõr juõn job elõñ eddo ko, im ej jerbal einwõt juõn elder ilo congregation in Christian eo ear ba: “Ij watok jerbal in kwalok nan einwõt jerbal eo aõ elaptata.” Juõn sister eo ej pioneer ear ba: “Jerbal in pioneer elaplok an wõr tokjen jen juõn job elap tõbrakin ilo lal in.”
5 Jekdon ta wãwen ko ibbed, jen lor wanjoñok eo an Jesus. Ewi wãwen? Ilo ad kõmman bwe jerbal in kwalok nan eo an Christian en jerbal eo ad elaptata.