Men eo Eaurõktata ilo Mour eo Ar
1. Ewi wãwen an kar Jisõs kalikar bwe ear lukkun kaurõk jerbal in kwalok nan?
1 Jerbal in kwalok nan ear men eo eaurõktata iben Jisõs. Ear lukkun kate ilo jerbal in. Im ear etetal elõñ buki mail ko iaolepen Palestine ñõn kwalok ñõn jabrewõt armij ro ej iion ir. Ear kejbãrok bwe wãwen an mour en lamwan ñõn an maroñ kajerbal ien ko an ñõn an kwalok nan. (Matu 8:20) Ke jar ko rar kajeoñ in karumij e bwe en kemour ro renañinmij, ear ba ñõn ir: “Iaikwij bareinwõt kwalok Nan Emmõn kin Ailiñ in Anij ilo jikin ko jet, bwe eñin un eo Anij ear jilkintok iõ kake.”—Luk 4:43, UBS.
2. Etke jerbal in kwalok nan ear lukkun aurõk iben Jisõs?
2 Etke Jisõs ear lukkun kaurõk jerbal in kwalok nan eo? Men eo ear lukkun aurõktata iben Jisõs kar bwe etan Jeova en kokwojarjar im erreo. (Matu 6:9) Ear lukkun yokwe Jemen im ear kõnan kajejit Ankilan im bokake aolep kien ko An. (Jon 14:31) Bareinwõt, ear lukkun mol an kea kin armij ro im kõnan jibõñ ir.—Matu 9:36, 37.
3. Ewi wãwen jemaroñ kalikar bwe jerbal in kwalok nan ej men eo aurõktata iber?
3 Kajeoñwe Jisõs: Emaroñ juõn men ebin ñõn kajeoñwe Jisõs ilo ar kõmõn bwe jerbal in kwalok nan en men eo moktata ilo mour eo ar. Unin an eindrein ej kinke lõl in emaroñ bõk elap ien ko ar im letok elõñ men ko me remaroñ kamad kij. (Matu 24:37-39; Luk 21:34) Kin men in, jej aikwij lemnok kin men ko raurõklok ilo ar karõk ien ko ñõn ar kapojõk ñõn kwalok nan, im ekkeini ar bõk kwonad ilo jerbal in. (Pil. 1:10) Jej kate kij bwe wãwen ar mour en lamwan im kejbãrok bwe jen jab boub ilo makõtkit im jerbal ko ilo lõl in.—1 Kor. 7:31.
4. Etke jej aikwij kejbãrok bwe men ko raurõk ren moktata ilo mour eo ar?
4 Ñe ej drik ien, juõn eo emeletlet ej karõk bwe men ko raurõktata ren men ko moktata ej kõmõni ilo mour eo an. Ñõn wanjoñok, elañe ej roñ bwe juõn lañ elap ej ebaktok, enaj kajerbal aolep maroñ im ien ko an ñõn kepoj baamle eo an im kakkil ro dri turin kin jorran eo. Enaj likit jerbal ko rejjab aurõk ñõn an kõmõni tokelik. Mõtõn wõt jidrik lañ eo elap etan Armagedõn enaj walok. (Zip. 1:14-16, UBS; 1 Kor. 7:29) Ñõn ar maroñ lomoren kij im ro rej roñjake, jej aikwij kejbãrok kij mõke im wãwen ar katakin, iloan im ilikin congregation eo. (1 Tim. 4:16) Aet, ar maroñ ellã im mour ej wawa ion ar kõmõn bwe ar jerbal in kwalok nan en moktata ilo mour eo ar!