Ta eo Eaorõktata Ilo Mour eo Am?
1 Elõñ dolul in kabuñ ko elap air kwalok kin aorõkin air kõmman jerbal ko rejoij, einwõt kalek imõn school ko ak aikwij ko an doctor. Bõtab, Ri Kennan ro an Jehovah, meñe rejjab meloklok kin “kõmõnmõn emõn im lelok ñõn ro jet,” rej likit air jibañ armij kin men ko lor jitõb men eo moktata.—Hib. 13:16.
2 Wanjoñok eo Ilo Ebeben eo Kein Kajuõn: Jesus ear kõmman elõñ jerbal ko remõn ilo jerbal eo an ion lal, ak jerbal eo an elaptata kar ñan kwalok kin mol eo. (Luk 4:43; Jon 18:37; Jerbal 10:38) Ear kakien ri kalor ro an “komin ilok, im kõmõn dri ailiñ ko otemjej bwe ren dri kalora, . . . im katakin ir.” (Mat. 28:19, 20) Im ear kalikar bwe ro rej jerbale tõmak eo ilo e renaj kõmmane jerbal eo ear jinoe ilo juõn joñan elaplok. (Jon 14:12) Jesus ear watõk jerbal in kwalok nan einwõt jerbal eo an eaorõktata kinke ej jibañ armij ñan katak kin ial in lomor.—Jon 17:3.
3 Ri jilek Paul ear watõk jerbal in kwalok nan eo an einwõt juõn men in “aikwij,” me ear jab maroñ kajekdone. (1 Kor. 9:16, 17, NW) Ear mõnõnõ in lelok e make, kijenmij kin jabdewõt melejoñ, ak eñtan kin jabdewõt men in kaeñtan ko bwe en kõtõbrak jerbal in kwalok nan eo an. (Jerbal 20:22-24) Ri jilek Peter im ro mõttan rar kwalok ejja jitõb in wõt. Meñe rar iion kalbuj im deñdeñ, “ran otemjej iloan tempel, im ilo jikir e jab mwij air katakin im kwalok Jisõs bwe E dri Kraist.”—Jerbal 5:40-42.
4 Ta kin kij? Jej watok ke bwe jerbal in keañ kin news eo emõn kin Ailiñ eo im ñan kõmman ri kalor ro ej jerbal eo eaorõktata jen men otemjej? Einwõt Jesus, ej lap ke ad itoklimo kin ro rej “barõk im jibliklik einwõt s̃ip ko ejelok air s̃eperd”? (Mat. 9:36) Men ko rej walok ilo lal in kiõ im kanan ko ilo Bible rej lukkun kalikar bwe mõttan jidik jukjuk im bed in enaj jemlok! Ad lemnak kin aorõkin jerbal in kwalok nan naj kamakit kij ñan wõnmanlok im kwalok nan ilo kijejeto.
5 Etale Wãwen ko Ibbam: Kinke wãwen ko ilo mour an armij ekkã air oktak, ej juõn men emõn ñan lale jen ien ñan ien elañe jemaroñ kõmman oktak ko bwe en laplok kunad ilo jerbal in kwalok nan. Juõn sister ear juõn regular pioneer ilo yiõ ko 1950, ’60, im ’70 ak ear aikwij bõjrak kin an nanalok ejmour eo an. Bõtab, tokelik ear emõnlok ejmour eo an. Ilo ran ko kiõ ear bar etale wãwen ko ibben im ear bebe bwe ear maroñ bar pioneer. Ear lap an mõnõnõ bwe ear maroñ bed ilo Pioneer Service School eo ke ear 90 yiõ dettan! Ta kin kwe? Ej ebaktok ke ien am retire ak kadiojlok? Ñe eoktak wãwen ko ilo mour eo am, kwomaroñ ke naj pioneer?
6 Ke Jesus ear lo bwe Martha “ej ailbãro kin elõñ jerbal,” ilo joij ear ba bwe enaj bõk jerammõn ko relaplok elañe ear kõmman bwe en lamwan men ko. (Luk 10:40-42) Kwomaroñ ke kõmman bwe en lamwan wãwen mour eo am? Ej lukkun ke juõn men in aikwij bwe leo im lio ren jimor jerbal? Elañe rej kõmman oktak ko, family eo emaroñ ke mour jen wõnãn juõn wõt armij? Elõñ armij rar bõk tokjen ko ilo jitõb ke rar kõmman oktak ko bwe en laplok kunair ilo jerbal in kwalok nan.
7 Jen aolep lor joñok eo me Jesus im ri jilek ro rar likiti! Jemaroñ liki bwe Jehovah enaj kajerammõn jibadbad ko ad remol ñan kõmman joñan wõt ad maroñ ilo jerbal eo eaorõk ñan kwalok kin news emõn eo kin Ailiñ eo.—Luk 9:57-62.