Kajeoñe Christ ilo Jerbal in Kwalok Nan eo Am
1 Jesus ear likit juõn joñok ñan ad lore ilo jerbal in kwalok nan eo ad. Elõñ alen im elõñ wãwen ko ear kwalok yokwe eo an emũlal ñan Anij im armij. Ear katakin mol eo ñan ro ettã burueir im ear kõmman men in bwilõñ ko reyokwe ñan ro rar eñtan im buromõj.—Mat. 9:35.
2 Joñok im Katak ko an Jesus: Jesus ear jab kamad e make ilo an bõk kunan ilo men ko an kien ak kin jibadbad ko rejoij ñan kakõmõnmõnlok jukjuk im bed eo. Im ear jab kõtlok bwe jabdewõt jibadbad ko jet remõn ren kamad e ak ren aorõklok jen jerbal eo an elaptata. (Luk 8:1) Ear kalikar bwe kwalok nan kin news eo emõn kin Ailiñ in Anij ej mejelan eo wõt ñan abañ ko an armij. Jesus ear aikwij kõmman juõn jerbal eaorõk im ear wõr joñan ien ñan an kõmmane. Ke armij ro ilo Capernaum rar kõnan bwe Jesus en bedwõt ie, ear jiroñ ri kalor ro an: “Jen ilok ñõn jikin kwelok kõn rebak, bwe In bareinwõt kwalok ijo ko; bwe kin men in I ar itok.”—Mark 1:38.
3 Elikin an kar kamineneik ri kalor ro an, Jesus ear jilkinlok ir im lelok nan in jiroñ kein: “Komin kwalok, im ba, Ailiñ in lõñ ebak.” (Mat. 10:7) Ear katakin ri kalor ro an bwe men ko an Ailiñ eo rej aikwij moktata ilo mour eo air. (Mat. 6:33) Nan ko an Jesus ñan ri kalor ro an mokta jen an kar wanliñlok ñan lañ rar kalikar kin ta eo ren kõmmane. Ear ba: “Komin ilok, im kõmõn dri ailiñ ko otemjej bwe ren dri kalora.”—Mat. 28:19.
4 Aorõkin Ailiñ Eo: Jesus ear konono elaptata kin Ailiñ in Anij, im ear rejañ ri kalor ro an bwe ren anõk joñok eo an. Jibadbad ko an armij ñan kamadmõde abañ ko air reban tõbrak. (Jerm. 10:23) Ailiñ in Anij wõt enaj kokwojarjar etan Anij im letok mejelan eo ej indio ñan armij. (Mat. 6:9, 10) Ilo ad katakin mol ko kin Ailiñ eo ñan armij ro rej ‘inebata im buk burueir kin aoleb men kein rekajjõjõ rej walok,’ men in enaj jibañ ir ñan lo juõn mour elemõnõnõ kiõ im ñan debij juõn kejatdikdik emol kin ilju im jeklaj.—Ezek. 9:4.
5 Jesus ej wõnmanlok wõt im bõk kunan ilo jerbal in kwalok kin news eo emõn kin Ailiñ in Anij, im ej kallimur bwe enaj jurake kij. (Mat. 28:20) Ñan joñan et eo jerbal in kwalok nan eo ad ej lor joñok eo Jesus ear likiti ñan kij? (1 Pit. 2:21) Ilo ran kein eliktata im raorõk, jen kõmman joñan wõt ad maroñ ñan lor joñok eo Jesus ear likiti ilo jerbal in kwalok nan!