“I Maroñ Bõk Ien Jen Ia?”
1 Eñin men eo elõñ iad jej aol kake, bwe mour ko ad re obrak kin men ko jej kõmmani. Emwij air ba bwe ien ej jimor men eo eaorõktata im men eo emõkajtata an jako ibbed. Inem ia eo jemaroñ bõk ien jen e kin men ko emol air aorõk, einwõt read im katak Nan in Anij?—Pil. 1:10.
2 Key eo, ejjab ñan kajeoñ kabukõt elaplok ien, ak ej ñan bebe kin ta eo jekõnan kõmmane ilo ien eo ewõr ibbed. Kij aolep ewõr ibbed 168 awa ko ilo juõn week, enañin 100 iair jej kajerbali ñan kiki im ñan jerbal. Inem ewi wãwen ad kajerbal bwen awa ko ilo wãwen eo elaptata an wõr tokjen? Epesõs 5:15-17 ej rejañ bwe jen etetal “jab einwõt dri jaje, a einwõt dri meletlet; im wiaik ien . . . , a komin jelalokjen ta eo ankil an Iroij.” Men in ej kwalok kin aikwij eo ñan kortokjen jabdewõt ien emõntok ñan kõmanman men ko me Jehovah ej ba bwe raorõk.
3 Jesus ear keidi ran ko ad ibben ko an Noah. (Luk 17:26, 27) Armij ro ilo ien eo rar boub kin men ko mantin mour. Bõtab, Noah ear kõmman ien ñan kalek juõn wa elukkun kilep im ñan kwalok nan. (Hib. 11:7; 2 Pit. 2:5) Ewi wãwen? Ilo an likit mokta ankil an Anij im bokake e ilo an “ein drein e ar kõmõne” men ko.—Jen. 6:22.
4 Ta eo En Mokta? Jesus ear ba: “Armij e jamin mour kin bred wõt, a kin nan otemjej rej waloktok jen loñin Anij [Jehovah].” (Mat. 4:4) Kajjojo week, jej bõk kijed ilo “ien ejejit.” (Luk 12:42) Men in ej aikwiji juõn ad schedule in keini ad read im katak elañe emol ad kõnan bõk tokjen kin aolepeir. Kin kamolol eo ad kin ekan ko ilo jitõb, jejjab watõke einwõt fast food (mõñã ko emõkaj air maroñ keboji), ñan kañi ilo mõkaj einwõt ñe juõn ej mõñã im makitkit ilo ejja ien eo wõt. Jen an eindein, kamolol eo ekkar ej kamakit kij ñan bõk ien ñan katak im lañliñ kake men ko ilo jitõb.
5 Bõk ekan ko ilo jitõb emaroñ tellok kij ñan mour indio. (Jon 17:3) Ej tellokin bed imantata ilo schedule eo ad jen ran ñan ran. Jemaroñ ke karõk ien ñan read Bible ran otemjej im ñan kebojak kin kwelok ko an Christian? Aet, jemaroñ. Inem, jenaj maroñ bõk “elap wõnair” me rej itok jen ad jelã im kõmanman ankil an Anij.—Sam 19:7-11.