Etke Kwoj Aikwij Wõnmanlok im Kwalok Nan?
1 Jerbal in kwalok nan kin Ailiñ eo eto ke an kõmman ilo bukwon eo am? (Mat. 24:14) Elañe aet, bõlen kwoj kile bwe ebwe ami jerbale territory eo an congregation eo. Kiõ ñe kwoj kwalok nan, bõlen ekkã an armij jab kwalok air itoklimo ilo ennan in Ailiñ eo. Meñe eindein, lale ta eo kar kamole kin ri kalor ro remol an Jesus ilo peij 141 ilo book in Isaiah’s Prophecy II: “Ilo jet jikin ko, emaroñ einwõt jidik wõt an wõr tokjen ko rej walok jen air kwalok nan ñe keidi ibben joñan air kate im jerbal. Ak, rej kijenmij wõt.” Ak etke jej aikwij wõnmanlok wõt im kwalok nan?
2 Kememej Jeremiah: Kijenmij ilo tiljek ilo jerbal in kwalok nan eo ad en jab wawa ion an armij roñjake kij ak jab. Jeremiah ear kwalok nan iumin 40 yiõ ko ilo ejja territory eo wõt meñe jejjo wõt rar roñjake e im elõñ rar jumae ennan eo an. Etke Jeremiah ear kijenmij wõt? Kinke ear kõmman juõn jerbal me Anij ear kakien e bwe en kõmmane im jelã eo an kin ta eo enaj walok ilo ran ko rej itok ear kamakit e ñan konono ilo beran.—Jer. 1:17, NW; 20:9, NW.
3 Wãwen eo ibbed ej einlok wõt. Jesus ear “jiroñ kim bwe kimin kwalok ñõn armij rõn, im kennan bwe E in Eo Anij e ar likit E bwe En Dri Ekajet ro remour im ro remij.” (Jerbal 10:42) Ennan eo jej kwalok kake emaroñ melelen mour ak mij ñan ro rej roñjake. Ekajet eo an armij naj wawa ion uak eo air ñan news eo emõn. Kin an eindein, ej eddo eo ad ñan kõmman einwõt kar kakien kij bwe jen kõmmane. Meñe armij rej makoko in roñjake, men in ej letok ñan kij juõn ien emõn ñan kwalok yokwe eo ad emũlal ñan ir im kin tiljek eo ad ñan Jehovah ilo ad kate kij in kõmman men eo jej aikwij kõmmane. Ak ebar wõr men ko jet.
4 Jej Make Bõk Tokjen: Kõmanmõn ankil an Anij, jekdon ta uak eo an armij ilo territory eo, ej letok ñan kij ainemõn ilo lemnak, juburu, im mõnõnõ, eo jejjab maroñ loe ilo jabdewõt wãwen ko jet. (Sam 40:8) Ewõr un ko unin mour ko ad. Elañe elap ad bõk kunad ilo jerbal in kwalok nan, enaj laplok an buruõd im lemnak ko ad kalimjeklok kejatdikdik im lañliñ eo ñan mour ilo lal eo ekãl an Anij. Ilo ad lemnak kin kallimur kein ilo Bible men in enaj kakajurlok mour in jitõb eo ad im kõtan eo ad ibben Jehovah.
5 Meñe jejjab lo tokjen ko kin jerbal in kwalok nan eo ad ilo mõkaj, jaar kalbwini juõn ine in mol eo ilo buruen juõn armij me enaj eddeklok ilo ien eo Jehovah ej lo an jejjet. (Jon 6:44; 1 Kor. 3:6) Ejelok juõn iad ejelã kin joñan armij ro renaj katak kin Ailiñ eo ikijen jibadbad ko an armij ro an Jehovah, ilo bukwon eo ak ibelakin lal.
6 Kin juõn eñjake in ekaiuriur elaplok jen mokta jej aikwij bokake nan in katakin eo an Jesus: “Komin kejbãrok kom, komin ekil im jar: bwe kom jaje ñat ien eo. Im nan eo Ij ba ñõn kom, Ij ba ñõn otemjelok, Komin ekil.” (Mark 13:33, 37) Inem, kimij kejatdikdik bwe kij aolep jenaj wõnmanlok im keañ kin news eo emõn kin Ailiñ eo, im kalañliñ buruen Jehovah ke jej bõk kunad in kokwojarjar ãt eo etan elap im ekwojarjar.