Etke Jej Jeblak Elõñ Alen
1. Ta kajitõk eo ej walok ikijen jerbal in kwalok nan eo ad?
1 Ilo elõñ jikin ko, emakijkij ad kwalok nan ilo territory ko ijo. Jej wõnmanlok im jeblak elõñ alen ñan ejja moko imõn armij ro wõt, meñe ro ri mweo emwij air jiroñ kij bwe rejjab itoklimo in roñjake. Etke jej lolok wõt armij ro me rar jab itoklimo mokta?
2. Ta un eo elaptata unin ad kijenmij wõt ilo jerbal in kwalok nan?
2 Yokwe Jehovah im Armij Ro: Un eo elaptata unin ad kijenmij ilo jerbal in kwalok nan ej kin ad yokwe Jehovah. Buruõd ej kamakit kij ñan wõnmanlok wõt im kwalok nan ibben ro jet kin Anij eo ad elap. (Luk 6:45) Yokwe eo ad kin Jehovah ej kamakit kij ñan bokake kien ko an im ñan jibañ ro jet ñan air kõmman eindein. (Ken. 27:11; 1 Jon 5:3) Ad kijenmij wõt ilo jerbal in ejjab bedbed ion ta eo armij ro rej ba. Meñe ke Ri Christian ro ilo ebeben eo kein kajuõn rar bõk matõrtõr, rar “wõnmanlok wõt” ilo air kwalok nan. (Jerbal 5:42) Ñe armij ro rejjab kõnan roñjake, jen ad kõtlok bwe men in en kabwer kij, jej aikwij kijenmij wõt, im ilo wãwen in kwalok tumũlalin yokwe im tiljek eo ad ñan Jehovah.
3. Ewi wãwen yokwe armij enaj jibañ kij ñan wõnmanlok wõt ilo jerbal in kwalok nan?
3 Bareinwõt jej kate wõt im jab ebwer kinke jej yokwe ro ri turid. (Luk 10:27) Jehovah ejjab kõnan bwe jabdewõt armij en mij. (2 Pit. 3:9) Meñe emakijkij ad kwalok nan ilo jet territory ko, jej lo wõt armij ro jet me rekõnan karejar ñan Jehovah. Ñan wanjoñok, ilo Guadeloupe, ijo me 1 jen 56 armij ro ej juõn ian Ri Kennan ro an Jehovah, 214 rar baptais ilo yiõ eo lok. Enañin 20,000 rar bed ilo Kwojkwoj in Kememej eo, ak enañin 1 jen 22 armij ilo Guadeloupe!
4. Ilo wãwen et ko territory ko remaroñ oktak?
4 Oktak ko ilo Territory Eo: Ekkã an oktak armij ro rej jokwe ilo territory ko ad. Inem ñe jej jeblaklok ñan juõn ian moko me armij ro rar jab itoklimo mokta, bar juõn uan family eo—bõlen juõn eo ej kap roñ ennan eo ad—emaroñ kabellok kejam eo im roñjake. Ak jemaroñ lo armij ro rekãl im ewõr air itoklimo. Ajiri ro me jemeir im jineir rej jumae rej rittolok im illok jen moko imwiir. Jodikdik rein remaroñ mõnõnõ in roñjake ennan eo an Ailiñ eo.
5. Ta eo emaroñ kamakit armij ro bwe ren oktak im roñjake?
5 Armij ro remaroñ oktak ilo air lemnak. Mokta ri jilek Paul ekin “kajirere im matõrtõre im lej.” (1 Tim. 1:13) Eindein, elõñ ro me rej karejar ñan Jehovah rainin rar jab itoklimo kin mol eo mokta. Jet iair rar jumae news eo emõn mokta. Ke wãwen ko an lal in rar oktak, jet ri jumae ro ak ro rar jab itoklimo mokta rar jino roñjake. Ro jet emaroñ laplok air itoklimo in roñjake elikin juõn men ekaburomõjmõj ear walok ñan ir, einwõt juõn uan family eo ekar mij, rar luji jerbal eo air ilo jikin jerbal eo, juõn abañ kin money ear walok, ak ear wõr juõn abañ kin nañinmij ibbeir.
6. Etke jej aikwij wõnmanlok im elloetak wõt ilo jerbal in kwalok nan?
6 Jemlokin jukjuk im bed in ej ebaktok wõt, ak jerbal eo ad kin kwalok nan im katakin armij ej laplok wõt. (Ais. 60:22) Kin men in, jej wõnmanlok im elloetak wõt ilo jerbal in kwalok nan im kate wõt ñan debij juõn lemnak emõn. Bõlen armij eo juõn jej bwebwenato ibben emaroñ roñjake. Jej aikwij konono wõt! ‘Ñe jej kõmman eindein jenaj lomoren kij im ro rej roñjake kij.’—1 Tim. 4:16.