“Elõñ Alen Emwij Ad Jerbal ilo Territory eo Ad!”
1 Kwonañin eñjake ke bwe joñan an emakijkij am jerbale territory eo am emaroñ ejelok ro rej einwõt sheep? Bõlen kwar lemnak: ‘I jelã wãwen eo armij renaj emmakit. Etke ij aikwij rol wõt ibben ro rejjab itoklimo?’ Emol bwe elõñ territory ko emakijkij ad jerbal ie. Bõtab, jej aikwij watõke mol in ilo juõn wãwen emõn, jab ilo nana. Etke ej aikwij eindein? Lale un ko emen rebed ilal.
2 Kar Uake Jar ko Ad: Jesus ear ba: “Elap jonikõn, a reiet dri marmir: inem komin jar im kajitõk iben Iroij an jonikõn, bwe En jilkinlok ro dri marmir ilo An jonikõn.” (Luk 10:2) Iumin elõñ yiõ ko jaar akwelap ibben Jehovah kin jibañ. Ilo elõñ jikin ko kiõ, ewõr ri jerbal ro jet rar aikwiji, im emakijkij lok ad jerbale territory eo. Mol eo bwe Jehovah ear uake jar ko ad en kar jab kamakit kij ñan lañliñ ke?
3 Kijenmij ej Kwalok Leen ko Remõn: Meñe ilo territory ko emakijkij air jerbal ie, ej emõn wõt an armij uak ñan ennan in Ailiñ eo im rej bõk jelãlokjen eo kin mol eo. Kin men in, jej aikwij jab bõjrak in jeblak ibbeir ilo kejatdikdik eo bwe jenaj lo elõñlok ro emol burueir. (Ais. 6:8-11) Einwõt ri kalor ro an Jesus ilo jinoin rar kõmmane, “ilok wõt” ñan armij ro ilo territory eo kar karõke ñan am jerbal ie, im kate yuk ñan kaitoklimoiir kin Ailiñ eo an Anij.—Mat. 10:6, 7.
4 Ilo Portugal elõñ congregation ko rej jerbale territory eo air kajjojo week, ak rej lo wõt ro rej einwõt sheep. Juõn sister ear wõr juõn lemnak elap an emõn. Sister eo ej ba: “Mokta jen aõ etal im kwalok nan kajjojo jibboñ, ij jar ñan Jehovah bwe en jibañ iõ lo juõn armij eo ej itoklimo in katak Bible.” Juõn ran ear karõk ñan katak ibben ri jerbal ro ilo juõn jikin kõmman bõr. Ak, tokelik juõn wõt armij ear itok im katak. Armij eo ear ba: “Ro jet rejjab itoklimo, ak ña ij.” Iloan wõt juõn alliñ lio make ear kõmman ruo an Bible study. Ejjabto jen ien eo ear baptais, im tokelik ear deloñ ilo jerbal in pioneer!
5 Jej Kõmmane Wõt Jerbal eo: Jej kwalok kin news eo emõn, einwõt Jesus ear kanan kake. (Mat. 24:14) Meñe ilo jikin ko ijo armij “rejjab kõnan roñjake [kij],” jej kakkõl ir ikijen jerbal in kwalok nan eo ad. Jej kõtmene bwe jet renaj jab mõnõnõ in roñjake ak jumae mol eo. Ak, jej aikwij kakkõl rein kin ekajet eo ej itok jen Jehovah.—Ezek. 2:4, 5; 3:7, 8, 19, New World Translation.
6 Ejañin Mwij Ad Jerbal: Ejjab kunad bebe ñããt jenaj kabõjrak jerbal in kwalok nan. Jehovah ejelã jejjet in ien eo en bõjrak. Ejelã elañe ewõr wõt armij ilo territory eo ad me renaj uak ilo emõn ñan news eo emõn. Rainin, jet armij rej ba bwe rejjab itoklimo, ak oktak ko relap ilo air mour—luji jikin jerbal eo air, bõk juõn nañinmij elap, mij an juõn eo ej jitenburu ibbeir—emaroñ kõmman bwe ren mõnõnõ in roñjake ilo bar juõn ien. Kin kalijeklok ak kin air baj boub ñan air roñjake, elõñ armij rar jab lukkun roñjake kin ta eo jej kwalok nan kake. Ad jeblaklok wõt ibbeir emaroñ kõmman bwe ren jelã im roñjake.
7 Ro rar rittolok ilo yiõ ko kiõ im ewõr family ko air make ej laplok air lemnak kin mour ko air im rej bõkmantak kajitõk ko me Anij wõt emaroñ uaki. Juõn jinen ejjab lukkun ritto ear kadeloñ ruo Ri Kennan ro ilo mweo imõn im ba: “Ke iar juõn ledik, iar jab melele taunin jinõ ear makoko in roñjake ke Ri Kennan ro rar itok im ear jiroñ ir bwe ear jab itoklimo, ke men eo wõt rar kõnan kõmmane kar ñan konono kin Bible eo. Ilo ien eo iar bebe bwe ñe irittolok, belele, im ewõr mweo imõ make, I naj kadeloñ tok Ri Kennan ro an Jehovah im kajitõk bwe ren kameleleik iõ kin Bible eo.” Eñin men eo ear kõmmane, ñan mõnõnõ eo an Ri Kennan ro ke rar lolok e.
8 Emaroñ ke Bolemen lok Am Jerbal? Ejjab aolep ien ej armij ro jej lolok ir me ej kõmman an bin ad kutkut in jerbal ilo territory eo. Jet ien ej kij make. Jej ijjino ke kin lemnak ko renana? Men in emaroñ jelet lemnak eo ad im ton in ainikied im wãwen turin mejed. Kwalok juõn jitõb emõn im en walok juõn jitõb in joij iturin mejõm. Kajeoñ in kajerbal juõn wãwen ekãl in kebak armij. Kõmman bwe en oktak wõt ennan eo am, im kajeoñ in kakõmanmanloke. Bõlen kwomaroñ ukõt kajitõk in kabellok eo am ak kajerbal bar juõn eon ilo bwebwenato eo am. Kajitõk ibben brother im sister ro jet kin ta eo rar lo tõbrak kake ke rej jerbal ilo territory eo. Jerbal ibben kajjo ri kwalok im pioneer ro, im lale ta eo ej kõmman an bolemen jerbal in kwalok nan eo air.
9 Jehovah ej buñburuen im kajerammõn jerbal in kwalok nan kin Ailiñ eo, im ilo ad bõk kunad ej kamol yokwe eo ad ñan e im ri turid. (Mat. 22:37-39) Inem jen kajejjet jerbal eo ad ñan ien eo ededelok, im jab mõk in jerbal wõt ilo territory eo.