Kwõnaaj Ke Bõk Tokjãn Ñe Ewõr Juon Am̦ Make Territory?

1. Etke em̦m̦an ñe ej wõr make am̦ territory?

¹ Etke em̦m̦an ñe ej wõr make am̦ territory? Eokwe, elõñ eklejia ko me elukkuun l̦ap territory ko aer. Kõn men in, ri kwal̦o̦k naan ro rej ebbõk aer make territory me epaake ijoko rej jokwe ie. Bok eo etan Organized ej ba ilo peij 103: “El̦aññe ewõr juon am̦ make territory me epaak, men in enaaj kõm̦m̦an bwe en l̦apl̦o̦k am̦ iien ñan kwal̦o̦k naan. Bareinwõt, kwõmaroñ kajjitõk ippãn ri kwal̦o̦k naan ro jet bwe ren jerbal ippam̦ ilo territory eo am̦ make.”

2. Ñe ewõr juon am̦ make territory, ewi wãween men in emaroñ jipañ eklejia eo ilo jerbal in kwal̦o̦k?

² Ñan Jipañ Eklejia eo Kwal̦o̦k Naan: El̦aññe territory eo am̦ epaake jikin jerbal eo am̦, kwõmaroñ kwal̦o̦k naan ilo iien m̦õñã in raelep ak ãlikin jerbal. El̦aññe ewõr juon ri kwal̦o̦k me jikin jerbal eo an epaak eok, kwõmaroñ kajjitõk ippãn bwe en iwõj komiro kwal̦o̦k naan ilo territory eo am̦. El̦aññe territory eo am̦ epaake m̦weo im̦õm̦, baam̦le eo am̦ emaroñ kobawõj ippam̦ im kwal̦o̦k naan ie ilo jota. Ñe kwõjjab etal ñan iien kweilo̦k in kwal̦o̦k eo, em̦m̦an ñe kwõj jar im kajjitõk jipañ ippãn Jeova m̦okta jãn am̦ ilo̦k im kwal̦o̦k naan. (Pil. 4:⁠6) Bareinwõt, kwõn jab mel̦o̦kl̦o̦k in bar jipañe eklejia eo ilo am̦ kobal̦o̦k im kwal̦o̦k naan ippãer im jab kwal̦o̦k naan wõt aolep iien ilo territory eo am̦ make. Em̦m̦an ñan rejetake kumi in kwal̦o̦k naan eo am̦, el̦aptata ilo weekend ko kõnke elõñ rej kwal̦o̦k naan.

3. Ta tokjãn ko renaaj wal̦o̦k ñe ewõr juon am̦ make territory?

³ Tokjãn Ko: Ñe ewõr juon am̦ make territory, kwõmaroñ kwal̦o̦k naan jabdewõt iien kwõmaroñ. El̦apl̦o̦k iien ko kwõmaroñ kõjerbali ñan kwal̦o̦k naan kõnke kwõban aikuj etal m̦okta ñan jikin kweilo̦k in kwal̦o̦k naan eo. Karõk in ear kamaroñ jet ñan auxiliary ak regular pioneer. Kõnke armej ro kwõnaaj ioon er ilo kwal̦o̦k naan rej jokwe iturum̦, enaaj pidodo am̦ jepl̦aak im katak Baibõl̦ ippãer. Elõñ rar lo bwe an wõr aer make territory ear jipañ er ñan lukkuun jel̦ã kajjien armej ro ilo jikin eo, el̦aptata ñe ear ikkutkut aer kwal̦o̦k naan ie m̦okta jãn aer karo̦o̦le ñan em̦m̦aan eo ej loloorjake territory ko bwe ro jet ren baj bõke. Ñe enaaj wõr juon am̦ make territory, men in emaroñ ke jipañ eok im baam̦le eo am̦ ñan kal̦apl̦o̦k ijo kun̦aami ilo jerbal in kwal̦o̦k naan?​—2 Ti. 4:⁠5.