Kwelok ko kin Jerbal in Kwalok Nan

1. Etke eor ar itoklimo bwe en melak ar kwalok nan?

¹ Jisõs ear likit joñok eo kin lolorjake jerbal eo kin kwalok nan kin Ailiñ eo ilo juõn wãwen ekwon im emelak. Ejja einwõt ranin, ro rej bõk erron jerbal in kwalok kin Ailiñ eo ibelakin lõl, elap air kõnan lolorjake jerbal in ilo ejja wãwen in wõt. Ñõn kajejit men in, congregation ko ibelakin lõl rej kajerbal kwelok in kin jerbal in kwalok nan ñõn lolorjake kumi in dri kwalok ro kin Ailiñ eo mokta jen air illok im kwalok nan.​—Mat. 24:45-47; 25:21; Luk 10:1-7.

2. Kwelok in kwalok nan en kar kõtõbrak ta?

² Juõn Karõk Emõn: Kwelok ko kin kwalok nan ej ñõn letok nan in rejañ, katak ko remõn, im nan in kakabilek ñõn ro im repojõk in kwalok nan. Ñe buk eo liñõri jeje ko ran otemjej ejejit ñõn jerbal eo inem emõn kajerbale. Eor ien, emaroñ jiktok jet nan in katak ko jen Ar Jerbal ñõn Ailiñ Eo, buk eo Kamanwa (ejelok ilo kajin Majõl), ak bwelen buk in Jikuul in Kwalok Nan im emaroñ jibõñ aolep ñõn air jerbal ilo ran eo. Emaroñ walok juõn joñok ekaru ñõn kwalok kilen lelok buk eo. Mokta jen air kajemlok kin jar, aolep ren kar jela wõn eo renaj jerbal iben im jikin eo renaj jerbal ie. Kwelok in ejjab aikwij aitoklok jen 15 minit. Ñe emwij, aolep ren kar emakõt ñõn ijo renaj jerbal ie.

3. Wõn ro rej bõk erron kwelok in kwalok nan?

³ Ewi Wãwen Kar Karõke? Service overseer eo, ej bõk erron lolorjake jerbal in kwalok nan. Ro rej tel kumi kein ak dri jibõñ ro air renaj jerbal iben dri kwalok ro ilo Jãdede ak Jabõt. Jet elder ro ak ministerial servant ro remaroñ jerbal iben kumi in kwalok nan eo ilo ran ko jet. Elder ro ren jerbal iben service overseer eo bwe en ejelok likjõp kin jikin ko dri kwalok ro rej kwalok nan ie ilo Jãdede im Jabõt. Jen Mande ñõn Bõlaide, service overseer eo enaj lolorjake karõk ko kin ro renaj tel kumi in dri kwalok ro.

4-6. (a) Ta mejenkajik eo ilo ar jerbal in kwalok nan im jikin eo jej kwalok nan ie an congregation eo? (b) Ta men ko remaroñ lemnok kaki ñe rej bebe kin kwelok ko jet kin jerbal in kwalok nan?

⁴ Ia im Ñãt eo Naj Kõmõni Kwelok Kein? Ijellokin an aolepen congregation eo kwelok ilo juõn wõt jikin, enañin aolep ien ej emõnlok ñõn karõk kwelok kein ilo jikin ko jet einwõt ilo imõn ro jeer im jãter bwe en emõn ar jerbal ilo jikin eo jej kwalok nan ie. Emaroñ ilo moko imõn ro jeer im jãter ak ilo jikin eo jej kwalok nan ie bwe en bolemen jerbal eo ar. Ak remaroñ bar kwelok ilo Kingdom Hall ko. Elõñ congregation ko rej kajerbal Kingdom Hall eo ñõn air kwelok in kwalok nan elikin katak eo elap im Katak kin Imõniaroñroñ eo ilo Jabõt. Karõke bwe en jab aitok ial eo ñõn jikin eo naj kwalok nan ie. Jen ien ñõn ien, remaroñ bar etale jikin ko rej kwelok ie elañe rej emõn wõt ñõn air kõtõbar aolep jikin ko rej kwalok nan ie.

⁵ Auõ eo emõntata ñõn kõmõne kwelok kein ie im jete alen ilo juõn wik enaj ekkar ñõn wãwen jikin eo rej kwalok nan ie. Kajitõk kein tok lõl remaroñ jibõñ ir ñõn beek kin ia eo im ñãt eo emõntata ñõn kõmõne kwelok ko kin jerbal in kwalok nan.

⁶ Eor ke jikin ko jet jej aikwij lali? Ta auõ eo emõntata ñõn jerbal jen im ñõn im? Emõn ke karõk juõn ien ilo jota ñõn jerbal jen im ñõn im ak bar lolok armij? Aolep karõk ko kin jerbal in kwalok nan ren walok ilo jikin kajela ko an congregation eo. Kõtõbar eo an aolep dri kwalok ro kin Ailiñ eo ej bwe en let ar jerbale jikin eo jej kwalok nan ie im bwe jemaroñ ba einwõt kar dri jilik Paul: “ejelok bar jikiõ ijõkein.”​—Rom. 15:23.

7. Ta erro eo an eo emwij jitõñe bwe en tel kumi in kwalok nan eo?

⁷ Wãwen Kõmõni Kwelok ko kin Kwalok Nan: Eo emwij jitõñe bwe en tel ilo kwelok in enaj kwalok an lukkun koutiej karõk ko jen rolul eo an Anij ilo an lukkun pojõk. Kwelok kein ren jino ilo auõ eo ejejit im nan in katak ko ren alikar im karu, 10 ñõn 15 minit. Eo ej lolorjake en or karere jikin ko renaj jerbal ie mokta jen an jino kwelok eo. Meñe jejjab aikwij kõtar ro rej rumijtok, jemaroñ jeje ilo juõn peba kin tu ia kumi eo enaj jerbal ie. Mwijin kwelok eo aolep ren mõkõj im ilok ñõn jikin eo renaj kwalok nan ie. Ejelok berre bwe kwelok in kwalok nan ko remelak renaj jibõñ aolep ñõn kwalok nan ilo ran eo.​—Ken. 11:14.

8. Ilo wãwen it ko ro im rej ber ilo ien kwelok ko kin kwalok nan remaroñ jibõñ ro rej lolorjake?

⁸ Ber ilo Kwelok in Kwalok Nan Ko: Jej aikwij jerbal iben dron. Ñe emaroñ, eo ej karõk dri kwalok ro enaj jibõñ jabrewõt im ej aikwij juõn bwe en jerbal iben. Emõn bwe dri kwalok ro im reiminene ilo jerbal in ren ber ilo kwelok in bwe ren maroñ jibõñ dri kwalok ro rekãl im ro rejañin lukkun minene ilo jerbal in. Ro im remõnõnõ in jerbal iben ro jet, jet ien, remaroñ lo elap tõbrõk. (Ken. 27:17; Rom. 15:1, 2) Aolep ren kate ir bwe ren jab rumij. Ar koutiej karõk in jen rolul eo an Anij, im ar koutiej ro jeer im jãter enaj kamakõt kij ñõn kõmõn oktõk ko ilo menin.​—2 Kor. 6:3, 4; Pil. 2:4.

9. Ta wãwen ko raurõk im pioneer ro remaroñ rejetake karõk in?

⁹ Jibõñ Jen Ro Rej Pioneer: Jibõñ jen ro rej pioneer ilo ien kwelok in kwalok nan eaurõk im ej rejañ aolep. Jemelele bwe pioneer ro eor erro ko air. Ijellokin air katak Baibel iben armij im bar lolok ir, karõk ko air ilo kajjojo ran emaroñ kitibuj air lale baamle ko air im job ko air. Inem, pioneer ro ren jab lemnok bwe rej aikwij ber ilo kajjojo kwelok kin kwalok nan im congregation eo ej karõki, elaptata elañe rej kõmõne aolep ran. Ijoke, pioneer ro renaj maroñ ber ilo jet ian kwelok ko kin kwalok nan ilo kajjojo wik. Ilo juõn wãwen, kwelok ko kin kwalok nan rej kamineneik dri kwalok ro im jelalokjen eo an pioneer ro kin Baibel eo im air iminene in kwalok nan emaroñ lap an jibõñ ro jet. Air kwalok nan aolep ien ear jibõñ ir ñõn bõk iminene ilo jerbal in kwalok nan. Remaroñ jibõñ ro jet. Kijejeto eo air ilo jerbal in kwalok nan im air bõk kwonair ilo ien kwelok ko kin kwalok nan ej juõn joñok emõn ñõn an ro jet anõke. Im en or ar kamolol kake.

10. Etke ekkar bwe aolep dri kwalok ro kin Ailiñ eo ren rejetake karõk in kin aolepen burueir?

¹⁰ Einwõt kar Jisõs im dri jilik ro an, jerbal eo ar in kwalok nan kin Ailiñ eo, ekkã ar kõmõne ilo ar etal jen im ñõn im. Kwelok ko kin kwalok nan rej ñõn ar rejañ dron im ñõn ar maroñ lo tõbrõk ilo jerbal in. Aolep dri kwalok ro kin ennan eo emõn ren rejetake karõk kein jen rolul eo an Anij ekkar ñõn joñõn air maroñ. (Jerb. 5:42; 20:20) Kij aolep jen kate kij ñõn rejetake kwelok in. Ilo ar eindrein, jemaroñ liki bwe Jeova enaj kejerammõn kij im jemaroñ kabuñburuen dri Tel eo ar, Jisõs Kraist, ilo ar kwalok ennan eo emõn kin Ailiñ eo an Anij.​—Mat. 25:34-40; 28:19, 20.