Kweilo̦kin Kwal̦o̦k Naan ko Rej ñan Katõprak Jerbal in Kwal̦o̦k Naan

1. Etke jej kweilo̦kin kwal̦o̦k naan?

¹ Juon iien, Jijej ear kweilo̦k ippãn rũkal̦oor ro an 70 m̦okta jãn aer ilo̦k im kwal̦o̦k naan. (Luk 10:1-11) Ear rõjañ im kakeememej er bwe rejjab make iaaer ilo jerbal in im bwe Jeova, ‘Irooj in jonikkan’ eo, ej tõl er. Bareinwõt, ear lel̦o̦k naanin tõl ko ñan er kõn kilen aer kõm̦m̦ane jerbal eo, im ear karõk er ilo an “karruwol̦o̦k” iaan. Eñin unin jej bar kõm̦m̦ane kweilo̦kin kwal̦o̦k naan eo ad. Ej ñan rõjañ, tõl im karõk kõj.

2. Ewi aetokin aer aikuj kõm̦m̦ane kweilo̦kin kwal̦o̦k naan?

² M̦okta, jekõn kweilo̦kin kwal̦o̦k naan ium̦win 10 l̦o̦k ñan 15 minit, ekoba iien karõk, kwal̦o̦k territory ko, im jar. Kiiõ, em̦õj ukote. Jino jãn Eprõl̦, aetokin iien ad kweilo̦kin kwal̦o̦k naan eban tol̦o̦k jãn 5 ñan 7 minit. Bõtab, el̦aññe rej kõm̦m̦ane men in ãlikin wõt kar kweilo̦k, eokwe emaroñ kadul̦o̦k. El̦aptata ke ej kab m̦õj an ro rej itõn kwal̦o̦k naan roñjake naanin tõl ko jãn Baibõl̦. Ñe ekadu iien kweilo̦kin kwal̦o̦k naan, enaaj l̦apl̦o̦k iien an aolep kwal̦o̦k. Bareinwõt, el̦aññe bainier ro ak jet rukwal̦o̦k em̦õj aer kar jino kwal̦o̦k naan, enaaj jejjo wõt minit in aer bõjrak im bar wõnm̦aanl̦o̦k wõt.

3. Ta laajrak eo emaroñ pidodo im l̦ap an jipañ rukwal̦o̦k ro?

³ Ej aikuj kon̦ iien kweilo̦kin kwal̦o̦k naan eo. Wãween in enaaj l̦ap an jipañ rukwal̦o̦k ro. Ilo elõñ eklejia ko, em̦õj aer kõjenolo̦k rukwal̦o̦k ro ñan elõñ kumi. Rej kile bwe em̦m̦anl̦o̦k ñe rejjab kõm̦m̦ane kweilo̦kin kwal̦o̦k naan eo ilo juon wõt jikin. Men in ekõm̦m̦an bwe en epaakl̦o̦k aer jibadek jikin kweilo̦kin kwal̦o̦k naan eo, im ijo rej itõn kwal̦o̦k ie. Enaaj bar m̦õkaj aer karõk doon, im pidodo an em̦m̦aan eo ej loloorjake kumi eo lale im jipañ rukwal̦o̦k ro ie. Em̦m̦aan ro rej lale eklejia remaroñ l̦õmn̦ak kõn aikuj ko an eklejia eo im pepe kõn ta eo enaaj em̦m̦an im jejjet ñan eklejia eo. Aolep rej aikuj jel̦ã ia eo renaaj jerbal ie im wõn ro m̦õttaer m̦okta jãn jar in kõjjem̦l̦o̦k.

4. Etke jejjab aikuj watõk bwe kweilo̦kin kwal̦o̦k naan edikl̦o̦k an aorõk?

⁴ Ejjab Dikl̦o̦k An Aorõk jãn Kweilo̦k ko Jet: Kar karõk kweilo̦kin kwal̦o̦k naan ñan jipañ rukwal̦o̦k ro. Im emaroñ jab aolep ro ilo eklejia eo rej pãd ilo iien in. Bõtab, ejjab mel̦el̦ein bwe edikl̦o̦k an aorõk jãn kweilo̦k ko jet. Joñan aorõkin kweilo̦kin kwal̦o̦k naan wõt kweilo̦k ko jet an eklejia kõnke ej letokin Jeova. Im ej kamaroñ kõj ñan jipañ doon ñan jerbal ko rem̦m̦an. (Hi. 10:24, 25) Kõn men in, eaorõk bwe em̦m̦aan eo ej tõl kumi in kwal̦o̦k naan ej aikuj pojak bwe naanin tõl ko ej kwal̦o̦ki ren nõbar Jeova im jipañ rukwal̦o̦k ro. Innem, rukwal̦o̦k ro rej aikuj kate er ñan pãd ilo kweilo̦kin kwal̦o̦k naan.

5. (1) Ta eddo eo an em̦m̦aan eo ej loloorjake jerbalin kwal̦o̦k? (2) Ta ko juon jeid im jatid kõrã ej aikuj kõm̦m̦ani ñe ej tõl kweilo̦kin kwal̦o̦k naan?

⁵ Men ko Em̦m̦aan eo Ej Tõl Ej Kõpooji: Bwe juon en lukkuun pojak in kwal̦o̦ke katak eo an, ej aikuj jel̦ãl̦o̦k im̦aan bwe ewõr kun̦aan. Ãindein bar ro rej tõl kweilo̦kin kwal̦o̦k naan. Ak ñe enaaj jenolo̦k jikin an kumi ko kweilo̦kin kwal̦o̦k naan, eokwe em̦m̦aan ro rej loloorjake kumi kein ak rijjipañ ro aer renaaj tõl. Bõtab, ñe aolep kumi ko rej koba, em̦m̦aan eo ej loloorjake jerbalin kwal̦o̦k naan emaroñ jitõñ juon ñan tõl kweilo̦k eo. Jet iaan em̦m̦aan ro rej loloorjake jerbalin kwal̦o̦k naan ekkã aer kõm̦m̦an laajrakin wõn ro renaaj tõl kweilo̦k in. Im rej kaddãpe ilo jikin kõjjel̦ã eo. Em̦m̦aan in ej aikuj bar kwal̦o̦k lol̦o̦kjen̦ ñe ej jitõñ em̦m̦aan ro jet ñan tõl. Ej aikuj bar keememej bwe enaaj em̦m̦an kweilo̦kin kwal̦o̦k naan eo ñe eo ej tõle em̦m̦an an kõmel̦el̦e im ejel̦ã karõk kumi eo. El̦aññe em̦m̦aan ro rej lale eklejia, rijjipañ ro aer, ak juon eo ekkar im em̦õj an peptaij rejjab maroñ tõl ilo juon iaan raan ko, em̦m̦aan eo ej loloorjake jerbal in emaroñ jitõñ juon iaan kõrã ro em̦õj aer peptaij im ekkar bwe en tõl kumi in kwal̦o̦k naan eo.—Lale katak eo, “Ñe Juon Jeid im Jatid Kõrã Ej Aikuj Tõl.”

6. Etke eaorõk bwe eo tõl ej aikuj lukkuun pojak?

⁶ Ñe ewõr kun̦aad ilo Jikuul̦in Kwal̦o̦k Naan ak ilo Kweilo̦kin Ad Jerbal ñan Anij, jej kaorõke im kate kõj ñan kõpooje. Jet iaad ekkã ad kõttar im l̦o̦k epaak iien kweilo̦k, jej kab kiiõ jino kõm̦m̦ane katak eo. Em̦m̦aan ro ewõr kun̦aaer ñan tõl kweilo̦kin kwal̦o̦k naan rej aikuj bar kaorõke eddo in aer im pojakl̦o̦k im̦aan. Kiiõ ke enaaj kadul̦o̦k kweilo̦k in, eo ej tõle ej aikuj em̦m̦an an kõppojakl̦o̦k im̦aan. Ilo wãween in, kweilo̦k eo enaaj l̦ap an jipañ aolep rukwal̦o̦k ro im enãj jejjet iien an jem̦l̦o̦k. Bareinwõt, ej aikuj kããlõt l̦o̦k im̦aan ia eo renaaj kwal̦o̦k naan ie.

7. Ta jet iaan men ko em̦m̦aan eo ej tõl kweilo̦kin kwal̦o̦k naan emaroñ kõm̦m̦ani?

⁷ Kõmel̦el̦e kõn Ta? Kõnke aolep jikin ko jej kwal̦o̦k naan ie roktak jãn doon, em̦õj an “rũkarejar etiljek im mãlõtlõt” letok naanin tõl ko ñan kajjojo iien kweilo̦kin kwal̦o̦k naan. Ilo bo̦o̦k eo, “Eñin Men ko Kwõmaroñ Ba ilo Iien Kweilo̦kin Kwal̦o̦k Naan” ej kwal̦o̦k kõn jet iaan men ko em̦m̦aan eo emaroñ kwal̦o̦k kaki. Enañin aolep iien, em̦m̦aan eo ej tõl kweilo̦kin kwal̦o̦k naan enaaj baj kõmel̦el̦e wõt. Jet iien, enaaj wõr waanjoñak ko kõn kilen lel̦o̦k bok ko. Ak waanjoñak ñan kwal̦o̦k naan kõn juon iaan pija ko rejejjet jãn Weep jait eo, jw.org/mh. Em̦m̦aan eo ej tõl kweilo̦kin kwal̦o̦k naan ej kõppojakl̦o̦k im̦aan ilo an l̦õmn̦ak kõn naanin rõjañ im tõl ko remaroñ jipañ rukwal̦o̦k ro.

8. Wãween et ko rem̦m̦antata em̦m̦aan eo ej tõl emaroñ kõjerbali ilo raanin Jãdede im Jabõt?

⁸ Ñan waanjoñak, ilo raanin Jãdede, enañin aolep rukwal̦o̦k ro rej kwal̦o̦k naan kõn Naan in Keeañ ko. Im elõñ iaan ro rej kwal̦o̦k naan in Jãdede ekkã aer jab kwal̦o̦k ilo raan ko jet ilo wiik eo. Innem, jet iien epen aer keememeji naanin ijjino ko rar kõmmãlmeli ilo iien Kabuñ an Baam̦le eo aer. Kõn men in, el̦aññe em̦m̦aan eo ej tõl ej ãliji naanin ijjino ko ilo likin Ad Jerbal ñan Anij kõn kilen leto letak Naan in Keeañ eo, men in enaaj l̦ap an jipañ rein. Bar juon wãween emaroñ kõm̦m̦ane ej ilo an kõjerbal nuuj ko rej wal̦o̦k, im iien kakkije ak holiday ko ñan bwebwenato kaki ippãn armej ro. Ak kwal̦o̦k kõn ta ko jemaroñ ba ñan ad naaj bar jepl̦aak ippãn ro rej m̦õn̦õn̦õ in ebbõk aer Naan in Keeañ. El̦aññe ewõr jet rukwal̦o̦k rar lo tõprak ilo aer kar kõjerbal Naan in Keeañ eo, em̦m̦aan eo ej tõl emaroñ kajjitõk ippãer ñan kwal̦o̦k ta ko rar kõm̦m̦ani ak kwal̦o̦k kõn iien eo rar lo tõprak. Ilo raanin Jabõt, em̦m̦aan eo emaroñ bar l̦oore ejja wãween kein wõt ñan tõl kumi eo ej kwal̦o̦k naan. Ikijjeen bokin katak ko, ãinwõt Ennaan Em̦m̦an, Roñjake Anij, im Katak ko Rem̦ool jemaroñ lil̦o̦k ñan armej jabdewõt iien. Kõn men in, ilo juon iaan raanin kweilo̦kin kwal̦o̦k naan ko, em̦m̦aan eo ej tõl emaroñ kwal̦o̦k kõn kilen lel̦o̦k juon iaan bok kein.

9. Ñe jej kũr armej ilo raanin Jãdede im Jabõt, ta ko em̦m̦aan eo ej tõl emaroñ kwal̦o̦k kaki?

⁹ El̦aññe eklejia eo ej leto letak peba in kũr ilo Jãdede im Jabõt, em̦m̦aan eo ej tõl emaroñ kwal̦o̦k kilen lel̦o̦k Naan in Keeañ eo im peba in kũr ak tũrak eo. Ak emaroñ kwal̦o̦k kõn ta ko rukwal̦o̦k ro ren kõm̦m̦ani ñe armej rej itoklimo in roñjake. Bareinwõt, emaroñ kwal̦o̦k waanjoñak ko an ro jeid im jatid me rej kaalikkar kõn aorõkin iien leto letak peba in kũr kein.

10, 11. Etke eaorõk bwe rukwal̦o̦k ro ren pojakl̦o̦k im̦aan?

¹⁰ Men ko Rukwal̦o̦k Ro Ren Kõm̦m̦ani: Ro rej pãd ilo kweilo̦kin kwal̦o̦k naan rej aikuj bar kõm̦m̦ane ijo kun̦aaer bwe en em̦m̦an kweilo̦k in. Rej aikuj pojakl̦o̦k im̦aan. Bõlen rej kõppojakl̦o̦k im̦aan ilo iien kabuñ an baam̦le eo. Ilo wãween in, kwõmaroñ kwal̦o̦k kõn men ko kwaar kõpooji ippãn rukwal̦o̦k ro jet. Juon eo ej kõppojakl̦o̦k im̦aan enaaj aikuj ebbõk an bok m̦okta jãn an itok ñan kweilo̦k in. Ñe ãindein, enaaj m̦õkajl̦o̦k ad jibadek jikin kwal̦o̦k naan.

¹¹ Bar juon men eaorõk rej aikuj kõm̦m̦ane ej m̦õkajl̦o̦k jãn an jino kweilo̦kin kwal̦o̦k naan. Em̦ool bwe jej kate kõj ñan m̦õkaj ñan aolep iien kweilo̦k. Bõtab, ñe jej rum̦wij ñan kweilo̦kin kwal̦o̦k naan, enaaj l̦apl̦o̦k jerbal ñan em̦m̦aan eo ej tõl. Etke? Eokwe elõñ men ko ej aikuj lali m̦okta jãn an karõk kumi eo. El̦aññe eiiet rukwal̦o̦k ro repãd, emaroñ jilkinl̦o̦k aolep ñan kam̦õjl̦o̦k juon iaan territory ko. El̦aññe jet rukwal̦o̦k rar etetal ñan jikin kweilo̦kin kwal̦o̦k naan eo im kiiõ ettol̦o̦k territory eo, emaroñ karõk er ippãn ro ewõr waaer. Im ñe ekauwõtata territory eo, enaaj aikuj likũt jet brother bwe ren jerbal ippãn sister ro ak ilo jikin ko repaake er. Ñan rukwal̦o̦k ro ewõr aer nañinmej ak rem̦õjn̦o̦, emaroñ lel̦o̦k ñan er territory ko rejjab utiej ak m̦õko ejjab lõñ jikinuwe ie. Im ñe ewõr rukwal̦o̦k kããl, emaroñ karõk bwe ren jerbal ippãn ro el̦ap aer imminene ilo kwal̦o̦k naan. Ak kiiõ el̦aññe ewõr rerum̦wijtok, enaaj aikuj bar kõm̦m̦an oktak. Jet iien ewõr unin ad rum̦wij. Bõtab, el̦aññe jej imminene in rum̦wij, eokwe jej aikuj kajitũkin kõj make kõn unin ad rum̦wij. Ej ke kõnke ejakol̦o̦k ad kaorõke iien kweilo̦k kein ak ej ke kõnke jaar likjab in kõppojakl̦o̦k im̦aan?

12. Ta ko kwõmaroñ l̦õmn̦ak kaki ñe kwõj make kõm̦m̦an am̦ karõk?

¹² Rukwal̦o̦k ro remaroñ make kõm̦m̦an aer karõk m̦okta jãn an jino kweilo̦kin kwal̦o̦k naan. Ak em̦m̦aan eo emaroñ karõk er ippãn bar juon. El̦aññe kwõj make kõm̦m̦an am̦ karõk, em̦m̦an el̦aññe kwõnaaj kal̦apl̦o̦k am̦ jel̦ã kajjien rukwal̦o̦k ro jet ilo am̦ jerbal ippãer im ejjab baj ippãn ro wõt kwõj epaake er. (2 Ko. 6:11-13) Kwõmaroñ ke karõk ñan jerbal ippãn rukwal̦o̦k ro rekããl ñan jipañ er bwe en em̦m̦anl̦o̦k kilen aer katakin? (1 Ko. 10:24, UBS; 1 Ti. 4:13, 15) Kanooj roñjake ñe em̦m̦aan eo ej lewaj naanin tõl ko ekoba kõn jikin eo kwõj aikuj jino jãne. Ñe ejem̦l̦o̦k kweilo̦k eo, jouj im jab ukot karõk ko ak em̦m̦an jen kajju etal ñan territory eo ad.

13. El̦aññe aolep rej kõm̦m̦ane ijoko kun̦aaer, ta tokjãn ko renaaj wal̦o̦k?

¹³ Rũkal̦oor ro 70 me Jijej ear karõk er rar ‘jepl̦aaktok ilo lañlõñ’ ãlikin aer kar kwal̦o̦k naan. (Luk 10:17) Alikkar bwe em̦m̦an an kar Jijej tõl iien kweilo̦k eo m̦okta jãn aer kar ilo̦k im kwal̦o̦k naan. Ãindeinl̦o̦k wõt, enaaj bar l̦ap tõprak ko rukwal̦o̦k ro renaaj loi ñe em̦m̦an kar tõle kweilo̦kin kwal̦o̦k naan eo. Kõn men in, aolep rej aikuj kõm̦m̦ane ijo kun̦aaer ilo iien kweilo̦kin kwal̦o̦k naan. Innem, enaaj em̦m̦an an kweilo̦k eo rõjañ, tõl im karõk kõj ñan katõprak jerbal in ad. Ta jerbal in? Ñan “kwal̦o̦k gospel in an aelõñin lañ iaolepen lal̦.”—Matu 24:14.