Box In Kajitõk

◼ Ta ennan ko remaroñ kwaloke ilo kwelok ko ñan kwalok nan?

Unin kwelok eo ñan kwalok nan ej ñan jibañ kij lalelok jerbal eo enaj walok​​—jerbal in kwalok nan. Kin men in, eo ej tel en bojak in kwalok juõn men eo ej kõketak, jejjet, im keie. Elañe unin tel in ran eo ej ekkar ñan jerbal in kwalok nan, remaroñ readi im bwebwenato kake jidik. Bõtab, kwelok eo en laptata an lale jerbal in kwalok nan, im jibañ aolep ro renaj bõk kunair ñan air bojak in kõtõbrak jerbal in ilo ran eo.​​—2 Tim. 4:5.

Remaroñ bwebwenato kake point ko rekkar jen Ad Jerbal Ñan Ailiñ Eo ñan kõmman bwe aolep ren jelã kin book in lelok eo ekãl im wãwen eo remaroñ leloke. Ilo Ran in Magazine eo remaroñ kõmman juõn demonstration kin juõn ennan jen katak eo “Ta eo Kwomaroñ Ba kin Magazine ko.” Kin jerbal in lelok men ko jet, remaroñ kwalok kin juõn ak ruo nan in jino ko jen book in Kõmmanwa me rekkar ñan territory eo ilo bukwon eo. Remaroñ bwebwenato kake ak kõmman juõn demonstration kin juõn ian wãwen ko ñan kwalok nan, einwõt wãwen eo remaroñ kajerbal Bible eo ñe rej konono ibben juõn ri mweo, ewi wãwen remaroñ jerbale juõn nan in jumae, ewi wãwen remaroñ tilmaake juõn Bible study, ak ewi wãwen remaroñ bar jeblak ibben juõn eo ear kwalok an itoklimo.

Kwelok ko ñan kwalok nan ren jab le jen 10 ñan 15 minute ko, eo ej kitibuj karõk kumi ko, lelok territory ko, im jar. Ñe emwij jar, aolep ro rej bed rej aikwij jelã kadede kin wõn ro renaj jerbal ibbeir im ia eo renaj jerbal ie, im ren etal ñan territory eo ilo mõkaj. Ilo lemnak kin kaduin kwelok eo, eaorõk bwe aolep ren itok ilo mõkaj. Ñe kwelok eo ñan kwalok nan ej walok elikin juõn kwelok an congregation eo, einwõt Katak in Imõniaroñroñ, en kadulok. Ejjab juõn men in aikwij ñan bwebwenato kin unin tel in ran eo, ke ededelok air lañliñ kin juõn bwebwenato emõn kin Jeje Ko.

Ren karõk lok iman brother ro emwij air baptais im ewõr air maroñ ñan tel kajjojo kwelok ko ñan kwalok nan. Elañe ejelok jabdewõt eo emaroñ tel ilo juõn ran, elder ro ren karõk wõn ian sister ro emwij air baptais remaroñ kõmmane ñe ewõr juõn aikwij. Ñe ej jijet wõt, sister eo emaroñ jino juõn bwebwenato ibben kumi eo kin unin tel in ran eo ak point ko jet rejejjet ñan jerbal in kwalok nan, ilo an kõmman bwe nan ko an ren kadu wõt. En kalibubuik bõran.

Kwelok ko ñan kwalok nan rej ien ko remõn ñan ad bõk kõketak im kõmman bwe jen bojak ñan bõk kunad ilo jerbal in. Ñe ej emõn an bojak ri tel eo, enaj lap an aolep armij bõk tokjen.