Wãween Kwõmaroñ Bõk Tokjãn jãn Kumi in Kwal̦o̦k Naan eo Kwõj Pãd Ie
1. Ta tokjãn ko rem̦m̦an jaar loe jãn karõk eo kõn Book Study me remaroñ bar wal̦o̦k ilo kumi in kwal̦o̦k naan eo ad?
1 Ewõr ke jabdewõt men kwõj oñkake kõn kar karõk eo kõn Book Study? Ear em̦m̦an karõk in kõnke ear dik oran armej ro ilo kumi in book study ko. Kõn men in, ear pidodo ad jel̦ãl̦o̦k kajjien doon im epaakel̦o̦k doon. Men in ear jipañ kõj bwe en pen wõt im kajoor tõmak eo ad. (JK. 18:24) Eo ekõn tõl book study eo ad ear bar pidodo an jel̦ã ta ko rej wal̦o̦k ñan ro uwaan book study eo ak aikuj ko aer. Kõn wõt men in, ear jel̦ã ta naan in rõjañ ko emaroñ lel̦o̦k ñan er kajjojo. (JK. 27:23; 1 Pi. 5:2, 3) Meñe ejako karõk eo kõn book study ak jemaroñ bar lo tokjãn kein rem̦m̦an ilo kumi in kwal̦o̦k naan eo jej pãd ie.
2. Ta ko jemaroñ kõm̦m̦ani bwe jen epaake ro ilo kumi in kwal̦o̦k naan eo ad me enaaj jipañ kõj ñan pen wõt ilo tõmak?
2 Men ko Jemaroñ Kõm̦m̦ani: Oran armej ro ilo kumi in kwal̦o̦k naan ko ekkã an joñan wõt oran kumi in kar book study ko. Ñe jej jerbal ippãn ro jet ilo kwal̦o̦k naan, jemaroñ jino epaake er. (Pil. 1:27) Jete de armej ilo kumi in kwal̦o̦k naan eo kwõj pãd ie em̦õj am̦ jerbal ippãer? Kwõmaroñ jel̦ãl̦o̦k ‘bũruon’ ak kajjien aolep ñe kwõj jerbal in kwal̦o̦k naan ippãer. (2 Ko. 6:13, UBS) Bareinwõt, jet iien em̦m̦an bwe jen kũr juon jãn kumi eo ad ñan kobatok ilo Iien Kabuñ an baam̦le eo ad ak bwe en itok im m̦õñã ippãd. Ilo jet eklejia ko, kajjojo kumi in kwal̦o̦k naan ko rej naajdik jabdewõt eo ej etal im kõm̦m̦an katak ilo eklejia eo aer. Im ñe ej an juon iaan kumi ko ñan naajdik ri lotok eo, kumi eo ej kuk ippãn doon ñan m̦õñã im rõjañ doon. Im meñe ri lol̦o̦k eo ejjab maroñ pãd ilo iien m̦õñã eo ak rej wõnm̦aanl̦o̦k wõt.
3. Ewi wãween kumi in kwal̦o̦k naan ko remaroñ bõk jipañ im naan in rõjañ?
3 Eklejia ko rej kiiõ kweilo̦k ippãn doon ruo wõt alen ilo juon wiik. Bõtab, ejjab mel̦el̦ein bwe edikl̦o̦k an ri kwal̦o̦k naan ro bõk jipañ im naan in rõjañ jãn em̦m̦aan ro rej lale eklejia. Em̦m̦aan ro rej bõk eddon kumi in kwal̦o̦k naan ko rej pãd ie kar jitõñ er ñan rõjañ im kakajoor kajjojo ri kwal̦o̦k ro ilo kumi eo aer. Im bwe ren katakin im jipañ er kajjojo ilo jerbal in kwal̦o̦k naan. El̦aññe em̦m̦an eo ej lale kumi eo am̦ ejjañin jerbal ippam̦, eokwe em̦m̦an bwe kwõn kajjitõk ippãn ñe komiro maroñ karõk juon iien ñan jerbal ippãn doon ilo kwal̦o̦k naan. Bareinwõt, eo ej bõk eddon aolep kumi in kwal̦o̦k naan ko (service overseer), ej aikuj lol̦o̦k kumi kein im jerbal in kwal̦o̦k naan ippãer ilo juon iaan weekend ko im en kõm̦m̦ane men in kajjojo allõñ. Im ñan eklejia ko me jejjo wõt kumi in kwal̦o̦k naan ko ie, eokwe in emaroñ kõm̦m̦an karõk bwe en lol̦o̦k kumi kein kajjojo ruo alen ilo juon iiõ. Kwõj ke kõm̦m̦an am̦ karõk ñan jerbal ippãn ñe ej lowõj kumi eo am̦?
4. (1) Ewi wãween kar kõm̦m̦an karõk kõn kweilo̦k in kwal̦o̦k naan? (2) Etke em̦m̦an bwe jen kõjerbale m̦oko im̦õd ñan kõm̦m̦ane kweilo̦k in kwal̦o̦k naan?
4 Ekkã an jipañ ñe elõñl̦o̦k jãn juon jikin me kajjojo kumi rej kweilo̦k in kwal̦o̦k naan ie ilo weekend. Im meñe eoktak jikin ko ak juon wõt awa in aer jinoe. Ilo wãween in, epidodo an aolep ri kwal̦o̦k naan ro tõpar jikin ko me rej kweilo̦k in kwal̦o̦k naan ie im jikin ko rej kwal̦o̦k naan ie. Emaroñ bar m̦õkaj aer karõke doon bwe ren jino jibadekl̦o̦k ijo rej ilen kwal̦o̦k ie. Bareinwõt, eo ej bõk eddon kumi eo enaaj pidodo an jipañ im rõjañ ro uwaan kumi eo an. Bõtab, ñe ej menin aikuj bwe ruo kumi ak elõñl̦o̦k ren koba ippãn doon, eokwe ekkar bwe ren kõm̦m̦ane men in. Ak ta el̦aññe aolep ro ilo eklejia eo rej koba ippãn doon ilo kweilo̦k in kwal̦o̦k naan ilo Jãdede eo m̦oktata kajjojo allõñ ak ãlikin kweilo̦k in Jabõt? Eokwe, em̦m̦an bwe ri kwal̦o̦k naan ro ren jijet ippãn kumi eo aer. Im en wõr jejjo minit ñan an em̦m̦aan ro karõke ro ilo kumi eo rej bõk eddon m̦okta jãn aer kajem̦l̦o̦ke kweilo̦k in kwal̦o̦k naan eo kõn jar.—Lale bo̦o̦k eo “Jemaroñ Ke Kõjerbale M̦weo Im̦õm̦?”
5. Ta eo jemaroñ lõke meñe ejako karõk eo kõn Book Study?
5 Meñe karõk eo kõn Book Study ejako ak jemaroñ lõke bwe Jeova ej wõnm̦aanl̦o̦k wõt im letok jabdewõt men jej aikuji ñan kõm̦anm̦an ankilaan. (Hi. 13:20, 21, UBS) Jejamin aikuj kõnke Jeova ej kõjparoke kõj. (Sam 23:1) Elõñ tokjãn ko jenaaj iiooni jãn kumi in kwal̦o̦k naan eo jej pãd ie. Ñe jej kate kõj bwe en ‘l̦ap ad kallib, enaaj l̦ap ad m̦adm̦õd im jeraam̦m̦an.’—2 Ko. 9:6.
[Bo̦o̦k eo ilo peij 6]
Jemaroñ Ke Kõjerbale M̦weo Im̦õm̦?
Jet eklejia rej kobaik kumi in kwal̦o̦k naan ko ilo Jãdede im Jabõt kõn an jabwe m̦oko ñan aer kõm̦m̦ane kweilo̦k in kwal̦o̦k naan eo ie. Kweilo̦k in kwal̦o̦k naan ej bar juon iaan karõk ko an eklejia eo, kõn men in ej juon jeraam̦m̦an l̦apl̦ap ñe jej kõjerbale m̦oko im̦õd ñan kweilo̦k in kwal̦o̦k naan. Jemaroñ ke kõjerbale m̦weo im̦õm̦ ñan men in? Jab ãliklik ak jook kõn m̦weo im̦õm̦. Ro rej lale eklejia eo renaaj lale ia eo m̦weo im̦õm̦ ej pãd ie im men ko jet m̦okta jãn aer kããlõt jikin kweilo̦k in kwal̦o̦k naan eo. Rar bar ãindein m̦oktal̦o̦k ke rar kããlõt jikin book study ko. Ñe kokõn̦aan kõjerbale m̦weo im̦õm̦ ñan kweilo̦k in kwal̦o̦k naan, kwõmaroñ kõjjel̦ãik eo ej bõk eddon kumi in kwal̦o̦k naan eo kwõj pãd ie.