Wãwen eo Lajrak in Congregation Book Study eo ej Jibañ Kij
1. Ewi wãwen kwelok ko ad lalem rej jibañ kij?
1 Kajjojo kwelok ko ad lalem ilo juõn week reinjuõn ilo wãwen in kõmmane katak ko im kin karõk eo. Bõtab, aolepeir raorõk ñan jibañ kij bwe “jen lale dron, im kõkãtok dron ñõn yokwe im jerbal ko remõn.” (Hib. 10:24, 25) Ta jet ian wãwen ko rejej uan im ewõr tokjeir kin lajrak in Congregation Book Study?
2. Ta tokjen ko rej walok jen ad kwelok ilo juõn kumi in book study edik?
2 Jibañ ñan Wõnmanlok ilo Men Ko Lor Jitõb: Oran ro rej kwelok ilo juõn book study ekkã an diklok jen ro rej bed ilo kwelok ko jet an congregation eo. Men in ej kõmman bwe en bidodolok ad kaddek jimjera ko me remaroñ jibañ kij ilo men ko lor jitõb. (Ken. 18:24) Emwij ke am kate yuk ñan jelã kajjen aolep ro rej bed ilo kumi in book study eo am, bõlen ilo am kajitõk ibbeir kajjojo ñan jerbal ibbam ilo jerbal in kwalok nan? Lajrak in book study in ej bareinwõt kamaroñ ri tel eo an book study eo ñan jelã kin bed ak wãwen ko rejej uan an armij ro kajjojo ilo kumi eo im ñan lelok ñan ir nan in rejañ ko.—Ken. 27:23.
3. Ewi wãwen lajrak in book study eo ej rejañ ri katak Bible ro ñan air uak im bareinwõt bed ilo kwelok eo?
3 Emwij ke am kirtok ri katak Bible ro am ñan kwelok ibbam ilo book study eo? Ro rej itoklimo ak re ãliklik in bed ilo kwelok ko relaplok, remaroñ diklok air ikkũmkũm in bed ilo juõn kwelok edik, elaptata ilo mweo imõn juõn armij. Mejatoto eo emãnãn emaroñ kabidodolok an ro redik im ro rekãl bõk kunair im uak. Im kinke edik wõt kumi eo, elõñlok ien ko remõn rej bellok ñan ad uak im ilo wãwen in kaibujuij Jehovah.—Sam. 111:1.
4. Lajrak in book study eo emaroñ keie ilo wãwen et ko?
4 Book study ko ekkã air bed ilo elõñ jikin ko ebidodo tõbari ilujen territory eo ebed ilo kajjojo jikin ko rebake ri kwelok ro. Meñe ejjab aolep remaroñ bed ilo book study eo ebaktata ñan moko imwiir, ak ilo ad kwelok ilo book study eo me kar kõlajrake ñan kij emaroñ diklok ad itoitak jen ad bed ilo kwelok ko jet an congregation. Remaroñ bar kajerbal jikin book study eo einwõt jikin eo ñan kwelok kin jerbal in kwalok nan.
5. Ewi wãwen jemaroñ bõk jibañ kin jerbal in kwalok nan jen ri tel in book study eo ad?
5 Jibañ kin Jerbal in Kwalok Nan: Eo ej tel book study eo ej itoklimo ñan jibañ kajjojo ian armij ro bwe en ekkeini, ewõr tõbrak, im en mõnõnõ in bok kunan ilo jerbal in kwalok nan. Inem, ej kate in jerbal ibben aolep ilo kumi eo, im lelok jibañ ilo wãwen ko reinjuõn ilo jerbal in kwalok nan. Elañe kwoj lo bwe ebin ñan kõmmane juõn wãwen ikijen jerbal in kwalok nan, einwõt kõmman bar jeblak ko, kejelãik eo ej tel book study eo am. Bõlen, emaroñ karõk yuk ñan jerbal ibben juõn ri kwalok eo ewõr an iminene ilo kumi eo. Kwomaroñ kakõmõnmõnlok kabel eo am ñan katakin ri katak Bible ro am ilo am lukkun lale kõl ko remõn ri tel in book study eo am ej kajerbali ñe ej kõmman book study eo.—1 Kor. 4:17.
6. Etke jej aikwij in kortokjen lajrak in book study eo ilo elap wãwen ko?
6 Congregation Book Study eo ej juõn jerammõn elap! Lajrak in ej kwalok yokwe jen Jehovah ej jibañ kij bwe jen jab lõkatip im buñ ilo jitõb ilo ran kein ebin jej bed ie.—Sam. 26:12.