Box In Kajitõk

◼ Ñããt enaj ekkar bwe ren kajutak bar juõn kumi in Congregation Book Study?

Ren lemnak in kajutak juõn kumi ekãl ñe ej juõn men in aikwij ñan kejbãrok bwe ro rej kwelok en tarrin 15 ak eietlok ilo kajjojo jikin book study, ekoba Kingdom Hall eo. Etke rej rejañ kin men in?

Ñe rej kõmman bwe kumi in Congregation Book Study ko ren dik, enaj emõnlok an eo ej tel maroñ lale kajjojo ri kwelok ro kwelok. Bareinwõt, enaj wõr ien eo emõn ñan an aolep uak ilo juõn wãwen ej emõn ñan kwalok tõmak eo air. (Hib. 10:23; 13:15) Ilo an wõr kumi ko redik ilo elõñ jikin ko ilo territory an congregation eo ej kõmman bwe en bidodo an armij bed ilo Congregation Book Study im kwelok ko in kwalok nan. Congregation ko me rar kalõñlok jikin book study ko rar lo bwe oran ri kwelok ro ear laplok bareinwõt.

Emaroñ wõr wãwen ko rejej uair me rej kõmman an emõn kajutak bar juõn kumi, meñe enaj ja dik wõt. Men in emaroñ mol ilo juõn jikin ejenolok im etolok ak elañe jikin ko kiõ robrak ak ejjab bwe jikin jijet. Ñe ewõr juõn aikwij, remaroñ kajutak juõn kumi me ej kwelok ilo ran ñan tokjen eo an ritto ro, ri jerbal ro rej jerbal ilo boñ, ak sister ro me lõmaro beleir rejjab Ri Kennan ro.

Kajjojo kumi in book study ej aikwij wõr jet ri kwalok ro rekajur ilo jitõb im rekijejeto im bareinwõt juõn ri tel eo ewõr an maroñ im juõn eo ej read. Brother ro rej aikwij jibadõk air tellokin kajejjet aikwij kein ilo congregation eo.

Elder ro remaroñ jibañ congregation eo ñan kõmman wõnmanlok ilo air kõmman bwe en emõn kilepen kumi in book study ko ilo congregation eo im ej emõn air kejbãroke ilo jitõb im bwe rej kwelok ilo jikin ko ebidodo tõbari. Ñe ekkar, ren kajutak kumi ko rekãl bwe aolep ren maroñ bõk tokjen jen karõk in ejej uan ilo jitõb. Kwomaroñ ke kõtlok air kajerbal mweo imõm einwõt juõn jikin book study? Elõñ ro rar kõmmane rar lo jerammõn ko ilo jitõb.