Kwomaroñ ke Kõtlok ñan Air Kajerbal Mweo Imõm?
1 Ilo ebeben eo kein kajuõn, elõñ Ri Christian ro rar kõtlok ñan air kajerbal moko imwiir einwõt jikin kwelok ko ñan congregation eo. (1 Kor. 16:19; Kol. 4:15; Pail. 1, 2) Ilo jet congregation ko rainin, ejabwe jikin ko ñan kumi in Congregation Book Study ko im kwelok ko ñan kwalok nan. Men in emaroñ kõmman bwe 30 ak elõñlok armij ren bed ilo jet kumi in book study ko, ele jen oran in 15 me kar karõke.
2 Juõn Jerammõn Emõn: Kwonañin ke kar lemnak ñan kõtlok air kajerbal mweo imõm einwõt juõn Congregation Book Study? Juõn room ebwe an kilep im erreo, emeram, im emõn an toortok kõto ie ej juõn jikin kwelok emõn. Kinke book study eo ej juõn kwelok an congregation eo im ej mõttan karõk eo an Jehovah ñan katakin armij ro an, ej juõn jerammõn emõn ñan an wõr juõn book study ilo mweo imõm. Elõñ rar ba bwe rar bõk tokjen ko ilo jitõb ilo air kabellok moko imwiir ilo wãwen in.
3 Elañe kwoj lemnak bwe ekkar mweo imõm, joij im kejelãik elder ro. Rej maroñ in bukõti jikin ko jet. Elañe ejjab maroñ wõr juõn book study ilo mweo imõm, emaroñ ke wõr kwelok ko ñan kwalok nan ie? Meñe ejelok juõn aikwij ilo tõre in, elder ro renaj mõnõnõ in jelã bwe mweo imõm ebellok ñan air kajerbale. Kwomaroñ lañliñ kin jerammõn eo ilo ran ko renaj itok.
4 Kwalok Mwil Emõn: Ñe komij kwelok ilo mweo imõn juõn armij, aolep ro rej kwelok ie rej aikwij kwalok air kautiej men ko mweien armij eo. Ro jemen im jinen rej aikwij kõmman bwe ajiri ro nejiir ren bed wõt ilo jikin eo kar karõke ñan katak ie, im jab deloñ ilo jikin ko jet ilo mweo. Komij aikwij bareinwõt lemnak kin ro ri turiir, im bõprae ami kabañ ir.—2 Kor. 6:3, 4; 1 Pit. 2:12.
5 Dri Hibru 13:16 ej rejañ kij bwe jen jab meloklok “kin kõmõnmõn emõn im lelok ñõn ro jet, bwe kin men in katok ko eirwõt Anij ej buñburuen.” Kabellok mweo imõm ñan air kajerbale ñan juõn jikin kwelok an congregation eo ej juõn wãwen emõn ñan lelok ñan ro jet men ko remõn im ñan “kaibujuij Jeova kin mweiõm.”—Ken. 3:9.