Kwon Bolemen ilo Jerbal in Kwalok Nan eo Am

¹ Lañ ej kilmejlok, im juõn ainikien ekamijak ej laplok ñan juõn joñan elap. Juõn kõdo einwõt baat ej wanliñlok. Ta eo? Juõn jar in tarinae in million locust ko ej itok ñan bõktok jorrãn ñan ene eo! Pija in me ri kanan Joel ear kwalok kake ej jejjet kitien ilo ran kein ilo jerbal in kwalok nan eo an ri kabit ri karejar ro an Anij im ro mõttair, jar eo elap.​—Joel 2:9.

² Jab einwõt lukkun locust ko, eo mejenkajjik eo an wõt ej ñan mõñã, kij einwõt ri karejar ro an Jehovah jej itoklimo kin mour ko an ro jej kwalok nan ñan ir. Jekõnan jibañ ro jet ñan katak kin mol ko raibujuij ko rej bed ilo Nan in Anij im ñan bõk buñten ne ko me renaj tellok ir ñan bõk lomor eo indio. (John 17:3; 1 Tim. 4:16) Kin men in, jekõnan bwe en bolemen wãwen eo jej kwalok nan. Jekdon ta kilen kwalok nan eo jej kajerbale, jej aikwij lemnak elañe jej kõmmane ilo wãwen eo im ilo ien eo me enaj bõktok tokjen ko remõntata. Kinke “wãwen lal in ej oktaklok,” ej emõn ñan etale kõl ko kilen ad kwalok nan ñan kõmman bwe jen jelmae aitwerõk eo bwe en bolemen ad kwalok nan ilo joñan eo elaptata.​—1 Kor. 7:31 (New World Translation).

³ Meñe jej kate kij ñan iion armij ilo elõñ wãwen ko, jerbal in kwalok nan jen em ñan em ej jerbal eo elaptata ilo jerbal in kwalok nan eo ad. Kwoj lo ke bwe ekkã an armij jako ak rej kiki wõt ñe kwoj lolok ir? Men in elap an kabwerer, kinke kwo jab maroñ jaketo-jaketak ennan in news eo emõn ibbeir! Ewi wãwen kwomaroñ jelmae aitwerõk in?

⁴ Kwon Jelã Ukoktak im Kwon Kõmmanwa: Ilo Israel ilo ebeben eo kein kajuõn, ri eñwõd ro rar eñwõd ilo boñ. Etke ilo boñ? Meñe ear jab juõn ien eo emõntata ñan ir, ekar ien eo emõntata ñan kõkkojek elõñ ik ko. E kar ien eo elaptata an bolemen. Ilo an konono kin manit in, Watchtower eo ilo kajin English an June 15, 1992 (Imõniaroñroñ December 1, 1992), ear ba: “Kij bareinwõt jej aikwij katak kin jikin ko jej kwalok nan ie, bwe jen ilok in eñwõd ie, ilo nan in kõkkar, ilo ien en ñe armij ro rej bed ilo moko imwiir im rej kadeloñ kij.” Ilo elõñ bukwon ko, bõlen armij rej bed ilo moko imwiir ñe jej lolok ir ilo jibboñ in Saturday im Sunday, ak rejjab lukkun mõnõnõ kin ad kar itok ilo ien en. Elañe ej eindein ilo bukwon eo am, kwomaroñ ke ukõt ien am lolok ir ñan ien ko tokelik ilo jibboñ ak meñe ilo elikin raelep? Men in ej juõn wãwen emõn ñan kalaplok ad bolemen ilo jerbal in kwalok nan eo ad im bareinwõt ñan kwalok ad lemnak kin ro ri turid, eo ej juõn men in kamol kin yokwe eo emol in Christian.​—Mat. 7:12.

⁵ Ilo Pilippai 4:5, ri jilek Paul ear kakememej kij bwe jej aikwij kõmman bwe ad ‘kamanwa en walok ñõn armij otemjej.’ Ilo burukuk ibben nan in tel in ekakõrmol, jekõnan bwe jen jokkin wõt juõn im en wõr ad kõmmanwa ilo kõl ko jej kajerbali ñe jej kajejjet jerbal in kwalok nan eo ad ilo kijejeto. Jejjab kõnan ‘drebij jen kom jabrewõt men in kakajuror, a I ar kwalok ñõn kom, im katakin kom ilo bwilij, im jen mweo ñõn mweo,’ ak jekõnan kõmmane ilo ien ko rej kõmmanwa im enaj bolemen. (Jerbal 20:20) Einwõt ri eñwõd ro ilo Israel ilo ebeben eo kein kajuõn, jej itoklimo in ‘eñwõd’ ilo ien ko ñe enaj laptata an bolemen, jab ilo ien ko jej lo bwe enaj emõntata ñan kij make.

⁶ Ta oktak ko jemaroñ kõmmani? Ekkã, an kwelok ko ñan kwalok nan walok ilo 8:30 a.m. ilo Saturday im Sunday, elikin men in kumi eo ej kajju im kwalok nan jen em ñan em ilo territory eo. Bõtab, jet kumi in elder ro rar karõk bwe kumi eo en bõk kunan ilo wãwen ko jet ilo jerbal in kwalok nan, einwõt kwalok nan iturin ial, business territory eo, ak kõmman bar jeblak ko, mokta jen rej etal jen em ñan em ilo jikin jokwe ko an armij. Oktak rot kein remaroñ kõmman bwe en laplok an keie jerbal in kwalok nan eo ad jen em ñan em.

⁷ Kwon Kwalok Lolokjen im Jelã Kilen: Ñe jej lolok armij jen em ñan em, e kajjo wãwen air emmakit ñan ennan eo ad. Jet ri mweo rej mõnõnõ in roñjake, ro jet rejjab kea, im jejjo remaroñ illu ak kõnan akwel. Ilo case eo eliktata, ilo peij 7 ilo book in Reasoning From the Scriptures (Kõmmanwa Jen Jeje ko), ej kakememej kij bwe jejjab bukõt ad “ ‘win ilo akwelel ko’ ibben armij ro rejjab kwalok air kautiej mol eo.” Elañe ri mweo ej illu, ej men eo emõntata bwe jen etal. Jen jab kaillu armij ilo ad jibed ir bwe ren bwebwenato ibbed ak bõk lemnak eo ad. Jejjab jibed armij bwe ren roñjake ennan eo ad. Men in ejjab juõn men in kõmmanwa im emaroñ kõmman abañ ko ñan Ri Kennan ro jet im jerbal eo ad.

⁸ Jemaroñ kalaplok ad bolemen ilo ad kwalok lolokjen ñe jej jerbal jen em ñan em. Kwon lale ñe kwoj kebak juõn em. Aolep curtain ko rej kilek ke? Ejelok ke keroro iloan? Men in emaroñ kalikar bwe ro ilo mweo rej kiki wõt. Ilo mol, enaj wõr bwebwenato ko rebolemen lok ibben ri mweo elañe jej jeblak ilo bar juõn ien. Bõlen enaj emõnlok ñan le jen mwein ilo ien in, im je number in mweo. Kwomaroñ bar lale mweo mokta jen kwoj ilok jen territory eo ak je bwe ren bar lolok mweo ilo awa ko tok elik.

⁹ Wãwen ko remaroñ walok ñe jej kworuji juõn armij ilo jab kar karõk kake ak kabañ e. Emaroñ walok an abõnõnõ ak illu. Ewi wãwen jen emmakit? Jabõn Kennan 17:27 ej kakabilek: “Eo ej kemer buruen, e juõn armij in jelalokjen.” Meñe jejjab jolok ad bwid kin jerbal in kwalok nan eo ad, emol jemaroñ jolok ad bwid bwe jaar itok ilo juõn ien ejjab emõn. Ilo joij jemaroñ kajitõk elañe bar juõn ien ej emõnlok im ba bwe kwoj mõnõnõ in bar jeblak. Juõn nan emol ilo juõn ainikien ejoij kin am itoklimo ekkã an kainemõn juõn armij rot in. (Jabõn Kennan 15:1) Elañe ri mweo ej jiroñ kij bwe ekkã an jerbal ilo boñ, kwomaroñ je juõn note im likiti ibben territory card eo bwe tokelik remaroñ lolok e ilo juõn ien ejejjet.

¹⁰ Kinke elõñ armij rejako ilo ien eo mokta ñe jej lolok ir, jej aikwij kõmman jibadbad ko relaplok ñan iion ir ñan jaketo-jaketak ennan in lomor eo ibbeir. (Rom. 10:13) Ilo wãwen in bareinwõt, jej aikwij kwalok lolokjen. Elañe jejjab maroñ iion armij eo elikin jaar lolok e ilo ien ko reoktak ilo juõn ran, einwõt ilo jota, kwomaroñ iion ri mweo ilo am kajerbal telephone. Elañe jab, kwomaroñ door juõn tract ak handbill ilo kejam eo ilo juõn wãwen ejjab alikar, elaptata elañe emakijkij am jerbal ilo territory eo. Emaroñ ilo ien eo tok juõn ñe jej jerbale territory eo jenaj maroñ iion armij eo.

¹¹ En Emõn Mwilõm im Kwalok Kautiej: Ikijen kõkkar ko remõn jemaroñ bõprae an wõr kumi ko relap me rej koba ibben don ilo territory eo. Jet ri mweo remaroñ eñjake air ekkõl ñe elõñ wa car im van ko rej tõkeãktok iman mweo imwiir ilo juõn kumi elap in ri kwalok ro. Jejjab kõnan kwalok bwe jej einwõt “nitbwili” jikin jokwe ko. Karõk ko kin jerbal ilo territory eo emõnlok air kõmmani ilo kwelok ko kin kwalok nan. Kumi ko redik in ri kwalok ro, einwõt juõn family, ediklok an kakkor armij ro im ediklok jerbal ñan bar kõmman karõk ñe rej jerbale territory eo.

¹² Bwe en kwon men ko ej aikwiji bwe ro jemen im jinen ren lale mwilin ajiri ro nejiir ñe rej jerbal ilo territory eo. Ej aikwij emõn mwilin ajiri ro ñe rej etal ibben ritto ro ñan juõn em. Ren jab kõtlok an ajiri ro ikkure ak anemkwoj air etetal, im ilo wãwen in kõmman bwe ro ri turin ak armij ro rej etetal bajjek ren reitok.

¹³ Elõñ rar lo tokjen ko remõn ilo air kebak armij ijo jabdewõt rej lo armij ro ie​—iturin ial ko, ilo jikin park wa ko, im ilo jikin ko jet, Ilo wãwen in, bareinwõt, jekõnan kwalok nan ilo juõn wãwen emõn, jab ikijen nan ko ad wõt ak bareinwõt ilo ad kwalok kõmmanwa. Jet congregation ko me elõñ jikin kwalok nan ilobwilij ibbeir rar karõke jikin kein ilo territory ko. Inem rej lelok juõn territory card ñan juõn ri kwalok ak juõn kumi. Men in ej kabidodoik air jerbal ilo bolemen ilo territory eo im bõprae bwe en le jen joñan an lõñ ri kwalok ro rej jerbal ilo ejja jikin eo im ilo ejja ien eo wõt, ilo errã ibben nan in kakabilek eo ilo 1 Korint 14:40: “A ren kõmõn men otemjej ekar im ilo lajrõk.”

¹⁴ Baotokid en ien otemjej kwalok ad kautiej im tellokin ri kwalok ro rej inek etan Jehovah. Ejja men eo ej jerbal ñan kein jerbal ko jej kajerbali. Ieb ko remor im Bible ko rebotak rej bõk jen ennan in Ailiñ eo. Rej ba bwe baotokid im elid “rej juõn wãwen emõkaj ñan lelok kamelele ko ñan armij ro ibelakin kin wõn im ta kwe im ijo kwoj kwon ie ilo lajrak in men ko.” Kin men in, baotokid en jab jabde, im bareinwõt le jen joñan an tõrejap, ak ien otemjej “ami etetal en ekar ñõn gospel an Kraist.”​—Pil. 1:27; keidi 1 Timothy 2:9, 10.

¹⁵ Ilo 1 Korint 9:26, ri jilek Paul ear ba: “Inem ein drein ña ij etõr, jab einwõt I toñõñ; ein drein ij jekanunõk, im jab einwõt dreñlok kõto.” Ilo kajeoñwe Paul, emwij ad bebe ilo buruõd bwe en bolemen im keie jerbal in kwalok nan eo ad. Ñe ej wõr kunad ekijejeto ilo jerbal in kwalok nan einwõt mõttan “jar in tarinae in locust ko” an Jehovah rainin, jen kajerbal ad kõmmanwa im lolokjen in Christian eo ad ñe jej bõklok ennan in lomor eo ñan aolep ilo territory eo ad.