Kajerbal Ien eo Am ilo Juõn Wãwen Ekeie

¹ Aolep armij ewõr juõn wõt joñan in awa ko remaroñ kajerbali kajjojo week. Mõttan eo jej kajerbale ñan kajededlok news eo emõn elaptata an aorõk kinke jej kajerbale ien ilo juõn jerbal in lomor. (Rom 1:16) Jej kwalok ad kamolol kin men in ilo ad kebojak ilo emõn ñan jerbal in kwalok nan, mõkaj ñan kwelok ko in kwalok nan, im ad ilok ñan territory eo ilo mõkaj. Emõn lok kwalok nan jen ad kõttar bajjek. Kinke Jehovah ear katakin kij bwe “Eor ien ñõn jabrewõt men,” jej aikwij kortokjen ien eo jaar kajenoloke ñan jerbal in kwalok nan.​—Ekk. 3:1.

² Kajerbal Ien Eo Am ilo Meletlet: Elõñ jerammõn ko rej itok ñe jej lor juõn schedule me ej kõtlok bwe jen keini ad bõk kunad ilo jerbal in kwalok nan. Ilo mol, tokjen ko remõn jej kõtõbraki renaj ekkar ñan joñan ien jaar kajerbale ilo jerbal in kwalok nan. Ilo ad kõmman jet oktak ko ilo schedule eo ad, jemaroñ ke kalaplok ien eo jej kajerbale ilo kwalok nan? Ñan wanjoñok, elikin jerbal in leto-letak magazine ko ilo Saturday, jemaroñ ke bõk jidik ien ñan kõmman jet bar jeblak ko? Elañe etto ad kwalok nan jen em ñan em ilo Sunday, jemaroñ ke kajerbal jet ien ñan bareinwõt kõmman bar jeblak ko ak ñan kõmman juõn Bible study? Ijellokin jerbal in kwalok nan jen em ñan em jemaroñ ke bareinwõt kajerbal jidik ien ñan kwalok nan iturin ial? Ilo wãwen kein, jenaj maroñ kakõmõnmõnlok jerbal in kwalok nan eo ad.

³ Ñe jej bed ilo jerbal in kwalok nan, jemaroñ kokkure ien ko raorõk elañe jejjab kejbãrok. Emol, ñe enana lañ, juõn ien kakije ekadu emaroñ kemoururi kij im jibañ kij bwe jen maroñ wõnmanlok wõt. Bõtab, kwon jokkin wõt juõn bwe ien kakije rot kein remaroñ jab juõn men in aikwij.

⁴ Ilo yiõ ko rej kab motlok ej binlok ad lo armij ilo moko imwiir. Ñan kamadmõde wãwen in, elõñ ri kwalok ro rej etal jen em ñan em ilo bar juõn ien ilo ran eo. Etke kwojjab kajeoñ in kwalok nan ilo elikin raelep ak ñe ejota lok?

⁵ Emõnlok elañe jejjab bwebwenato ibben don ñe jej kwalok nan iturin ial. Jen an eindein, jutak etto lok jen don im kebak armij bwe kwon maroñ jino juõn bwebwenato ibbeir. Ilo wãwen in kwomaroñ kajerbal ien eo ilo juõn wãwen ebolemen im kwonaj bõk elaplok lañliñ jen jerbal eo.

⁶ Bõk Ien ko Remõn ñan Kwalok Nan: Ke juõn ri mweo ear ba bwe ear jab itoklimo, juõn Ri Kwalok ear kajitõk elañe ear wõr jabdewõt ro jet ilo mweo me emaroñ bwebwenato ibben. Men in ear tellok ñan an bwebwenato ibben leo bõran family eo, eo ear nañinmij iumin juõn ien eaetok im ear aikwij babu wõt. Kejatdikdik eo me Bible ej konono kake ear kajeblak kõnan eo an ñan mour. Ejjabto tokelik ear maroñ jerkak jen bed eo, bed ilo kwelok ko ilo Kingdom Hall eo, im jaketo-jaketak kejatdikdik eo an ekãl ibben ro jet!

⁷ Juõn jiroñ ri kwalok ear jerbale nan in rejañ eo ñan kwalok nan juõn awa mokta jen ien Congregation Book Study. Ilo mweo eo mokta, ear iion juõn jiroñ 13 an yiõ eo ear emõn an roñjake im ear bõk kein an read. Ran eo juõn ilo school, jodikdik Ri Kennan eo ear lo ejja jiroñ eo wõt. Ejjabto elikin, ear tilmaake juõn katak kin Bible ibben, im jiroñ eo ear mõnõnõ.

⁸ Kõmman Bwe Ien eo En Ewõr Tokjen: Ad keini ad bõk kunad ilo jerbal in kwalok nan enaj jibañ kij ñan kaddek kabel ko ad ñan kwalok kin news eo emõn. Kwomaroñ ke kakõmõnmõnlok maroñ eo am ñan ijjino juõn bwebwenato ilo am kajerbal nan in jino ko rebolemen lok? Kwomaroñ ke erom juõn ri katakin elaplok an kabel ñe kwoj kõmman juõn Bible study? Ilo am kõmman eindein, kwonaj kõmman bwe ien am kwalok nan en lukkun wõr tokjen im kõmman bwe jerbal in kwalok nan eo am en laplok an wõr tõbrak.​—1 Tim. 4:16.

⁹ Kinke “e karu ien,” mour eo ad en obrak kin jerbal ko an Christian. (1 Kor. 7:29) Karõk ien ñan kwalok nan en laptata ilo lajrak in men ko raorõk jej aikwij kõmmani. En lap kunad ilo jerbal in kwalok nan. Ien ej juõn tokjen emõn me Jehovah ear letok ñan kij. Ien otemjej jen kajerbale ilo meletlet im ilo juõn wãwen ewõr tokjen.

[Box eo ilo peij 4]

Lemnak Kin Nan in Rejañ Kein:

◼ Itok ilo mõkaj ñan kwelok ko in kwalok nan.

◼ Ilo kajerbal kõmmanwa, kwalok nan ilo kumi ko redik.

◼ Bõprae men ko rej karumij ad etal ñan territory eo.

◼ Jerbal ilo territory eo ñe elõñ armij rej bed.

◼ Jet ien ñe ejelok kauwatata kwomaroñ make jerbal.

◼ Kõmman bar jeblak ko rebak ñan territory eo kwoj etal jen em ñan em ie.

◼ Kwon boub wõt in kwalok nan ñe ro jet ilo kumi eo rej rumij in dioj jen juõn em.

◼ Ñe emaroñ, im ekkar ñan wãwen ko ibbam, kwalok nan elõñlok jen juõn awa.