Ekalo Jikin Kallip ñõn Marmir
1. Ta jerbal eo eaurõk im ej walok kiõ?
1 Elikin an kar kwalok nan ñõn kora in Sameria eo, Jisõs ear jiroñ dri kalor ro an: “Komin reilok im lale jikin kallib ko; rekalo kiõ, tõren madmid!” (Jon 4:35, 36, UBS) Jisõs ear kile bwe eor juõn jerbal in marmir ilo kõkkar emwij an jino walok, im ear jela bwe jerbal in enaj jededlok ñõn ijoko otemjej ibelakin lõl. Meñe Jisõs ej ber ilo lõñ, ak elap ijo kwonan ilo jerbal in. (Matu 28:19, 20) Ta ko rej kalikar bwe jerbal in ej laplok wõt im ej walok ilo mõkõj ke jej ebakelok wõt jemlokõn jukjuk im ber in?
2. Ta tõbrõk ko rej walok im rej kalikar bwe jerbal in marmir eo ilo kõkkar ej laplok wot ibelakin lõl?
2 Jerbal in Marmir Ibelakin Lõl: Ilo kar yiõ eo 2009, ear laplok oran dri kwalok nan ro ibelakin lõl kin 3.2 bõjjãn. Ilo ailiñ ko im rej kamoiki jerbal in kwalok nan, ear laplok oran dri kwalok nan ro kin 14 bõjjãn. Ilo kajjojo aliñ, oran ro im rej katak Baibel ear laplok jen 7,619,000. Oran rein me rej katak Baibel elaplok jen oran dri kwalok nan ro im ear bareinwõt lõñlok ñõn enañin 500,000 jen kar yiõ eo moktalok. Ke jerbal in ej jededlok ilo mõkõj ñõn elõñ jikin ko, elaplok aikwij eo kin mejinede ro im rar ber ilo jikuul in Giliad. Ilo elõñ ailiñ ko, elõñ armij ro im rej konono kajin ko jet rej mõnõnõ in katak kin mol eo. Ealikar bwe Jeova ej kamõkõjlok jerbal in ke jej ebake jemlõkon ien marmir eo. (Ais. 60:22) Kwoj ke drebij juõn lemnok emõn kin “jikin kallib ko” am ak jikin ko kwoj kwalok nan ie?
3. Ta lemnok ko reber iben jet ikijen jikin ko rej kwalok nan ie?
3 Jikin ko Kwoj Kwalok Nan Ie: Jet remaroñ ba: “Ilo jikin ko ij kwalok nan ie, armij ro rejjab mõnõnõ in roñjake.” Jet remaroñ lemnok bwe ijo me rej kwalok nan ie eietlok armij ro remõnõnõ in roñjake jen jikin ko jet. Ak remaroñ lemnok bwe ejokolok an armij ro itoklimo in ronjake mol eo jen kar mokta. Kin men in, jet dri kwalok nan ro remaroñ bõk lemnok eo bwe ererelok jerbal in marmir eo ilo jikin ko rej kwalok nan ie. Im rej lemnok bwe jerbal eo air kiõ ej ñõn air aini bween armij ro wot me rej mõnõnõ in roñjake. Ejime ke lemnok kein?
4. Kain lemnok rõt eo ejime jej aikwij kwaloke kin jerbal in kwalok nan, im etke?
4 Jen jinoin ñõn jemlokõn, ien marmir eo ej juõn ien ekanuij lap boub. Jemaroñ kile men in ilo nan kein an Jisõs: “Elap jonikõn, a eiet dri jerbal; Inem komin jar ñõn Iroij in marmir, bwe En jilkinlok ro dri jerbal ilo jonikõn eo An.” (Matu 9:37, 38) Jeova, eo ej Iroij in marmir eo, ej mõke beek ien im jikin eo jonikon ko renaj walok. (Jon 6:44; 1 Kor. 3:6-8) Inem ta ijo kwonad? Baibel eo ej uak im ba: “Ke e jiboñ kwon jeor ine eo am, im ke e jota kwon jab drebij peõm.” (Ekk. 11:4-6) Aet, ejjab emõn ñõn ar drebij peid ak kadriklok ijo kwonad ilo an ebaktok jemlokõn ien marmir eo!
5. Etke jej aikwij kijejeto wot ilo jerbal in kwalok nan meñe jemaroñ lemnok bwe enañin aolep rejjab kõnan roñjake?
5 Wõnmanlok Wõt ilo Jerbal in Marmir: Eor un ko remõn ñõn ar kijejeto im kõmõne jerbal in kwalok nan eo ilo mõkõj, meñe emaron ikutkut ar kwalok nan ilo jikin ko im ej einwõt ñe ejelok rej itoklimo in roñjake. (2 Tim. 4:2) Abañ ko relap im rej walok ibelakin lõl remaroñ kamakõt armij ro ñõn air ukõt wãwen air lemnok im jino kalomõnlokjen kin ilju im jeklaj eo air. Ke jodrikdrik ro rej ridtolok, remaroñ kile aikwij eo bwe en or ainemõn im jokone ilo mour ko air. Ar niknik wõt ilo jerbal in kwalok nan eo emaroñ kaitoklimoik ro jet ñõn air roñjake. Aet, ro im rar makoko in roñjake mokta remaroñ oktõk im kõnan roñjake ennan eo. Meñe ro jet rej jumae ennan eo jej kwalok nan kake, ak jej aikwij kakkil ir.—Ezek. 2:4, 5; 3:19, UBS.
6. Elañe jikin ko jej kwalok nan ie rebin, ta eo enaj jibõñ kij drebij wõt ar kijejeto?
6 Elañe jikin ko jej kwalok nan ie rebin, ta eo enaj jibõñ kij ñõn ar drebij wõt ar kijejeto? Ijellokin ar kwalok nan jen im ñõn im wõt, bwelen jemaroñ kwalok nan ilo wãwen ko jet, einwõt ilo jikin jerbal ko ak ilo ar kajerbal telephone ko. Ak jemaroñ kõmõn oktõk ko ilo nan in ijjino ko ar ilo jerbal in kwalok nan bwe en kaitoklimoik armij eo. Jemaroñ bareinwõt kõmõn oktõk ko ilo ien ko ar bwe jen maroñ kwalok nan ilo jota ak ien ko jet me ekkã an armij ro ber ilo moko imweir. Bwelen jemaroñ katak juõn kajin ekãl bwe jen maroñ tõbar elõñlok armij ro kin nuuj eo emõn. Jemaroñ kalaplok ijo kwonad ilo jerbal in kwalok nan ikijen ar regular pioneer. Ak jemaroñ emakõt ñõn juõn jikin me eiet dri kwalok nan ro ie. Elañe jej drebij wõt juõn lemnok ejime kin jerbal in marmir eo, jenaj kate kij ñõn kõmõne ijo kwonad joñõn wõt ar maroñ ilo jerbal in eaurõk.
7. Ewi toõn an naj wõnmanlok jerbal in marmir eo?
7 Kinke edrik ien ko ibeir ñõn air marmire jikin kallip ko air, dri kallip ro rejjab aiberber ak kakije mae ien ererelok air marmir. Ilo ejja wãwen in lok wõt, jen jab aiberber im kakije kiõ ilo ar kõmõne jerbal in marmir eo ilo kõkkar. Ewi toõn an naj wõnmanlok jerbal in? Jenaj kõmõne jerbal in mae “ien eo e naj itok jemlokõn” jukjuk im ber in ak “ñõn jemlokõn lõl.” (Matu 24:14; 28:20) Einwõt Jisõs, dri Kwalok nan eo elaptata an Jeova, jekõnan karerelok jerbal in kar letoke. (Jon 4:34; 17:4) Kin men in, jen wõnmanlok wõt im kõmõne jerbal in kwalok nan eo ilo kijejeto, lõñliñ, im kin juõn lemnok ejime mae ien eo enaj itok jemlokõn jukjuk im ber in. (Matu 24:13) Jerbal in marmir eo ejañin jemlok!
[Caption on peij 2]
Jen jinoin ñõn jemlokõn, ien marmir eo ej juõn ien ekanuij lap boub