Bõk Kunam Joñan Wõt Am Maroñ ilo Jerbal in Madmõd eo
1 Ri kanan ro etto an Jehovah im bareinwõt Jesus Christ make rar konono kin jerbal in aintok eo. (Ais. 56:8; Ezek. 34:11, New World Translation; Jon 10:16) Juõn jerbal einwõt in rej kõmmane kiõ ke rej kwalok kin news eo emõn kin Ailiñ eo ibelakin lal. (Mat. 24:14) Kõtan eo ikõtan ro rej karejar ñan Anij im ro rejjab karejar ñan e ej laplok an alikar. (Mal. 3:18, NW) Ta melelen men in ñan kij?
2 Juõn Am Make Eddo: Jemaroñ katak jen wanjoñok eo an Paul, eo ear wõr im lap kunan tel ilo jerbal in kwalok nan in Christian. Ear eñjake eddo eo ñan kwalok bwe en wõr juõn ien emõn bwe aolep armij en roñjake kin news eo emõn im bõk lomor. Men in ear kamakit e bwe en jab bõjrak an jerbal ñan tokjen eo air. (Rom 1:14-17) Ilo lemnak kin wãwen eo ekauwatata me ej jelmae armij ro rainin, ejjab ke bwe ewõr juõn ad eddo eo elaplok ñan kwalok nan ñan ro ilo territory eo ad?—1 Kor. 9:16.
3 Juõn Ien ñan Kaiur im Jerbal: Jemaroñ keidi jerbal in kwalok nan ñan juõn jerbal in kabukõt-im-lomor. Jej aikwij bukõt armij im jibañ ir ko ñan juõn jikin ejelok uwõta ie mokta jen an naj kaptata. Ekadu ien eo jemaroñ kõmmane jerbal in. Mour an armij ej bed ilo kauwatata! Ejelok bwilõñ bwe Jesus ear rejañ ri kalor ro an ñan “jar ñan Iroij in marmir, bwe En jilkinlok ro dri jerbal ilo jonikõn eo An.”—Mat. 9:38.
4 Ilo kile aorõkin ien eo rainin, elõñ ri jerbal kin Ailiñ eo rar kalaplok ijo kunair ilo jerbal in lomor in. Juõn jodikdik etan Hirohisa ear jokwe ilo juõn family me jinen ear ejelok rejetan im ibben emen jatin maan im kõrã. Ear kabwe aikwij ko an family eo ilo an ruj ilo jilu awa jorantak ñan bõklamlelok newspaper. Meñe eindein, Hirohisa ear kõnan kalaplok jerbal in kwalok nan eo an, inem ear jino an regular pioneer. Ewõr ke wãwen ko emaroñ laplok ijo kunam ilo jerbal in eban bar walok?
5 “E karu ien.” (1 Kor. 7:29) Kin men in, jen kõmman joñan ad maroñ ilo jerbal eo elaptata an aorõk im ej walok ilo lal in rainin—kwalok kin news eo emõn kin Ailiñ eo im kõmman ri kalor ro. (Mat. 9:35-38) Ilo ad bõk kunad ilo joñan ad maroñ ilo jerbal in madmõd eo, leen jerbal ko ad emaroñ koba ad jibañ juõn armij bwe en mõttan jar eo elap in ri kabuñ ro me Reveles̃õn 7:9, 10 ej kwalok kake.