Komin Ri Jerbal In Jonikõn Ro Rej Lañliñ

“Elap jonikõn, a eiet dri jerbal. Inem komin jar ñõn Iroij in marmir, bwe En jilkinlok ro dri jerbal ilo jonikõn eo An.”​​—⁠MATU 9:​37, 38.

1. Ta eo ej jibañ kij ñan niknik wõt ilo kõmanman ankilan Anij?

ÑE jej kememej ran eo jaar baptais ie einwõt juõn ian ro ri karejaran Jehovah, meñe kar jejjo wõt yiõ ko remotlok ak elõñ, emaroñ einwõt ñe kar inne eo ear walok. Wijtake Jehovah kar men eo ear oktak im lap ilo mour eo ad ke jaar wujleplok ad mour ñan Jehovah. Ke jaar wiaik ien eo emõn ñan jibañ ro jet ñan air roñjake im maroñ kar bõk ennan eo an Ailiñ eo, jerbal eo ekalañliñ ñan Jehovah kar men eo elap ilo kalmenlokjen eo ad. (Dri Epesõs 5:​15, 16) Ñan rainin, jej lo bwe ekanuij mõkaj ien ko ñe jej boub, ilo an lap ad jerbal ilo jerbal an Iroij.” (1 Dri Korint 15:58) Meñe jej ion abañ ko, ad lañliñ ilo kõmanman ankilan Jehovah enaj lujur kij ñan ad wõnmanlok wõt im kõmmane jerbal eo an Iroij.​​—⁠Nihimaia 8:​10.

2. Ta eo ej nakitien lañliñ eo jej ione ilo jerbal in jonikõn eo ilo nan in kõkkar?

² Einwõt Christian ro, jej bõk kunad ilo juõn jerbal eo jej kõkkar kake einwõt jerbal in jonikõn. Jesus Christ ear kõkkar kin aintok eo an kajjojo armij ro ñan mour indio ñan juõn jonikõn. (Jon 4:​35-​38) Ke jej bõk kunad ilo kain jerbal in jonikõn rot in, ej menin kakajur ñan etale lañliñ eo an Christian ro jinoin rar ri jerbal in jonikõn. Jenaj eliji jilu un ko unin ad lañliñ ilo jerbal in jonikõn eo rainin. Men kein rej (1) ennan in kejatdikdik eo ad, (2) etale eo ad ewõr tõbrakin, im (3) eñjake eo ad ñan kõmman ainemõn einwõt ri jerbal in jonikõn ro.

Jilkinlok Einwõt Ri Jerbal in Jonikõn Ro

3. Ilo wãwen et eo ri kalor ro jinoin an Jesus rar lo lañliñ?

³ Mour ko an ri jerbal in jonikõn ro jinoin​​—⁠elaptata ri jilek ro 11 retiljek an Jesus⁠​—⁠ekar lap an oktak ilo ran eo ilo 33 C.E. ke rar etal ñan juõn tol ilo Galilee in ion Christ eo ear jerkakbiji! (Matu 28:16) “Limabuki men ro jimjãn jimjãten” remaroñ kar bed ijo ilo ien eo. (1 Dri Korint 15:⁠6) Rar etal wõt im kakememej ir kin jerbal eo Jesus ear lelok ñan ir. Ear jiroñ ir: “Komin ilok im kõmõn dri ailiñ ko otemjej . . . im baptais ir ilo etan Jema im Nejin im Jitõb Kwojarjar, im katakin ir bwe ren bokake nan ko otemjej I ar jiroñ kom.” (Matu 28:​19, 20) Meñe ear lap matõrtõr, rar lo elap lañliñ ilo jerbal in jonikõn eo ke rar lo an jutak congregation eo an ri kalor ro an Christ ilo elõñ jikin ko. Tokelik, ‘news eo emõn kar kwalok nan kake ñan menin kõmanman ko otemjej iumin lañ.’​​—⁠Dri Kolosse 1:​23; Jerbal 1:8; 16:⁠5.

4. Iumin wãwen et ko ri kalor ro an Christ kar jilkinlok ir?

⁴ Ilo juõn ien lok iman ilo jerbal in kwalok nan eo an ilo Galilee, Jesus ear kirtok 12 ri jilek ro im jilkinlok ir elaptata bwe ren keañ: “Ailiñ in lõñ ebak.” (Matu 10:​1-7) E make ear “etetal ilo [Galilee] jikin kwelok ko otemjej relap im redrik, Ej katakin iloan imõn kwelok ko air, im kwalok gospel an ailiñ in lañ, im kemour ro re nañinmij otemjej, im mõjino otemjej iben armij rõn.” Jesus ear buromõj kin jar ko “bwe rej barõk, im jibliklik einwõt s̃ip ko ejelok air s̃eperd.” (Matu 9:​35, 36) Ilo an kar lukkun emmakit, ear jiroñ ri kalor ro an: “Elap jonikõn, a eiet dri jerbal. Inem komin jar ñõn Iroij in marmir, bwe [Jehovah Anij] En jilkinlok ro dri jerbal ilo jonikõn eo An.” (Matu 9:​37, 38) Joñan eo Jesus ear joñwe kin aikwij eo ñan ri jerbal in jonikõn ro ejja einwõt kar ilo Judea ke bwen ien jerbal in kwalok nan eo an ion lal kar jiljino wõt alliñ. (Luk 10:⁠2) Ilo ien kein jimor, ear jilkinlok ri kalor ro an einwõt ri jerbal in jonikõn ro.​​—⁠Matu 10:5; Luk 10:⁠3.

Ennan in Kejatdikdik eo Ad

5. Kain ennan et eo jej keañ kake?

⁵ Einwõt ro ri karejaran Jehovah ilo ran kein, jej ilo lañliñ uak ñan kir eo ñan ri jerbal in jonikõn ro. Juõn mol eo ewõr kunan ñan bõktok ñan kij elap lañliñ ej bwe jej bõklok juõn ennan in kejatdikdik ñan ro rej ebwer im eñtan. Einwõt ri kalor ro an Jesus ilo ebeben eo kein kajuõn, ej juõn jerammõn eo ewõr ibbed ñan keañ kin news eo emõn​​—⁠juõn ennan eo emol kin kejatdikdik​​—⁠ñan ro rej “barõk im jibliklik einwõt s̃ip ko ejelok air s̃eperd”!

6. Ilo makitkit et eo ri jilek ro rar bõk kunair ie ilo ebeben eo kein kajuõn?

⁶ Tok ñan tuiolap in ebeben eo kein kajuõn, ri jilek Paul ear boub in kwalok nan kin news eo emõn. Im jerbal in jonikõn eo an ear mol an bolemen, bwe ilo an kar jeje ñan Christian ro ilo Corinth iturinlok 55 C.E., ear ba: “A Ij kajelaik kom, ro jãtiõ, gospel eo I ar kwalok ñõn kom, eo kom ar bõke, im eo kom bareinwõt jutõk kake.” (1 Dri Korint 15:⁠1) Ri jilek ro im Christian ro jinoin rar ri jerbal in jonikõn ro rar kijejeto. Meñe Bible eo ejjab jiroñ kij jete ri jilek ro rar ellã im mour jen wãwen ko ear idiñ air walok im jemlok ilo jeebeplok eo an Jerusalem ilo 70 C.E., jejjab jelã bwe ri jilek John ear kwalok wõt nan jet 25 yiõ ko tokelik.​​—⁠Reveles̃õn 1:⁠9.

7, 8. Ta ennan in kejatdikdik eo ro ri karejaran Jehovah rej keañ kake ibben an kiõ laplok an menin ekaiuriur jen mokta?

⁷ Inem ear itok ebeben ko ear kajur ri tel in kabuñ in Christendom, “armij in jerawiwi” eo ear buñ jen tõmak. (2 Dri Tessalonika 2:⁠3) Bõtab, tok ñan jemlokin ebeben eo kein ka 19, ro rar kate ir ñan air mour ekkar ñan katak ko an mour in Christian eo jinointata rar bõk ennan in kejatdikdik, im keañ kin Ailiñ eo. Ilo mol, jen jeje eo an jinointata (July 1879), title eo an journal in ear kobaik nan kein “Keañ kin an Christ Bed,” “Keañ kin Ailiñ eo an Christ,” ak “Keañ kin Ailiñ eo an Jehovah.”

⁸ Ailiñ eo an Anij ilañ ear ejaak ilo pein Jesus Christ ilo 1914, im kiõ ej laplok ad ekaiuriur jen mokta in keañ kin ennan eo kin kejatdikdik. Etke? Kinke ibwiljin jerammõn ko an Ailiñ eo ej iroij ej jemlok eo ej mõkajtok an jukjuk in bed in enana kiõ. (Daniel 2:​44, New World Translation) Ebar wõr ke juõn ennan emõnlok? Im ta lañliñ eo elaplok emaroñ wõr ibbed jen bõk kunad ilo kejelã kin Ailiñ eo mokta jen an “iñtan eo elap” walok?​​—⁠Matu 24:21; Mark 13:⁠10.

Juõn Etale eo Ewõr Tõbrakin

9. Ta nan in jiroñ eo Jesus ear lelok ñan ri kalor ro an, im ewi wãwen an kar armij ro emmakit ñan ennan eo an Ailiñ eo?

⁹ Bar juõn mol eo ej jibañ kij bwe jen lañliñ einwõt ri jerbal in jonikõn ro ej etale eo ad ewõr tõbrakin kin ro emwij air oktak im ri kalor im kobatok ibbed ilo jerbal in jonikõn eo. Ien ko lok ilo 31-​32 C.E., Jesus ear jiroñ ri kalor ro an: “Im ilo jabrewõt jikin kwelok elap ak erik kom naj dreloñ ie, komin etale wõn eo ej bed ie im tellokin.” (Matu 10:11) Ejjab aolep armij kar tellokiir, einwõt an alikar ikijen emmakit eo air ñan ennan eo an Ailiñ eo. Mekarta, ri kalor ro an Jesus rar kijejeto ilo jerbal in kwalok news eo emõn ijoko jabdewõt armij ro rej bed ie.

10. Ewi wãwen an kar Paul jibadõk etale eo an kin ro tellokiir?

¹⁰ Elikin mij im jerkakbiji eo an Jesus, etale eo ñan ro tellokiir ear wõnmanlok wõt kin kajur. Paul ear kõmmanwa ibben Ri Jew ro ilo lokatok eo air im ibben armij ro rar bed ilo jikin market eo ilo Athens. Ke ear kwalok nan ilo Areopagus ilo bukwon in ilo Greek, “jet armij rej eddeb na iben im tõmak, juõn iair Dionysius, juõn ri ekajet in jikin ekajet eo ilo Areopagus, im juõn kõra etan Damaris, im bar jet ibeir.” Jabdewõt ijo Paul ear etal ie, ear bareinwõt joñok ilo jerbal in kwalok nan ilo “bwilij, im jen mweo ñõn mweo.”​​—⁠Acts 17:​17, 34, NW; 20:⁠20.

11. Ta kilen ko ñan kõmmane jerbal in kwalok nan eo kar kajerbali ilo yiõ ko lok?

¹¹ Ilo jejjo 100 yiõ ko eliktata ilo ebeben eo kein ka 19, Christian ri kabit ro rar ilo beran bõk kunair ilo etale eo kin ro tellokiir. Ilo juõn ennan title eo an “Ri Kabit ñan kwalok nan,” Zion’s Watchtower an July/August 1881 ear ba: “Kwalok nan kin news eo emõn . . . ej etal wõt ‘ñan ro rettã’​​—⁠ro rej mõnõnõ im maroñ roñjake, bwe ren ejaake jen ibwiljiir enbwinin Christ, ri jolet ro rejetan.” Ri jerbal ro an jonikõn eo an Anij ekkã air ion armij ro ke rein rej rol jen air jar ilo imõn jar ko air im rej lelok ñan ir tract ko im ebed ie ennan ko jen Jeje ko kar jõknalõmeir ñan jarõk juõn emmakit eo emõn ilo ro tellokiir. Elikin juõn etale eo elet ilo wãwen in ebolemen ilo kwalok nan, Imõniaroñroñ eo an May 15, 1903, rar kõketak ri jerbal in jonikõn ro bwe ren leto-letak tract ko “jen em ñan em, ilo Sabbath mokta jen raelep.”

12. Ewi wãwen ad kar kalaplok an bolemen jerbal in kwalok nan eo ad? Kwalok wanjoñok.

¹² Ilo yiõ ko ran kein, emwij ad kalaplok jerbal in kwalok nan eo ad ilo ad kebak armij ro ilo jikin ko jet ijellokin moko imwiir. Menin emwij an alikar an lukkun bolemen ilo ene ko wãwen ko an economy ie im makitkit ko ñan kakije rej bõklok armij ro jen moko imwiir ilo jet ien ñe jej etal ñani. Ke juõn Ri Kennan ilo England im armij eo mõttan rar lo ri lotok ro ekkã air etal jen bus ko elikin air ikkure ilo mõnõnõ ilo juõn ran ilo barijet eo iturin lojet, rar beran im iuwe ilo bus ko im lelok copy ko in Imõniaroñroñ im Awake! ñan ro rej uwe ibbeir. Ilo juõn alliñ, rar ajeje 229 copy ko. Rar report: “Ejelok am mijak in kwalok nan ibarijet iturin lojet eo, jikin business, ak jabdewõt ijoko jet kimij etal ielok kinke kim jelã bwe Jehovah ej bed ibbem ien otemjej.” Rar ejaake juõn jikin air keini in lelok magazine, jino juõn katak Bible, im erro jimor rar bõk kunair ilo jerbal in auxiliary pioneer.

13. Ta kajimwe eo ilo jerbal in kwalok nan eo ad rar aikwij kõmmane ilo jet jikin ko?

¹³ Ke jerbal in etale eo ej wõnmanlok wõt kin ro tellokiir, emaroñ wõr aikwij ñan bar etale jerbal in kwalok nan eo ad ilo jet jikin ko. Meñe elõñ Ri Kennan ro rar ekkar ñan manit in bõk kunair ilo jerbal in kwalok nan jen em nan em ilo jibboñin Sabbath ko, ilo jet jikin rej lo bwe lolok ko remõkaj ñan moko imõn armij ro edik an bolemen kinke armij ro bõlen rej kakije wõt im kiki. Ilo air kõmman oktak in ien lolok ko air, elõñ Ri Kennan rej kiõ etal ilo lolok eo elikinlok ran eo, bõlen elikin kwelok ko an Christian. Im etale in ej kamol an kouwa leen. Yiõ eo lok oran ri keañ ro an Ailiñ eo ibelakin lal ear laplok kin joñan in 2.3 percent. Menin ej wijtake Iroij in jonikõn eo im bõktok lañliñ ñan buruõd.

Debij wõt Ainemõn ilo Jerbal in Jonikõn eo

14. Kin lemnak et eo jej kwalok ennan eo ad, im etke?

¹⁴ Bar juõn unin lañliñ eo ad ej atartarlok ilo lemnak in kõmman ainemõn eo jej kalikar ilo jerbal in jonikõn eo. “Im ñe komij dreloñ iloan jabrewõt im,” Jesus ear ba: “komin yokyokwe e; im ñe emõn mweo, ami ainemõn en ber ion.” (Matu 10:​12, 13) Nan in yokyokwe in Hebrew eo im kajin eo einlok wõt ilo Bible in Greek eo ej kwalok lemnak eo ‘Emõn eo en ibbam.’ Lemnak in ej jibañ ilo ad kebak armij ro ñe jej kwalok nan kin news eo emõn. Kejatdikdik eo ad ej bwe enaj emõn air emmakit ñan ennan eo an Ailiñ eo. Ñan ro emõn air uak, ewõr jerammõn in air ruaklok ñan Anij ke rej ukwelok jen jerawiwi ko air, oktak, im kõmanman ankilan. Inem, ainemõn ibben Anij ej tellok ñan mour indio.​​—⁠Jon 17:3; Jerbal 3:​19; 13:​38, 48; 2 Dri Korint 5:​18-​20.

15. Ewi wãwen ad maroñ debij wõt juõn lemnak in ainemõn ñe jej jelmae juõn emmakit eo ejjab emõn ilo jerbal in kwalok nan eo ad?

¹⁵ Ewi wãwen ad maroñ debij wõt ainemõn ñe uak eo jej jelmae ejjab emõn? Jesus ear jiroñ “A elañe e jab emõn mweo, en bar jeblaktok ami ainemõn ñõn kom.” (Matu 10:13) Ennan eo ilo Luke kin jilkinlok 70 ri kalor ro ekoba ennan eo an Jesus: “Elañe juõn jeran ainemõn ej bed ijo, ami ainemõn en bed ion. Ak elañe ejelok, enaj jeblakwaj ñan kom.” (Luke 10:​6, NW) Ñe jej kebak armij ro kin news eo emõn, jej kõmman eindein ilo jimwe kin juõn wãwen eo emõn im ainemõn. Juõn uak eo ejelok itoklimo ie, juõn abõnõnõ, ak juõn ennan eo ejjab joij an juõn ri mweo ej kõmmane juõn wãwen eo ej kõtlok an ‘roltok ñan kij’ ennan in ainemõn eo ad. Ak ejelok juõn ian menin ej kwote ainemõn eo ad, juõn leen jitõb kwojarjar eo an Jehovah.​​—⁠Dri Galetia 5:​22, 23.

Juõn Mejenkajjik Emõn ñan Ri Jerbal in Jonikõn ro

16, 17. (a) Ta mejenkajjik eo ad ñe jej kõmman jerbal in bar jeblak? (b) Ewi wãwen ad maroñ jibañ ro ewõr kajitõk ko air ilo Bible?

¹⁶ Einwõt ri jerbal in jonikõn ro jej mõnõnõ ilo an wõr ijo kunad ilo aintok eo an armij ñan mour indio. Im ej juõn lañliñ eo jej loe ñe juõn armij eo jej kwalok nan ñane ej emõn an emmakit, kõnan kalaplok an katak, im kamol bwe ej “juõn jeran ainemõn”! Bõlen elõñ an kajitõk ko kin Bible im jej lo bwe jejjab maroñ uaki ilo juõn ien eo jej lolok. Ke ñe eaetok ad bed ilo ien lolok eo ad jinointata bõlen emaroñ jab ekkar, ta eo jemaroñ kõmmane? Emaroñ wõr juõn ad mejenkajjik eo einwõt eo kar jiroñ kake jet 60 yiõ ko remotlok.

¹⁷ “Aolep Ri Kennan ro an Jehovah rej aikwij kebojak ñan kõmman katak ko rebolemen ilo Bible eo.” Ennan in ear walok ilo men eo kein kajilu ilo juõn lajrak in Model Study (Kilen Katak Ebolemen) eo kar kamelele kake ilo booklet ko kar jei jen 1937 ñan 1941. Ej etal wõt im ba: “Aolep ri kwalok ro an [Ailiñ eo] rej aikwij niknik ilo jibañ ilo jabdewõt wãwen armij ro remõn rej kwalok air itoklimo ilo ennan eo an Ailiñ eo. Bar jeblak ej aikwij kõmman ibben armij rein, uak elõñ kajjo kain kajitõk ko . . . , inem jino juõn kilen katak ebolemen. . . joñan wõt am maroñ mõkaj.” Aet, mejenkajjik eo ad ñan bar jeblak ej ñan jino juõn katak Bible imweo im ekkeini kõmmane.a Juõn eñjake in jimjera im yokwe ñan armij eo ewõr an itoklimo menin ej kamõkaj kij bwe en emõn ad kebojak im kõmmane katak eo ilo bolemen.

18. Ewi wãwen ad maroñ jibañ ro rekãl ñan oktak im ri kalor ro an Jesus Christ?

¹⁸ Kin jibañ eo ilo book eo Knowledge That Leads to Everlasting Life (Jelãlokjen eo Ej Tellok ñan Mour indio) im brochure ko einwõt Ta eo Anij Ekõnan bwe Jen Kõmmane?, jemaroñ kõmman katak Bible ilo mweo ilo bolemen im ilo wãwen in maroñ bõk kunad in jibañ ro rekãl im ewõr air itoklimo ñan erom ri kalor. Ke jej bukõt ad kajeoñe Ri Kaki eo Elap, Jesus Christ, bõlen ri katak rot rein renaj bareinwõt katak jen ainemõn eo ad, wãwen lañliñ, ettã eo ad, im ad kautiej kien im ialin tel ko an Jehovah. Ñe jej jibañ ro rekãl kin uak ko ñan kajitõk ko air, jen bareinwõt kõmmane joñan wõt ad maroñ ñan katakin ir wãwen air maroñ uak ro rej kajitõkin ir. (2 Timote 2:​1, 2; 1 Piter 2:​21) Einwõt ri jerbal in jonikõn ro ilo nan in kõkkar, emol jemaroñ lañliñ kin juõn joñan eo einwõt in 4,766,631 katak Bible ko kar kõmmani ilo moko ibelakin lal ilo yiõ in jerbal eo ej kab motlok. Elaptata ad lañliñ elañe jej ibwiljin ri jerbal in jonikõn ro ewõr kunair ilo makitkit in katak Bible ilo moko.

Lañliñ Wõt ilo Jonikõn eo

19. Etke ear wõr un ko remõn ñan lañliñ ilo jonikõn eo ilo ien eo Jesus ear kwalok nan im elikinlok wõt jidik?

¹⁹ Ear wõr un ko remõn ñan lañliñ ilo jonikõn eo ilo ien jerbal in kwalok nan eo an Jesus im elikinlok wõt jidik. Inem elõñ iair rar bõk news eo emõn. Lañliñ ear lap ilo Pentecost eo ilo 33 C.E., bwe jet 3,000 rar bõk tel eo an Peter, im bõk jitõb kwojarjar eo an Jehovah, im oktak im mõttan ailiñ eo an Anij Israel ilo jitõb. Emol, orair ear lõñlok wõt, im ear lap lañliñ ke “Jehovah ear etal wõt im kobaiklok na ibbeir ran otemjej ro rej bõk lomor.”​​—⁠Acts 2:​37-​41, 46, 47, NW; Dri Galetia 6:​16; 1 Piter 2:⁠9.

20. Ta eo ej bõktok an lap ad lañliñ ilo jerbal in jonikõn eo ad?

²⁰ Ilo ien eo, kanan eo an Isaiah ear kamol an mol: “Kwar [Jehovah] korlok ro dri ailiñ eo, Kwar kalõñlok air lõñliñ: rej lõñliñ imam einwõt lõñliñ ilo ien marmir, einwõt armij rej lõñliñ ke rej ajej men in rakimi.” (Aiseia 9:⁠3) Meñe kiõ jej lo bwe ‘orlok in ailiñ’ eo an ri kabit ro ededelok, lañliñ eo ad elap ke jej lo oran ri jerbal in jonikõn ro jet ej eddeklok jen yiõ ñan yiõ.​​—⁠Sam 4:⁠7; Zechariah 8:​23, NW; Jon 10:⁠16.

21. Ta eo jenaj konono kake ilo katak in tok ilokan?

²¹ Emol ewõr un ko rekeie ñan ad etal wõt im lañliñ ilo jerbal in jonikõn eo. Ennan eo ad kin kejatdikdik, etale eo ad kin ro tellokiir, im lemnak in kõmman ainemõn eo ad​​—⁠mol kein otemjej rej bõktok ad lañliñ einwõt ri jerbal in jonikõn ro. Ak, rej kõmman menin an elõñ emmakit ilo jumae. Ri jilek John ear ione menin. Rar kalbuji ilo enen Patmos “kin nan in Anij im kennan an Jisõs.” (Reveles̃õn 1:⁠9) Inem, ewi wãwen ad maroñ debij wõt lañliñ eo ad ñe jej jelmae matõrtõr im jumae? Ta eo enaj jibañ kij ñan kijenmij ilo lemnak ko rebin an elõñ ro jej kiõ kwalok nan ñan ir? Katak in ad tok juõn ej letok jibañ eo jen Jeje ko ñan uak kajitõk kein.

[Kamelele ko itulal]

Ewi Wãwen Am Naj Kar Uak?

• Ta jerbal in jonikõn eo ilo nan in kõkkar?

• Kain ennan et eo jej keañ kake?

• Etke etale eo ad kin ri kalor ewõr tõbrak ie?

• Ewi wãwen ad debij ainemõn ilo jerbal in jonikõn eo?

• Etke jej etal wõt ilo ad lañliñ ilo jonikõn eo?

[Pija]

Kwalok nan ilo ebeben ko kein kajuõn im ka 20

[Pija]

Einwõt Paul, ri jerbal in jonikõn ro ilo ran kein rej kajeoñ tõbar armij ro ijoko jabdewõt

[Pija]

Keañ kin news eo emõn kin juõn buru emõn