Kwalok Nan kin Ailiñ eo Ej Jibañ ñan Lomoren Armij!
1 Ej jerbal eo eaorõktata ej walok ion lal ilo ter in. Jehovah Anij, Jesus Christ, im elõñ million enjel ro rej lale wõt jerbal in. Ta eo, im etke eaorõk? Ej jerbal in kwalok nan kin Ailiñ eo, im ej jibañ ñan lomoren armij!—Rom 1:16; 10:13, 14.
2 Jet rej eñjake bwe emaroñ laplok ad jibañ armij elañe jej bõk kunad ñan kakõmõnmõnlok lal eo ibelakid. Elõñ rej mad kin jibadbad ko ñan bõk ainemõn, kemour nañinmij ko, ak kõmanmõnlok economy eo. Ak ta eo elaptata an naj jibañ armij?
3 Jerbal eo Elaptata an Aorõk: Ennan in Ailiñ eo wõt ej kamelele kin un eo unin mour, unjen eñtan ko an armij, im kejatdikdik eo wõt emol im jemaroñ liki kin ilju im jeklaj. News eo emõn ej kamaroñ armij ñan air erom ro jeran Jehovah im ilo wãwen in bõk “ainemõn jen Anij, eo ej elã jen jela otemjej.” (Pil. 4:7) Ennan in Ailiñ eo wõt ej letok nan in tel ko rekeie ñan jibañ armij jerbale abañ ko an mour kiõ im ej kamelele kin ewi wãwen ad maroñ elle im mour ñe ejako lal in enana ilo ran ko renaj itok. (1 Jon 2:17) Ejjab ke juõn tokjen elap ñan ad kate kij ilo jerbal in kwalok nan kin Ailiñ eo?
4 Ñan wanjoñok: Ta wãwen eo emõn tata ñan jibañ juõn bukwon ijo ri jokwe ro ie rekiki im rej bed ilo kauwatata kin an iten rup worwor eo ej debij den ko jen an torlok? Ãnen den eo jen ilikin worwor eo emõjno ñan debij den eo ke? Kaibujuij bukwon eo ebed ilo kauwatata ke? Jaab! Kwoj aikwij kworuj armij ro ilo bukwon eo, kakkõl ir kin jorrãn eo ej iten walok, im jibañ ir ñan ko! Ro rej kiki ilo jitõb kiõ rej bed ilo juõn kauwatata elap. (Luk 21:34-36) Kinke ejjabto enaj jako jukjuk im bed in, jen kate kij ñan kwalok nan kin juõn jitõb in ekaiuriur ñan aolep armij joñan ad maroñ!—2 Tim. 4:2; 2 Pit. 3:11, 12.
5 Kijenmij ilo Jerbal In: Jen bukõt wãwen ko ñan jibadõk elõñlok armij ro emol burueir im jake news eo emõn ibbeir—ilo moko imwiir, iturin ial, ikijen kajerbal telephone, im ilo jabdewõt ien emõntok. Jerbal eo Jehovah ear letok ñan kij ej jerbal eo eaorõktata jemaroñ kõmmane. Elañe jej kajejjete ilo kijejeto, jenaj ‘make lomoren kij kab ro rej roñjake kij.’—1 Tim. 4:16.