Kwalok Nan ilo Iruj!
1. Ta nan in rejañ ko an Paul raurõk ilo ran kein ar?
1 “Kwon kwalok nan, kwon kate yuk.” (2 Tim. 4:2) Etke nan in rejañ ko an Paul raurõk ilo ran kein ar? Ewi wãwen nan kein remaroñ jelet mour eo ar im an ro jet?
2. Etke jen aikwij niknik ilo ar kabukot ro rejañin roñ kin nuuj eo emõn?
2 Ej Jelet Mour: Elõñ million armij ro ibelakin lõl rejañin roñ kin nuuj eo emõn eo emaroñ tel ir ñõn bõk lomor. (Rom. 10:13-15; 1 Tim. 4:16) Rej lo elõñ ian armij ro emol burueir ilo bukwon ko emakijkij air kwalok nan ie. Elañe jej kwalok nan ilo bar juõn ran ak ilo bar juõn auõ, jemaroñ lo bar juõn armij. Ar kate in kabukot rein enaj letok juõn bõklikõt emõn im jenaj erreo jen bõtõktõkin armij otemjej.—Jerb. 20:26.
3. Ewi wãwen jemaroñ kajerbal ien ko ar ilo meletlet ñe jej kwalok nan?
3 Meñe dri Kristian ro ilo jinoin rar iion jumae ko relej, rar ‘kobrõk Jerusalem kin katak ko air.’ (Jerb. 5:28) Jej ke kate in “kwalok ñõn armij rõn,” einwõt kar ir? (Jerb. 10:42) Ñe jej kwalok nan, jej kajerbal ke ien ko ar ilo meletlet? Elañe jej kõtar ro mõtar ñe rej lolok armij ro, jej bõk ke ien im kennan iben ro jej lo ir?
4. Ewi wãwen kwalok nan ilo iruj emaroñ jibõñ kij bwe jen ekil wõt?
4 Kalaplok Ar Ekil: Ke ebaktok jemlokõn jukjuk in ber in, jej aikwij ekil, mimij im jadõr. (1 Tes. 5:1-6) Elañe jej niknik in konono kin kejatrikrik eo ar kin Ailiñ eo, jejamin bo im ebwer iben jukjuk im ber in. (Luk 21:34-36) Im elañe jej ‘kõtõmene im lipjerjer e’ an ran eo an Jeova itok, jenaj kalaplok ijo kwonad ilo jerbal in kwalok nan.—2 Pit. 3:11, 12.
5. Ewi wãwen koutiej mour enaj kamakõt kij ñõn kwalok nan?
5 Ñe jej kwalok nan ilo iruj jej kwalok lemnok eo an Jeova kin mour: “E jab kõnan bwe jabrewõt en joko, a bwe ren otemjej itok im ukwelok ibeir.” (2 Pit. 3:9; Ezek. 33:11, UBS) Jen jek ilo buruer ñõn kõtõbar aolep armij ilo bukwon eo ar ñõn aibujuij eo an Jeova!—Sam 109:30.