“Eo Ej Maroñ in Bõke En Bõke”
1 Juõn ien, ke ear konono ibben ri kalor ro an kin belele, Jesus ear konono kin make ian einwõt ‘juõn men in letok.’ Inem ear ba: “Eo ej maroñ in bõke en bõke.” (Mat. 19:10-12) Jet yiõ ko tokelik, ri jilek Paul ear je kin tokjen ko kin make ian im ear rejañ ro jet ñan lor joñok eo kin an make ian. (1 Kor. 7:7, 38) Elõñ rainin rar ‘kãlet’ ñan air make iair im rej lañliñ kin elõñ tokjen ko. Ta jet ian tokjen kein?
2 Jerbal ilo “Ejelok Men in Kabwir”: Paul ear melele bwe an make ian ear lelok ñan e ien eo emõn ñan karejar ñan Jehovah ilo “ejelok men in kabwir.” Eindein rainin, juõn likao ej make ian emaroñ kadeloñ etan ilo Ministerial Training School, im juõn armij ej make ian ej anemkwoj in deloñ ilo jerbal in pioneer, katak bar juõn kajin, emmakit ñan juõn jikin ijo elap air aikwiji jibañ ie, jerbal ilo Bethel, ak bojak kin jerbal ko jet rejej uair. Emaroñ laplok an wõr ien ko remõn ñan katak ibben make im kalmenlokjen im ñan konono ibben Jehovah ilo jar. Juõn armij ejañin belele ekkã an laplok an wõr ien ñan lelok e make ñan jibañ ro jet. Aolep jerbal kein rej ñan “kakajuror kom.”—1 Kor. 7:32-35; Jerbal 20:35.
3 Jerbal kein ñan Anij ilo ejelok jabdewõt men ej kamad ir rej bõktok elap tokjen ko. Elikin an bed ilo Kenya iumin 27 yiõ ko, juõn sister eo ej make ian ear je: “Ear lukkun lõñ ro jera im elap an lõñ jerbal ko! Kim ar kõmman men ko ibben don [im] lolok don. . . . Iar maroñ kajerbal anemkwoj im maroñ eo ñan ito-itak kin aõ make iaõ ñan aõ boub ilo jerbal in kwalok nan, im men in ear bõktok ñan iõ elap mõnõnõ.” Ear wõnmanlok im ba: “Iumin yiõ kein kõtan eo aõ ibben Jehovah ear mũlallok.”
4 Kortokjen ilo Ekkar Am Make Iam: Jesus ear ba bwe unin am kaddeklok men in letok eo kin make iam en “kin ailiñ in lõñ.” (Mat. 19:12) Einwõt kin jabdewõt men in letok ko, kwoj aikwij kajerbal ilo ekkar ien am make iam bwe en bõktok lañliñ im tokjen ko. Ilo air kortokjen ien ko remõn rej bellok ñe rej make iair im ilo air reilok ñan Jehovah ñan bõk meletlet im kajur, elõñ ro rejañin mare rar melele kin aorõkin men in letok eo kin air make iair.