Nan eo an Anij Emol
1. Ta melele eo eaorõk ej bed ilo Bible eo?
1 “Bõran Am in nan, mol,” ri jeje psalm ear je. (Sam 119:160) Ikijen Nan in kakõrmol eo an, Jehovah ej letok uak ko rekajuburu ñan kajitõk ko raorõk kin mour. Ej lelok kainemõn im kejatdikdik ñan ro rej inebata. Im ej kwalok ñan kij kilen ad ruaklok ñan e. “Katak mol eo jen Bible eo ej einwõt ad ilok jen juõn jikin elukkun marok im kaburomõjmõj im deloñ ilo juõn room ealikar, meram, im emõn,” juõn kõrã ewõr an kamolol ear ba. Kwoj kate yuk ke ñan jiroñ ro jet kin mol eo jen Nan eo an Anij ien otemjej?
2. Ewi wãwen Bible eo ej kakõmanmanlok mour ko an armij?
2 Kajur eo ñan Ukõt im Emejaja ñan Ro Otemjej Ibelakin Lal: Mol eo ilo Bible ewõr kajur eo ñan jelet buru ko im ukõt mour ko an armij. (Hib. 4:12) Juõn kõrã etan Rosa ear erom juõn kõrã ekijoñ im bareinwõt le jen joñan an idak alcohol im bõk uno ko rekajur. “Juõn ran, ke iar lukkun buromõj,” ear ba, “ruo Ri Kennan ri belele ro rar konono ibba kin ewi wãwen Bible eo emaroñ jibañ kij kamadmõde abañ ko ad. Iar jino katak Nan eo an Anij, eo ear lukkun kaitoklimoõ. Ilo juõn wõt alliñ iar bõk kajur eo ñan mour ilo juõn wãwen ekãl im erreo. Kiõ kin an wõr unin aõ mour, ejako aõ atartar ion alcohol im uno ko rekajur. Im kin aõ kõnan bwe in jeran Jehovah, iar bebe ilo buruõ bwe in mour ekkar ñan kien ko an. Elañe ear jab kin meletlet eo ekeie kin Nan eo an Anij, Ij jelã bwe inaj kar kiõ mõn iõ make.”—Sam 119:92.
3. Etke jen jab ãliklik in jaketo-jaketak ennan eo ilo Bible ibben ro jet?
3 Oktak jen elõñ book ko rainin, Bible eo ej emejaja ñan armij ro jen ‘ailiñ otemjej, bwij otemjej, driloabjen otemjej, im konono otemjej.’ (Rev. 7:9) Ej ankil an Anij bwe en “lomoren armij otemjej, im bwe ren item jela mol.” (1 Tim. 2:4) Kin men in, jen jab wãlok im bõk lemnak eo bwe juõn armij ejamin mõnõnõ in bõk news eo emõn kin wõt iminene in mour eo an. Jen men in, jaketo-jaketak ennan in Ailiñ eo ibben armij otemjej, im kajerbal kamelele ko kajju jen Bible eo ñe emaroñ.
4. Ewi wãwen jemaroñ kajerbal Bible eo ñe jej kwalok nan?
4 Kwalok kin Jeje ko: Ebellok elõñ ien ko remõn ñan kajerbal Bible eo ilo jerbal in kwalok nan. Ñe jej lelok magazine ko, kajeoñ in kajerbal eon eo ej walok ilo ennan eo rej rejañ kake. Ñe jej kajerbal book in lelok ilo alliñ eo, jet rej lo bwe ekeie ñan air konono juõn eon ejejjet ilo nan in jino ko. Ñe jej bar jeblak, kwalok juõn ak elõñlok eon ko ilo Bible kajjojo ien ñan jibañ bwe jidik kin jidik ri mweo en maroñ bõk jelãlokjen eo ejimwe. Ñe jej kõmman juõn Bible study, keolaplape bwebwenato eo ion eon ko relap. Ñe kwojjab kwalok nan jen em ñan em, likit juõn Bible ilo jikin eo ebidodo am bõke ñe ej walok ien ko remõn ñan kwalok nan ilo jabdewõt ien emõn tok.—2 Tim. 2:15.
5. Etke jej aikwij kate kij ñan kajerbal Bible eo ilo jerbal in kwalok nan eo ad?
5 Jen jibañ ro jet ñan bõk tokjen jen kajur in kamakit eo an Nan in mol eo an Anij ilo am kajerbal Bible eo ilo jabdewõt ien ekkar ilo jerbal in kwalok nan eo ad.—1 Tess. 2:13.