Kwoj ke Jojomar Nan eo an Anij?
1 Ilo juõn lal me ekkã an kariap Bible eo, Ri Christian ro remol rekijejeto ñan jojomar Nan eo an Anij. Kin ad tõmak bwe “Jeje ko otemjej emwij letok kin kakõrmol an Anij,” jej burukuk ibben Jesus Christ, Eo ear kennan ilo jar ñan Jehovah: “Am in nan mol eo.” (2 Tim. 3:16; Jon 17:17) Ewi wãwen jenaj maroñ jojomar Nan eo an Anij ilo juõn wãwen ebolemen?
2 Katak kin Jeje ko ilo Bible: Ejelok bere bwe Jesus ear kate wot e ñan katak Nan eo an Anij. Men in ear kamaroñ e ñan katakin ro jet jen jeje ko ilo ien jerbal in kwalok nan eo an. (Luk 4:16-21; 24:44-46) Ewi wãwen jemaroñ kalaplok ad kememej kin eon ko? Ikijen ad read Bible eo jen ran nan ran im kalmenlokjen kin juõn eon elap an kõketak kij emaroñ bareinwõt jibañ ilo ien jerbal in kwalok nan eo. Ilo ien jej kebojak lok iman kin kwelok ko, jej aikwij kabuk im read eon ko jen Bible eo ad make im bojak ñan uak im kamelele. Ilo ien kwelok ibben don, jej aikwij ãlõkļok ñan eon ko ilo Bible eo ad make ñe ri konono eo ej read eon ko. Ad katak jeje ko ilo Bible enaj jibañ kij bwe ‘ejimwe wõt ad katakin kin nan in mol.’—2 Tim. 2:15.
3 Kõtlok bwe Bible eo en Katakin: Ilo ien jerbal in kwalok nan, jej aikwij kõtlok bwe Bible eo en katakin. Ñan wanjoñok, ñe ebellok juõn ien emõn, jej aikwij kajeoñ im kwalok juõn eon ibben ri mweo. Elañe enaj jomantak juõn kajitõk ak ejjab errã ibbam, enaj emõnlok ñan kajerbal Bible eo bwe en uak. Elañe ri mweo ej boub, bõlen jenaj maroñ im kwalok juõn point jen Bible eo ilo ad ba, “Mokta jen aõ illok, joij im kõtlok bwe in kwalok ibbam eon in.” Ñe emaroñ, kajeoñ im konono jen Bible eo, im kõtlok bwe ri mweo en lo eon eo kwoj readi ilo Bible eo am.
4 Ke juõn ri mweo ear lo eon ko ñan kalikar jab jimwe kin katak in Trinity, ear ba ilo bwilõñ, “Ilo aolepen aõ mour iar juõn armij e niknik ilo kabuñ, ak iar jab lukkun jelã bwe Bible eo ej ba men in!” Ilo mõkaj ear mõnõnõ ñan jino katak bible eo. Jesus ear ba bwe sheep ro an renaj bokake ainikien. (Jon 10:16, 27) Ibben ro emol burueir wãwen eo emõntata ñan kile mol eo ej ikijen air lo kin mejeir jeje ko ilo Bible. Kin men in jen jojomar mol in Nan eo an Anij!