Ejaake Juon Jem̦jerã eo Epaak Ippãn Jeova
1. Etke eaorõk bwe jen ejaake juon jem̦jerã epaak ippãn Jeova?
1 Elõñ men ko jej aikuj kate kõj ñan kõm̦m̦ani bwe en epaak jem̦jerã eo ad ippãn Jeova. Elõñl̦o̦k men ko jej aikuj kõm̦m̦ani jãn ad baj bõk kun̦aad ilo m̦akũtkũt ko an Kũrjin. El̦aññe jej likjab in keini ad kõnono ippãn Jeova, ejjabto tokãlik enaaj jako ad epaake ãinwõt kar m̦okta. (Rev. 2:4, UBS) Jenaaj etale ewi wãween katak ippãd make im jar remaroñ jipañ kõj ejaake juon jem̦jerã epaak ippãn Jeova.—Sam 25:14, UBS.
2. Ta ko jemaroñ kõm̦m̦ani ñe jej katak ippãd make im renaaj kõm̦m̦an bwe jen ruwaakl̦o̦k ñan Anij?
2 Jar im Kõl̦mãnl̦o̦kjen̦ Relukkuun Aorõk: Jem̦jerã eo ad ippãn Jeova enaaj kajoorl̦o̦k el̦aññe enaaj m̦wilal̦l̦o̦k ad katak ippãd make, im jab baj kakõl̦l̦eiki wõt uwaak ko im lali eoon ko. Jej aikuj bar kõl̦mãnl̦o̦kjen̦ kõn ewi wãween mel̦el̦e ko rej kwal̦o̦k kõn l̦õmn̦ak ko an Jeova, kien ko an, im kain Anij rot e. (Ex. 33:13, UBS) Ñe el̦apl̦o̦k ad mel̦el̦e katak ko ilo Baibõl̦, men in enaaj jelõt bũruod im eñjake ko ad im enaaj kõm̦akũt kõj ñan etale mour ko ad. (Sam 119:35, 111) Unleplep in ad katak ippãd make ej bwe jen ruwaakl̦o̦k ñan Jeova. (Jem. 4:8) Bwe jen lukkuun bõk tokjãn ñe jej katak, jej aikuj karõk juon iien im pukot juon jikin em̦m̦an ñan katak. Bareinwõt jej aikuj jel̦ã kaarmejjete kõj make bwe jen maroñ kajejjete im keini ad katak ippãd make. (Dan. 6:10, UBS) Meñe kwõ poub, kwõj ke kõm̦m̦an iien am̦ kõl̦mãnl̦o̦kjen̦ kõn wãween ko rem̦m̦an ippãn Jeova kajjojo raan?—Sam 119:147, 148; 143:5.
3. Ewi wãween ad jar m̦okta jãn ad katak ippãd make ej jipañ kõj ñan epaake Jeova?
3 Ñe jej katak ippãd make, eaorõk bwe jen jar jãn bũruod. Bwe katak ko ilo Baibõl̦ ren kõm̦akũt bũruod ñan “kabuñ ñan Anij ilo wãween eo enaaj buñbũruon kake, kõn nõbar im mijak,” jej aikuji kajoor eo an Anij. (Hi. 12:28, UBS) Kõn men in, m̦okta jãn ad katak, jej aikuj jar im eoware Jeova bwe en letok kajoor eo an ñan jipañ kõj. (Luk 11:13) Ilo ad kõl̦mãnl̦o̦kjen̦ kõn eoon ko im lale bok ko an doulul in im rej jipañ kõj ñan mel̦el̦e kobban eoon ko, jej kepel̦l̦o̦k bũruod ñan Jeova. (Sam 62:8) Ad katak ippãd make ilo wãween in ej juon wãween jej kabuñ ñan Jeova kõnke jej kwal̦o̦k ad tiljek ñan Jeova im kakajoorl̦o̦k kõtaan eo ad ippãn.—Jud 20, 21.
4. Etke eaorõk bwe jen kõl̦mãnl̦o̦kjen̦ kõn Naan in Anij kajjojo raan?
4 Ãinwõt ad kõm̦m̦an bwe jen epaake wõt ro jet, ãindein jej aikuj wõnm̦aanl̦o̦k im kõm̦m̦ani men ko rej kakajoor kõtaan eo ad ippãn Jeova bwe jen epaake wõt ilo aolepen mour eo ad. Innem, jen wiaik iien kajjojo raan ñan ruwaakl̦o̦k ñan Anij, im jejel̦ã bwe ñe jej ãindein enaaj bar ruwaaktok ñan kõj.—Sam 1:2, 3; Ep. 5:15, 16.