Burukuk eo Emol an Christian—Ewi Wãwen?
1 Ta eo emaroñ kaburukuk elõñlok jen jiljino million armij ro jen 234 ailiñ ko im enañin 380 kumi in kajin ko? Kabuñ ñan Jehovah Anij wõt. (Mic. 2:12, New World Translation; 4:1-3, NW) Ri Kennan ro an Jehovah re jelã jen iminene ko air bwe burukuk eo emol an Christian ej juõn men eo emol rainin. Einwõt “juõn wõt bwij” iumin “juõn s̃eperd,” emwij ad bebe ñan jumae jitõb in jebel eo an lal in.—Jon 10:16; Ep. 2:2.
2 Karõk eo eban likjap an Anij ej bwe aolep men in kõmanman ko remeletlet ren burukuk ilo kabuñ eo emol. (Rev. 5:13) An jelã kin aorõkin men in, Jesus ear kõmman bwe burukuk eo an ri karejar ro an en juõn men ear jar kake. (Jon 17:20, 21) Ewi wãwen kij kajjojo jemaroñ kowõnmanlok burukuk eo an congregation in Christian?
3 Ewi Wãwen Kõtõbrak Burukuk eo: Elañe kar ejelok Nan eo an Anij im jitõb eo, jejamin maroñ kõtõbrak burukuk in Christian eo. Ñe jej jerbale men ko jej konono kaki ilo Bible jej kõtlok bwe jitõb eo an Anij en jerbal ilo mour ko ad. Men in ej kamaroñ kij ñan “kejbãrok an Jitõb kõmõnmõn buru wõt juõn ilo liab in ainemõn.” (Ep. 4:3) Ej kamakit kij bwe jen meanwõd ñan don ilo yokwe. (Kol. 3:13, 14; 1 Pit. 4:8) Kwoj kowõnmanlok ke burukuk in ilo am kalmenlokjen kake Nan in Anij kajjojo ran?
4 Jerbal eo ad ñan kwalok nan im kõmman ri kalor ro ej bareinwõt kaburukuk kij. Ñe jej kwalok ibben ro jet ilo jerbal in kwalok nan an Christian, “[jej] jimor kate [kij] kin tõmak eo in gospel,” im jej erom “dri jerbal ibeir ñõn mol.” (Pil. 1:27; 3 Jon 8) Ñe jej kõmman eindein, lukluk in yokwe eo ej kaburukuk iloan congregation eo ej kajurlok. Etke kwojjab kir juõn eo eto am jab jerbal ibben ñan etal ibbam ilo jerbal in kwalok nan ilo week in?
5 Elap ad jerammõn bwe jej mõttan dolul in jimjãn jimjatin eo wõt emol ibelakin lal rainin! (1 Pit. 5:9) Ilo alliñ ko rej kab motlok, elõñ armij rar lo burukuk in ibelakin lal ilo “Kaibujuij Anij” International Convention ko. Kimij kejatdikdik bwe kij kajjojo jenaj kowõnmanlok burukuk in eaorõk ilo ad konono Nan in Anij kajjojo ran, kamadmõde abañ ko ilo yokwe, im ilo ad “juõn wõt” ñan kwalok kin news eo emõn.—Rom. 15:6.