Juõn Jerbal Me Jehovah Ej Rejetake
1 Ibwiljin ri karejar ro an Anij rainin, jejjo wõt rar bõk jelãlokjen ko reutiej, mweie, ak buñbuñ ilo jukjuk im bed in kiõ. Kin un in, jet armij rej kajekdon jerbal in kwalok nan eo ad einwõt ejelok tokjen. (Ais. 53:3) Bõtab, jerbal in katakin Bible eo me jej kõmmane ear kainemõn im bõktok kejatdikdik ñan elõñ million armij ro ibelakin lal. Ewi wãwen armij ro rettã rar maroñ kõtõbrak tokjen kein rekabwilõñlõñ? Kin wõt rejetak eo an Anij. (Mat. 28:19, 20; Jerbal 1:8) “Anij e ar kãlet men in mõjino ko an lõl,” ri jilek Paul ear kamelele, “bwe En kajok men ko rebin.”—1 Kor. 1:26-29.
2 Ri jilek ro im Ri Christian ro jet ilo ebeben eo kein kajuõn rar “dri jab katak im dri jab meletlet.” (Jerbal 4:13) Ak, ilo beran rar kajejjet jerbal eo air ñan kwalok kin news eo emõn, im Jehovah ear kajerammõn jibadbad ko air. Meñe rar iion abañ ko im jumae, ‘nan eo an Jehovah ear kanuij laplok im kajurlok.’ Ejelok jabdewõt men ear maroñ kabõjrak jerbal in kinke Anij ear rejetake. (Jerbal 5:38, 39; 19:20) Wãwen in ej eindein ilo ran kein. Jumae eo an ri tel ro rekajur ear jab maroñ kabõjrak news eo emõn jen an laplok im kajurlok.—Ais. 54:17.
3 Lelok Aolep Nebar ko ñan Anij: Meñe jej bõk jerammõn eo ejej uan bwe jej ri karejar ro an Anij, ewõr ke unin ad kemjãje kake? Jaab. Ilo an konono kin jerbal in kwalok nan eo an Christian, Paul ear je: “A men in aurõk in ibem ej ilo jãbi brij ko, bwe maroñ eo e kanuij lap en jen Anij, im jab jen kim.” (2 Kor. 4:7) Paul ear kile bwe ear maroñ kajejjet jerbal in kwalok nan eo an kin kajur eo Anij ear letoke.—Ep. 6:19, 20; Pil. 4:13.
4 Jej kile bareinwõt bwe kin ad “bõk jibõñ jen Anij” jaar maroñ kõtõbrak jerbal in kwalok nan eo. (Jerbal 26:22) Ilo ad keañ kake ibelakin lal, Jehovah ej kajerbal kij ilo juõn wãwen ekabwilõñlõñ ñan jilkinlok juõn makitkit lal ilujen ailiñ ko—juõn kakõlle kin ekajet in kabedakilkil me ejjabto enaj itok. (Hag. 2:7, New World Translation) Elap ad jerammõn bwe jej “dri jerbal iben Anij” ilo ien madmõd in elap ilo jitõb!—1 Kor. 3:6-9.