Kaorõk Jeraam̦m̦an eo Am̦ ñan Kwal̦o̦k Naan
1. Ta l̦õmn̦ak eo an elõñ armej ro ilo lal̦ in kõn jerbal in kwal̦o̦k naan eo ad?
1 Elõñ armej ro ilo jukjuk im pãd in an Setan rej l̦õmn̦ak bwe jerbal in kwal̦o̦k naan eo ad ej juon menin “bwebwe.” (1 Ko. 1:19-21) El̦aññe jejjab kõjparok, l̦õmn̦ak im naan kein an armej rein remaroñ kabbeer kõj im kõm̦m̦an bwe en jako ad kijejeto ilo kwal̦o̦k naan. (JK 24:10, UBS; Ais. 5:20) Etke jej aikuj kaorõke jeraam̦m̦an in ad ãinwõt Ri Kõnnaan ro an Jeova?—Ais. 43:10.
2. Etke jerbal in kwal̦o̦k naan ej juon jerbal ekwõjarjar?
2 Jerbal Ekwõjarjar: Rijjelõk Paul ear ba bwe kwal̦o̦k naan ej juon “jerbal” jej kõm̦m̦ane ñan Anij. (Rom 15:15, 16) Etke jerbal in kwal̦o̦k naan eo ad ej juon jerbal ekwõjarjar? Eokwe, ñe jej kwal̦o̦k naan, ej ãinwõt ñe jej jerbal ippãn Jeova, Anij eo Ekwõjarjar. Jerbal in ad ej bõktok nõbar im kautiej ñan ãt eo etan. (1 Ko. 3:9; 1 Pi. 1:15) Jeova ej watõk jerbal in ad ãinwõt juon ‘menin katok.’ Kõn men in, ad kwal̦o̦k naan ej juon wãween eaorõk me jej kabuñ ñan Jeova.—Hi. 13:15, UBS.
3. Etke jerbal in kwal̦o̦k naan ej juon jeraam̦m̦an ejej uwaan?
3 Jerbal in kwal̦o̦k naan ej juon jeraam̦m̦an eaorõk im ejej uwaan me kar lel̦o̦k ñan jejjo wõt armej. Enjel̦ ro renaaj kar m̦õn̦õn̦õ in kõm̦m̦ane jerbal in, im enaaj kar l̦ap aer tõprak el̦aññe Jeova en kar lel̦o̦k jerbal in ñan er. (1 Pi. 1:12, UBS) Bõtab, Jeova ear letok wõt jeraam̦m̦an in ñan kõj armej ro, meñe jej ãinwõt bũñalñal im jejjab weeppãn!—2 Ko. 4:7.
4. Ewi wãween jemaroñ kwal̦o̦k bwe jej kaorõke jerbal in kwal̦o̦k naan eo ad?
4 El̦ap An Aorõk: Kõnke jerbal in kwal̦o̦k naan ej juon jeraam̦m̦an, jej aikuj watõke ãinwõt juon iaan ‘men ko rem̦m̦antata’ im raorõktata ilo mour ko ad. (Pil. 1:10, UBS) Eñin unin jej aikuj kate kõj bwe jen bõk kun̦aad ilo jerbal in kajjojo wiik. Ñan waanjoñak: M̦okta jãn an juon ri kõjañjañ ilo̦k im kõjañjañ ñan armej ro, enaaj jol̦o̦k el̦ap iien m̦oktal̦o̦k ñan kõmmãlmel. Aolep iien enaaj kate bwe en em̦m̦anl̦o̦k kilen im wãween an kõjañjañ. Ãindeinl̦o̦k wõt, jej aikuj kõppojakl̦o̦k im̦aan m̦okta jãn ad ilo̦k im kwal̦o̦k naan. Etke? Kõnke jen maroñ kwal̦o̦k naan ilo jejjet im ilo jim̦we, im bwe jen jel̦ãl̦o̦k kilen katakin armej ro kõn Anij.—2 Ti. 2:15; 4:2.
5. Wõn ro rej m̦õn̦õn̦õ ippãd kõn ad jerbal in kwal̦o̦k naan?
5 Jouj im jab kõtl̦o̦k bwe naan im kõm̦m̦an ko an armej ro ilo lal̦ in ren kabbeer eok. Keememej bwe elõñ armej ro jet im el̦ap aer m̦õn̦õn̦õ ñe jej ilo̦k im bwebwenato ippãer kõn Baibõl̦ eo. Bõtab, ejjab unleplep in ad kwal̦o̦k naan ej bwe jen kabuñbũruon armej ro. Jej kwal̦o̦k naan kõnke jekõn̦aan bwe Jeova en m̦õn̦õn̦õ im buñbũruon ippãd. Im jejel̦ã bwe eaorõk jerbal in ippãn im el̦ap an kam̦m̦oolol kõj.—Ais. 52:7, UBS.