Kar Likit Ibbed juõn Mweiuk Eaorõk
1 Ri jilek Paul ear kaorõk jerbal eo Anij ear lelok bwe en kõmmane ñan kwalok nan im ear kwalok kake einwõt juõn “men in aurõk.” (2 Kor. 4:7) Ear kijenmij wõt iumin matõrtõr im ien ko rebin ilo an kõmmane jerbal eo kar lelok ñane. Ear jab mõk in kwalok nan ibben jabdewõt ro ear iion ir. Ear ito-itak ilo ial ko rekauwatata im bin ilo ene im ilo lojet. Ewi wãwen ad maroñ anõk Paul im kwalok bwe jej kaorõk jerbal in kwalok nan eo ad? (Rom. 11:13) Ta eo ej kõmman bwe jerbal in kwalok nan eo ad en lukkun juõn mweiuk eaorõk?
2 Juõn Mweiuk Eaorõk: Mweiuk ko raorõk ilo lal ekkã air bõktok elap buromõj im jidik wõt am bõk tokjeir ak ejjab to air bed. Ijo tu-rãjet, jerbal in kwalok nan eo ad ej bõktok ñan kij im ro jet tokjen ko rej ñan indio. (1 Tim. 4:16) Ej jibañ armij ro emol burueir ñan air itok im jelã kin Jehovah, kõmman oktak ko ilo mour ko air, im bõk juõn kejatdikdik emol kin mour indio. (Rom. 10:13-15) Ilo ad kaorõk jerbal in kwalok nan eo ad, jej bõk juõn un ekalañliñ kin mour, juõn eñjake ewõr tõbrak ie, im juõn kejatdikdik ekõketak kin ilju im jeklaj.—1 Kor. 15:58.
3 Kamol Bwe Kwoj Kaorõk Jerbal in Kwalok Nan eo Am: Ad lukkun kaorõk juõn men ekkã an alikar ikijen ta eo jej mõnõnõ in lelok kake. Ej juõn jerammõn elap ñan ad kajerbal ien im kajur ko ad ñan nebar Jehovah! (Ep. 5:16, 17) Wãwen ad kajerbal ien ko ad ej aikwij kalikar bwe jej kaorõklok men ko lor jitõb elaplok jen jibadbad ko ilo kanniek. Kinke ewõr ibbed juõn men elukkun aorõk ñan ad jaketo-jaketak, jekõnan kwalok nan ilo kijejeto im bojak wõt ñan kennan kin news eo emõn ilo jabdewõt ien emõn tok.
4 Mweiuk ko raorõk einwõt gold ak diamond ekkã air jab noji ak rej likiti ilo juõn jikin ealikar ñan an ro jet loi im mõnõnõ kaki. Elañe jej watõk jerbal in kwalok nan eo ad einwõt juõn mweiuk eaorõk, enaj juõn mõttan eaorõk ilo mour eo ad. (Mat. 5:14-16) Kin buru eobrak kin kamolol, jen aolep ien anõk ri jilek Paul im kortokjen jabdewõt ien ebellok ñan ad kwalok bwe jej lukkun kaorõk jerbal in kwalok nan eo ad, kaorõke einwõt juõn mweiuk eaorõk.