Kwalok Nan kin Ailiñ eo—Juõn Jerammõn Eaorõk
1 Ran otemjej, elõñ billion armij ro ion lal rej bõk tokjen jen men in letok ko rejoij an Jehovah ñan kejbãrok mour. (Mat. 5:45) Bõtab, eiet wõt ro ewõr ibbeir jerammõn eo ejej uan ñan kwalok kamolol ñan Ri Kõmanman eo air ilo air kwalok kin news eo emõn kin Ailiñ in Anij. (Mat. 24:14) Ewi joñan am kaorõk jerammõn in ejej uan?
2 Kwalok nan kin Ailiñ eo ej kautiej Anij im bõktok kejatdikdik im ainemõn ñan armij ro rej inebata kin ien kein renana. (Hib. 13:15) Ñan ro rej mõnõnõ in eoroñ ennan in, enaj melelen ñan ir kejatdikdik eo kin mour indio. (Jon 17:3) Ewõr ke juõn jerbal ilo lal in ej letok tokjen ko einwõt kein? Ri jilek Paul ear kwalok kamolol eo an kin jerbal in kwalok nan ilo wãwen eo ear kajejjete. Ear watõke einwõt juõn men eaorõk.—Jerbal 20:20, 21, 24; 2 Kor. 4:1, 7.
3 Kwalok Kamolol kin Jerammõn eo Ad Eaorõk: Juõn wãwen jej kwalok kamolol eo ad kin jerammõn in ñan kwalok nan ej ikijen ad etale emõnin jerbal eo ad. Jej bõk ke ien ñan keboj juõn ennan me enaj jelet buruen ro rej roñjake kij? Jemaroñ ke kakõmanmanlok kabel eo ad ñan kajerbal Jeje Ko im ñan kõmmanwa ibben armij? Elet ke ad jerbal ilo territory ko kar karõki ñan kij? Jemaroñ ke jino im kõmman juõn Bible study? Einwõt Ri Christian ro retiljek, ilo ien ko remotlok im ran kein jimor, jej emmakit kin juõn lemnak ejimwe kin jerbal in, im jej kaorõk jerammõn eo ad.—Mat. 25:14-23.
4 Ñe jej jelmae wãwen ko kin ad ritto, ejjab emõn ejmour eo ad, ak wãwen ko jet rebin, ej men in kainemõn kij ilo ad jelã bwe jibadbad ko ad rekijejeto ñan bõk kunad ilo jerbal in kwalok nan raorõk. Nan in Anij ej kamol ñan kij bwe Jehovah ej kaorõk jibadbad rot kein ñan karejar ñan e, meñe jibadbad kein rejjab lap iman mejen ro jet.—Luk 21:1-4.
5 Kwalok nan kin Ailiñ eo ej juõn unjen juburu elap. Juõn sister 92 yiõ dettan ear ba: “Ej juõn jerammõn elap ñan reiliklok ñan 80 yiõ ko in aõ jerbal ñan Anij—ilo ejelok ajlok! Elañe I maroñ mour bar juõn alen, enaj ilo ejja wãwen in wõt kinke, ilo mol, ‘joij eo an Anij emõn jen mour.’ ” (Sam 63:3) Jen bareinwõt kwalok ad kamolol kin jerammõn in eaorõk jen Anij—jerbal in kwalok nan kin Ailiñ eo.